រាជធានីភ្នំពេញ ៖ លោក Leonardo Vitorino គ្រូបង្វឹកក្រុមបាល់ទាត់ជម្រើសជាតិកម្ពុជា បានលើកឡើងថា ចាន់ វឌ្ឍនាកា ជាផ្នែកមួយនៃការផ្លាស់ប្ដូរវិស័យបាល់ទាត់នៅកម្ពុជា ដ្បិតកីឡាកររូបនេះបានប្រឹងប្រែងហ្វឹក ហាត់ចេញពីក្រអៅបេះដូងតែម្ដង ។ លោកបង្ហើបថា លោកបានទាក់ទងចាន់ វឌ្ឍនាកា និងគ្រូផ្នែកកម្លាំងរបស់គេជាប់ជាប្រចាំទើបដឹងថា គេបានប្រឹងប្រែងហ្វឹកហាត់លើសពីសមាជិកដទៃនៅក្លិប Fujieda MYFC ប្រទេសជប៉ុន ។
លោក Leonardo Vitorino រៀបរាប់ថា ៖ «ជារៀងរាល់ថ្ងៃ ចាន់ វឌ្ឍនាកា ចំណាយពេលហ្វឹកហាត់ដល់ទៅ២ពេល(ព្រឹកនិងថ្ងៃ)ខណៈសមាជិកផ្សេងទៀតភាគច្រើនហាត់តែពេលថ្ងៃប៉ុណ្ណោះ ។ គេប្រឹងប្រែងបែបនេះដើម្បីមានឱកាសជាប់ជម្រើសជាតិ ជាពិសេសដើម្បីកម្ពុជាតែម្ដងទោះបីជាគេមិនទាន់បង្ហាញខ្លួនក្នុងការប្រកួតផ្លូវការនៅជប៉ុនក្ដី ។ នៅពេលហ្វឹកហាត់ជាមួយនឹងក្រុមជម្រើសជាតិ គេបានព្យាយាមធ្វើអ្វីដែលខ្ញុំដាក់ឲ្យគេធ្វើ ហើយកាលប្រកួតជាមួយនឹងក្រុមឥណ្ឌា គេក៏បានបង្ហាញនូវកំណើនសមត្ថភាពដ៏ប្លែករបស់គេផងដែរ» ។
គ្រូបង្វឹកជនជាតិប្រេស៊ីលរបស់ក្រុមជម្រើសជាតិកម្ពុជារៀបរាប់ប្រាប់អ្នកសារព័ត៌មានបែបនេះកាលពីព្រឹកថ្ងៃទី២៩ ឧសភា ក្នុងពិធីប្រកាសបញ្ជីឈ្មោះកីឡាករ២៥រូបនៃក្រុមបាល់ទាត់ជម្រើសជាតិកម្ពុជា ដែលត្រៀមប្រកួតមិត្តភាពជាមួយក្រុមជម្រើសជាតិឥណ្ឌូណេស៊ី នៅថ្ងៃទី៨ មិថុនា និងជួបក្រុមជម្រើសជាតិអាហ្វហ្គានីស្ថានវគ្គជម្រុះ AFC Asian Cup នៅថ្ងៃទី១៣ មិថុនា នៅពហុកីឡដ្ឋានជាតិអូឡាំពិក រាជធានីភ្នំពេញ ទាំង២ប្រកួត ។ ក្រុមបាល់ទាត់ជម្រើសជាតិកម្ពុជាទាំង២៥រូបក្នុងនោះក៏មានកីឡាករចាន់ វឌ្ឍននាកា ដែល ស្ថិតក្នុងតំណែងខ្សែប្រយុទ្ធមួយរូបដែរនោះនឹងប្រមូលផ្ដុំគ្នាហ្វឹកហាត់ចាប់ពីថ្ងៃទី១ ខែមិថុនា តទៅ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
