បុរសពីងពាងដ៏ក្លាហាន ហ៊ានប្រថុយជីវិត ចុះតាមភ្នំខ្ពស់ៗរើសសំរាម ដែលអ្នកទេសចរបោះចោល (មានវីដេអូ)

ចិន៖ ជារៀងរាល់ឆ្នាំមានអ្នកទេសចរដែលជាជនជាតិចិន រាប់លាននាក់បាននាំគ្នាទៅលេងភ្នំដ៏ពិសិដ្ឋមួយ នៅតំបន់ជនបទក្នុងប្រទេសចិន ហើយការសម្អាតតំបន់នោះឲ្យមានសភាពស្អាត គ្មានសំរាម គឺជារឿងដ៏ពិបាកមួយ ប៉ុន្តែសំណាងល្អ ដែលក្រុមសម្អាតមនុស្សពីងពាង ចូលខ្លួនមកជួយដោះស្រាយបញ្ហា។

យោងតាមសារព័ត៌មាន Oddity Central បានចុះផ្សាយថា ពួកគេបានសម្រេចចិត្តធ្វើការទាំងនេះ ដោយប្រថុយជីវិតជារៀងរាល់ថ្ងៃ គឺត្រូវចងខ្សែទម្លាក់ខ្លួនតាមចំណោតថ្មភ្នំខ្ពស់ៗ ចុះទៅរើសសំបកដបប្លាស្ទិច ស្បោង និងសំរាមជាច្រើនទៀត ដែលអ្នកទេសចរទៅលេងទីនោះ នាំគ្នាបោះចោលដោយគ្មានសណ្តាប់ធ្នាប់។

រហ័សនាម អ្នកសម្អាតមនុស្សពីងពាងនេះ ត្រូវបានគេដាក់ឲ្យ ក៏ព្រោះតែការងាររបស់ពួកគេ ជាការងារដ៏ពិបាកមួយ ខណៈមានរូបភាពជាច្រើនត្រូវបានគេបង្ហោះលើបណ្តាញសង្គមចិន បង្ហាញឲ្យឃើញពីការងាររបស់ពួកគេ ដែលត្រូវតោងខ្សែនៅលើជំរាលភ្នំ ដែលមានកម្ពស់រាប់រយម៉ែត្រពីដី។ 

សម្រាប់ការព្យាយាមធ្វើការក្នុងសភាពគ្រោះថ្នាក់បែបនេះ អាចនឹងធ្វើឲ្យអ្នកទេសចរដែលបានមកលេងតំបន់ភ្នំនេះ គិតសាជាថ្មីម្តងទៀត មុនពេលដែលពួកគេសម្រេចចិត្តបោះសំរាមចោលផ្តេសផ្តាស។ ហើយមានអ្នកសម្អាតមួយចំនួន ពេលខ្លះពួកគេបានផ្លាស់ប្តូរសម្លៀកបំពាក់ឯកសណ្ឋានការងារ មកពាក់អាវឈុតមនុស្សពីងពាង ដូចជាក្នុងភាពយន្ត ដោយការធ្វើបែបនេះ គឺដើម្បីទាក់ទាញចំណាប់អារម្មណ៍អ្នកទេសចរ ឲ្យបានដឹងពីទុកលំបាកក្នុងការប្រមូលសំរាមរបស់ពួកគេ។

សម្រាប់ប្រព័ន្ធផ្សព្វផ្សាយនៅក្នុងប្រទេសចិន ជាញឹកញាប់ ពួកគេតែងតែបង្ហាញ ក្រុមអ្នកសម្អាតមនុស្សពីងពាងនេះ ហើយចាត់ទុកពួកគេថា ជាវីរបុរស និងសម្រាប់ហេតុផលដ៏ល្អ ក៏ព្រោះតែពួកគេហ៊ានប្រថុយជីវិត គ្រប់ពេលវេលាដែលពួកគេចុះទៅរើសសំរាម៕ 

ប្រភព៖ OddityCentral

• បរិស្ថាន