រំភើបចិត្ត! ចៅប្រុសអាយុ១៧ឆ្នាំ នាំលោកយាយចំណាស់ ចូលរួមកម្មវិធីជប់លៀងនៅសាលា ព្រោះដឹងថាមានពេលមិនយូរទៀតទេ

បរទេស៖  ក្មេងប្រុសជំទង់អាយុ ១៧ឆ្នាំម្នាក់ បាននាំលោកយាយដែលមានជំងឺមហារីកដំណាក់កាលចុងក្រោយ ទៅចូលរួមក្នុងកម្មវិធីជប់លៀងនៅសាលាជាមួយខ្លួន  ខណៈលោកយាយ អាចមានជីវិតរស់នៅបានប្រហែល ២ ទៅ៣ ខែទៀតប៉ុណ្ណោះ។

កាលពីថ្ងៃសៅរ៍កន្លងទៅ ក្មេងប្រុស Stephen Vigil បាននាំលោកយាយអាយុ ៩២ឆ្នាំ របស់គេ ឈ្មោះ Julia Jarman ទៅកាន់វិទ្យាល័យ Stafford ដែលមានទីតាំងនៅក្នុងទីក្រុង Fredericksburg រដ្ឋ Virginia សហរដ្ឋអាមេរិក។  មូលហេតុដែលគេនាំលោកយាយមកជាមួយ ដោយសារគាត់មានជំងឺមហារីកលំពែង ហើយពួកគេចង់មានពេលវេលាដ៏រីករាយ និងអនុស្សាវរីយ៍មិនអាចបំភ្លេចបានជាមួយគ្នា។

លោកយាយ Jarmen ជាស្ត្រីម្នាក់ដែលមិនធ្លាប់បានចូលរួមកម្មវិធីរបៀបនេះទាល់តែសោះពីមុនមក។   ក្នុងគ្រាដ៏មានអត្ថន័យនោះ លោកយាយបានស្លៀករូបពណ៌ខៀវ ជាមួយកម្រងផ្កាកុលាបពណ៌ក្រហមយ៉ាងស្រស់ស្អាត សាកសមតែម្តងជាមួយអាវធំរបស់ចៅប្រុស។ លើសពីនេះ នាយកសាលាបានបំពាក់ម្កុដពណ៌ប្រាក់ និងឆៀង ដែលមានអក្សរថា “Prom Court” ជូនលោកយាយ នៅពេលដែលលោកយាយដើរចូលក្នុងបន្ទប់កម្មវិធីផងដែរ។

លោកយាយ Jarman បានបង្ហាញអារម្មណ៍រំភើប និងនិយាយថា  “ពួកយើងបានសើចសប្បាយ ជជែកគ្នាលេង ញ៉ាំកាហ្វេ និងញ៉ាំទឹកផ្លែឈើជាដើម។ វាពិតជាអស្ចារ្យខ្លាំងណាស់”។ 

ចំនែកចៅប្រុសវិញ បាននិយាយថា “គាត់មិនមានពេលវេលានៅជាមួយខ្ញុំបានយូរទៀតទេ ដូច្នេះខ្ញុំមិនស្ទាក់ស្ទើរក្នុងការនាំគាត់ មកចូលរួមក្នុងកម្មវិធីមួយនេះឡើយ។ ខ្ញុំពិតជារីករាយណាស់ ដែលពួកយើងអាចមានពេលវេលាដែលមិនអាចបំភ្លេចបាននេះ ជាមួយគ្នា”។

គួរបញ្ជាក់ថា ដោយសារហេតុផលទាំងនេះហើយ ទើបបានជានាយកសាលាអនុញ្ញាតឲ្យក្មេងប្រុសម្នាក់នេះ នាំលោកយាយរបស់ខ្លួនចូលរួមក្នុងកម្មវិធីសាលា ព្រោះថាជាទូទៅកម្មវិធីប្រភេទនេះ សិស្សមិនត្រូវបានអនុញ្ញាតឲ្យនាំនរណាម្នាក់ដែលមានអាយុលើសពី ២០ឆ្នាំ មកចូលរួមនោះទេ៕

ប្រភព៖ បរទេស

• ជំរុញទឹកចិត្ត