ភ្នំពេញៈ ក្រុមហ៊ុនដឹកអ្នកដំណើរទៅទិសដៅខេត្តព្រះសីហនុគ្រោងនឹង ដំឡើងថ្លៃសំបុត្ររថយន្ត២០ភាគរយ ក្នុងឱកាសបុណ្យសមុទ្រនៅសប្តាហ៍ក្រោយនេះ។
មន្ត្រីក្រុមហ៊ុនដឹកអ្នកដំណើរបាននិយាយថា ដោយសារមានកំណើនអ្នកដំណើរទៅកម្សាន្តសមុទ្រនៅថ្ងៃបុណ្យសមុទ្រ នោះ ក្រុមហ៊ុននឹងដំឡើងថ្លៃក្នុងការធ្វើដំណើរនេះ។
លោក ផាន់ ណា អគ្គនាយកក្រុមហ៊ុនសូរិយាដឹកអ្នកដំណើរ បានឲ្យដឹងថា ក្រុមហ៊ុននេះអាចនឹងឡើងថ្លៃ២០ភាគរយ ពីលើតម្លៃធម្មតា។
បច្ចុប្បន្នសំបុត្ររថយន្តក្រុងទៅខេត្តព្រះសីហនុមួយតម្លៃ២ម៉ឺនរៀល ហើយបន្ទាប់ពីការដំឡើងថ្លៃ២០ភាគរយតម្លៃនឹងកើនដល់ ២៤ ០០០ រៀល។
លោកបន្តថា ក្រុមហ៊ុនក៏បង្កើនចំនួនជើងនៃការដឹកជញ្ជូនភ្ញៀវផងដែរ ពី៨លើក ទៅ១០លើកក្នុងមួយថ្ងៃ។ លោកថ្លែងថា៖ «មនុស្សអាចទៅច្រើនព្រោះគេមានពិធីបុណ្យសមុទ្រយើងនឹងមើលទៅតាមស្ថានភាពជាក់ស្តែង»។
លោក ស៊ុន លី ម្ចាស់រថយន្តក្រុងសម្រាប់ជួលនៅម្តុំផ្សារនាគមាសក្រុង ភ្នំពេញបាននិយាយថា លោកមានរថយន្តជួលទាំងអស់ជិត២០គ្រឿង មានទាំងពីរប្រភេទ ២៥ កៅអី រហូតដល់ ៤៥ កៅអីហើយរថយន្តទាំងនោះត្រូវបានជួលអស់ហើយ។
លោកបន្តថា លោកបានដំឡើងថ្លៃរថយន្តមួយគ្រឿងពីជាង១០ដុល្លារ ដល់ ២០ដុល្លារនៅពេលខាងមុននេះ។ តម្លៃជួលរថយន្តក្នុងថ្ងៃធម្មតាគឺ២៥០ដុល្លារក្នុងមួយថ្ងៃ សម្រាប់រថយន្ត ៤៥ កៅអី ប៉ុន្តែតម្លៃនេះនឹងកើនដល់២៧០ ដុល្លារ។
ក្រសួងទេសចរណ៍បានរៀបចំពិធីបុណ្យសមុទ្រ សម្រាប់បង្កើនការទាក់ទាញអ្នកទេសចរបន្ថែមទៀតឲ្យមកកាន់តំបន់ ឆ្នេរ បន្ទាប់ពីឆ្នេរកម្ពុជាត្រូវបានដាក់បញ្ចូលក្នុងសមាជិកក្លិបឆ្នេរ ស្អាតបំផុតក្នុងពិភពលោក។
បន្ទប់ផ្ទះសំណាក់ និងសណ្ឋាគារត្រូវកក់អស់ហើយ ហើយក្រសួងក៏បានសម្រេចបោះតង់ជួលបន្ថែមទៀត សម្រាប់បំពេញតម្រូវការកន្លែងស្នាក់នៅរបស់ភ្ញៀវទេសចរ។
ស្ថានភាពបែបនេះបានធ្វើឲ្យក្រុមហ៊ុនដឹកអ្នកដំណើរក៏សម្រេចដំឡើងថ្លៃសំបុត្រផងដែរ។
កញ្ញា គង់ កញ្ញា ប្រធានផ្នែកទីផ្សារនៃក្រុមហ៊ុនដឹកអ្នកដំណើរ GSTនិយាយថា រថយន្តក្រុមហ៊ុនត្រូវបានម្ចាស់សណ្ឋាគារ និងផ្ទះសំណាក់ជួលនៅពេលថ្ងៃបុណ្យខាងមុខនេះ។
ទោះបីយ៉ាងនេះក្តីតម្លៃសំបុត្ររថយន្តក្រុងនៅក្រុមហ៊ុននេះនៅមិន ទាន់កំណត់ថាឡើងថ្លៃប៉ុន្មាននោះទេ ព្រោះនៅរង់ចំាដល់កៀកថ្ងៃបន្តិចទៀត ហើយក្រុមហ៊ុននឹងបង្កើនចំនួនរថយន្ត អាស្រ័យទៅតាមចំនួនអ្នកដំណើរជាក់ស្តែង។
កញ្ញា គង់ កញ្ញា បាននិយាយទៀតថា៖ «ខ្ញុំនៅមិនទាន់អាចប្រាប់បានប្រាកដទេនៅពេលនេះដោយរង់ចាំពីរ បីថ្ងៃទៀត នៅពេលមានការសម្រេចពីមេ»៕
ដកស្រង់ពីគេហទំព័រភ្នំពេញប៉ុស្តិ៍
សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។សូមអរគុណ ខ្មែរស្រលាញ់ខ្មែរ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]