ក្មួយស្រី កែវ រំចង់ បង្ហាញឈុតប្រកួតថ្មី «គុនខ្មែរ» បំពេញបំណងអ្នកគាំទ្រ

ភ្នំពេញ៖ ក្រោយឈ្នះខ្សែក្រវ៉ាត់នៅសហរដ្ឋអាមេរិក កាលពីប៉ុន្មានសប្តាហ៍មុន កីឡាការិនី Samontha Stephenson ដែលជាក្មួយស្រីរបស់ កែវ រំចង់ ទទួលបានការសាទរជាច្រើនពីប្រិយមិត្តស្នេហាវិស័យប្រដាល់។ ប៉ុន្តែទន្ទឹមនឹងការសាទរ ក៏មានប្រិយមិត្តខ្លះ បញ្ចេញមតិរិះគន់ផងដែរ ដោយសារកីឡាការិនីរូបនេះ ឡើងប្រកួត ដោយស្លៀកខោរបស់ថៃ (Muay Thai) ។

បើទោះជាយ៉ាងណាក៏ដោយ ពេលនេះ កីឡាការិនី Samontha Stephenson បានឆ្លើយតប ក៏ដូចជាបំពេញតាមតម្រូវការរបស់អ្នកគាំទ្រហើយ បន្ទាប់ពីរូបនាងបានបង្ហោះរូបមួយសន្លឹក ក្នុងឈុតថ្មី ខោគុនខ្មែរ ពណ៌ផ្កាឈូកយ៉ាងស្រស់ស្អាត មិនតែប៉ុណ្ណោះ បូកផ្សំជាមួយអាវយឺតពណ៌ខ្មៅ ដែលមានរូបតំណាងគុនខ្មែរ នៅខាងក្រោយអាវទៀតផង។

ពាក់ព័ន្ធនឹងរឿងនេះ កីឡាករប្រដាល់ កែវ រំចង់ មានក្តីរំភើបយ៉ាងខ្លាំង ក្រោយពីឃើញក្មួយស្រីរបស់ខ្លួនបង្ហាញនូវឈុតថ្មីនេះ ហើយបានសរសេរនៅក្នុងបណ្តាញសង្គមរបស់ខ្លួនថា «ឥឡូវក្មួយស្រីញុមបាន បំពេញបំណងរបស់បងប្អូនហើយ គឺស្លៀកខោ ( គុណខ្មែរ) របស់យើងហើយ សូមបងប្អូនជួយគ្រាំទ្រក្មួយស្រីផងណាបងប្អូន» ៕