ខេត្តកំពង់ស្ពឺ ៖ យុវជនម្នាក់ត្រូវសមត្ថកិច្ចឃាត់ខ្លួន តាមពាក្យបណ្តឹងរបស់ឪពុកម្តាយខាងស្រី ដោយចោទប្រកាន់ថា ចាប់បង្ខាំងរំលោភកូនស្រីរបស់ខ្លួន តែត្រូវខាងប្រុសប្រាប់ថានាងមកនៅជាមួយខ្លួន ពិតមែនតែខ្លូនមិនបានប៉ះពាល់ ខ្លួនប្រាណនាងឡើយព្រោះយល់ថាពេលក្រោយ គង់ក្លាយជាប្តីប្រពន្ធនឹងគ្នា។
ការឃាត់ខ្លួននេះធ្វើឡើង កាលពីរសៀលថ្ងៃទី២៤ ឧសភា ២០១៧ នៅភូមិរលាំងជ័យថ្មី ឃុំពោធិចម្រើន ស្រុកបសេដ្ឋ ខេត្តកំពង់ស្ពឺ។ ចំណែកយុវជនជាប់សង្ស័យឈ្មោះ ចេង ឈុនលាង អាយុ២៤ឆ្នាំ ជាកម្មកររោងចក្រមានទីលំនៅ កន្លែងឃាត់ខ្លួនខាងលើ រីឯភាគីខាងស្រីមានឈ្មោះ ស្រីណាន អាយុ១៩ឆ្នាំ កម្មការិនីរោងចក្រជាមួយគ្នា មានទីលំនៅភូមិពោធិកណ្តាល ឃុំពោធិអង្ក្រង ស្រុកបសេដ្ឋ ខេត្តកំពង់ស្ពឺ។
យុវជនជាប់ចោទពីបទបង្ខាំងរំលោភនេះ បានរៀបរាប់ថា រូបគេ និងនារីខាងលើបានបានរៀបរាប់ថា រវាងរូបគេ និងភាគីខាងស្រីគឺស្រលាញ់ ច្រើនខែមកហើយដោយគេសន្យាថា នឹងចូលស្តីដណ្តឹងនាងរៀបការ ជាប្តីប្រពន្ធពេញច្បាប់នៅពេលដែលគេសន្សំលុយបានច្រើនបន្តិចព្រោះ ពេលនេះជីវភាពគ្រួសាររបស់គេ កំពុងជួបការខ្វះខាត។
យុវជនជាប់ចោទបន្តថា គេមិនបានដឹងហើយក៏មាន បានហៅនារីជាគូស្នេហ៍ឲ្យវេចបង្វិចមករស់នៅជាមួយគេឡើយ លុះកាលពីថ្ងៃទី២២ ឧសភា ២០១៧ ស្រាប់តែនារីជាសង្សាបានវេចបង្វិចរត់ពីផ្ទះម្តាយនាងឡើងមករស់នៅលើផ្ទះជាមួយខ្លួនបើទោះជាឪពុកម្តាយខ្លួននិយាយឲ្យវិលត្រលប់ទៅផ្ទះវិញយ៉ាងណាក៏នាងមិនព្រមដែរ។
ជាងនេះទៅទៀតនៅពេលឪពុកម្តាយនាងបាននាំគ្នាហៅឲ្យនាងវិលត្រលប់ទៅផ្ទះវិញយ៉ាងណាក៏នាងមិនព្រមទៅដែរ មិនតែប៉ុណ្ណោះពេលឪពុកម្តាយនាងមកតាមហៅនាងបានរត់ចូលទៅពួនក្នុងបន្ទប់ទឹកដើម្បីគេចឪពុកម្តាយរបស់នាងទៀតផង។ មុនពេលរូបគេត្រូវចាប់ខ្លួនឪពុកម្តាយនាងបានមកតាមម្តងទៀងហើយនិយាយចោទប្រកាន់រូបគេថាពង្រត់ និងបង្ខាំងកូនស្រីរបស់ខ្លួនមិនឲ្យទៅផ្ទះ។
ពេលនោះដែរនាងក៏បាននិយាយអង្វរម្តាយឪពុកនាងដែរ ដោយប្រាប់ថាពួកគេស្រលាញ់គ្នាហើយភាគីខាងប្រុសមិនបានចាប់ពង្រត់នាងឡើយគឺនាងស្ម័គ្រចិត្តមករស់នៅជាមួយគ្នាដោយគ្មានការបង្ខិតបង្ខំពីភាគីខាងប្រុសឡើយ។ ស្រាប់តែនៅថ្ងៃទី២៤ ឧសភា ២០១៧ រូបគេត្រូវសមត្ថកិច្ចចាប់ខ្លួនដោយចោទពីបទបង្ខាំងរំលោភទៅវិញ។
យុវជនជាប់ចោទបន្តថា អំឡុងពេលនាងមករស់នៅជាមួយខ្លួនគឺគេមិនដែលប៉ះពាល់ខ្លួនប្រាណនាងឡើយព្រោះគេយល់ថាមិនយូរនោះទេពួកគេនឹងក្លាយជាប្តីប្រពន្ធស្របច្បាប់នឹងគ្នាដូច្នេះបើរង់ចាំយូរបន្តិចក៏មិនទាស់ខុសអីដែរ។
បច្ចុប្បន្នយុវជនជាប់ចោទត្រូវបានសមត្ថកិច្ចកសាងសំណុំរឿងដើម្បីបញ្ជូនទៅកាន់សាលាដំបូងខេត្តចាត់ការបន្តតាមនីតិវិធី។ មជ្ឈដ្ឋានមហាជនដែលដឹងរឿងបានលើកឡើងថា មិនគួរណាឪពុកម្តាយខាងស្រីសម្រេចចិត្តធ្វើបែបនេះសោះគួររកវិធីដោះស្រាយណាមួយដែលសមស្រប ព្រោះកូនស្រីខ្លួនរត់ឡើងផ្ទះខាងប្រុសហើយខាងប្រុសមិនប៉ះពាល់ខ្លួនប្រាណនាងទៀតនេះចាត់ទុកថាយុវជនរូបនេះមានការគិតវែងឆ្ងាយហើយបើប៉ះចំអ្នកដែលគ្មានការគិតពិចារណាត្រឹមត្រូវនោះខ្លួនប្រាណក្មេងស្រីម្នាក់នេះប្រហែលជាមិនសល់នោះទេ។
ម្យ៉ាងរឿងដល់ដំណាក់កាលនេះទៅហើយចុងក្រោយមានតែការខាតបង់ពេលវេលា និងមាសប្រាក់ប៉ុណ្ណោះ ចំណែកអ្នកដែលចំណេញគ្មានអ្នកណាក្រៅពីតុលាការឡើយ ដូច្នេះហើយសូមអាណិតក្មេងដែលស្រលាញ់គ្នាផង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
