រាជធានីភ្នំពេញ ៖ ខណៈដែលតារាល្បី និងកីឡាករកីឡាការិនីល្បីភាគច្រើន ត្រូវគេឃើញចុះកុងត្រាលក់ម៉ោង ឱ្យកម្មវិធីមួយរបស់ទូរទស្សន៍ Nice TV ដោយយល់ព្រមLiveពីនេះពីនោះក្នុងមួយខែពី ២០ទៅ៤០ម៉ោង ដើម្បីឱ្យកម្មវិធីនោះមានប្រជាប្រិយនៅកម្ពុជាជាថ្នូរនឹង ទទួលបានប្រាក់ខែ និងប្រាក់រង្វាន់នោះ កីឡាការិនីល្បីឈ្មោះនាង ស៊ន សៀវម៉ី បែរជាអះអាងថា នាងមិនបានលក់ម៉ោងរបស់ខ្លួន ឱ្យកម្មវិធីនោះឡើយ ។
នាងថា ខ្លួនគ្រាន់តែជួយ Live ឡង់សេពីកម្មវិធីនោះរយៈពេល៣០នាទី ព្រោះតែមានការស្នើសុំប៉ុណ្ណោះ ចំណែករឿងកុងត្រាLive ឱ្យជាប្រចាំ គឺនាងមិនយល់ព្រមឡើយ បើទោះជាបានកម្រៃជាថ្នូរខ្ពស់ក៏ដោយ ។
មន្ត្រីពីទូរទស្សន៍ Nice TV បានអះអាងថា កម្មវិធីដែលមានឈ្មោះ Tutu Live របស់ខ្លួន កាន់តែមានការពេញនិយមខ្លាំងនៅលើប្រព័ន្ធបច្ចេកវិទ្យា ដោយកម្មវិធីមួយនេះមានទម្រង់ដូចគ្នានឹង Bigo Live ដូច្នេះដែរ ។ ហេតុផលដែលកម្មវិធីនេះទទួលបានការពេញនិយម គឺដោយសារតែ Tutu Live ទាក់ទាញបុគ្គលល្បីៗកាន់តែច្រើនឱ្យចំណាយពេលបន្តផ្ទាល់ និយាយពីនេះពីនោះដើម្បីទាក់ទាញអ្នកចូលទស្សនា ដោយទទួលបានប្រាក់កម្រៃពីការចំណាយពេលវិញ ។
មន្ត្រីដដែលនិយាយថា រាល់តារា និងបុគ្គលល្បីឈ្មោះ ឱ្យតែត្រូវបានក្រុមហ៊ុនកុងត្រាឱ្យLive នឹងទទួលបានប្រាក់ខែជាប្រចាំ ហើយទទួលបានប្រាក់រង្វាន់រាប់មិនអស់ផ្សេងទៀតដែលអ្នកចូលទស្សនាផ្ដល់ឱ្យជារង្វាន់នៅពេលពួកគេពេញចិត្តចំពោះការនិយាយរបស់បុគ្គលល្បីៗទាំងនោះក្នុងពេលLive ។
យោងតាមកម្មវិធី តារាល្បីៗជាច្រើនរួមមានតារាថៃ ហុងកុង កូរ៉េ និងចិន សុទ្ធតែបានកុងត្រាផ្សព្វផ្សាយបន្តផ្ទាល់ពីខ្លួននៅក្នុងកម្មវិធីនេះទាំងអស់ ។ តាមការបង្ហើប តារាល្បី ឬបុគ្គលល្បី ត្រូវកំណត់ចំណាយពេល Live ក្នុងមួយខែយ៉ាងតិច២០ម៉ោងដើម្បីទទួលបានប្រាក់ខែពី៣០០ទៅ៥០០ដុល្លារ និងតារា ឬបុគ្គលដែលមិនសូវល្បីឈ្មោះត្រូវកំណត់ឱ្យ Live រហូតដល់មួយខែ៤០ម៉ោង និងទទួលប្រាក់ខែពី២០០ទៅ៣០០ដុល្លារ ។
យោងតាមការប្រកាសដដែល តារាសិល្បៈខ្មែរ និងអ្នកល្បីៗក៏មិនតិចនាក់ដែរ ត្រូវគេឃើញក្លាយជាតារាប្រចាំនៅក្នុងកម្មវិធីនោះ ដោយក្រៅពីទទួលបានប្រាក់ខែ ក៏ទទួលបានពិន្ទុពីអ្នកទស្សនាដែលអាចប្ដូរជាប្រាក់ពីក្រុមហ៊ុនផងដែរ ។ មានការបញ្ជាក់ថា កម្មវិធីនេះហ៊ានជួលតារា និងបុគ្គលល្បីៗឱ្យ Live ដោយទទួលបានប្រាក់ខែ គឺដោយសារតែអ្នកលេងក្នុងកម្មវិធី Tutu Live ត្រូវគេកំណត់ឱ្យយកលុយទៅទិញពិន្ទុ ដោយពិន្ទុទាំងនោះត្រូវពួកគេផ្ដល់ឱ្យតារាណាម្នាក់ដែលពួកគេស្រឡាញ់ពេញចិត្ត ធ្វើឱ្យក្រុមហ៊ុនទទួលផលចំណេញ ។ អ៊ីចឹងហើយទើបកីឡាការិនី ស៊ន សៀវម៉ី ធ្វើឱ្យគេយល់ច្រឡំ ដោយសារតែនាងបាន Live នៅក្នុងកម្មវិធីនោះកាលពីប៉ុន្មានថ្ងៃមុន។
ស៊ន សៀវម៉ី និយាយថា នាងពិតជាបានចំណាយពេលដល់ជាងកន្លះម៉ោង Live ដើម្បីទាក់ទាញអ្នកគាំទ្រនៅក្នុងកម្មវិធីរបស់ទូរទស្សន៍ Nice TV ប្រាកដមែន ប៉ុន្តែនាងថាខ្លួនគ្រាន់តែត្រូវបានមន្ត្រីរបស់ទូរទស្សន៍នោះ អញ្ជើញជាតារាកិត្តិយសដើម្បីជួយឱ្យកម្មវិធីនោះមានការទាក់ទាញប៉ុណ្ណោះ។ កញ្ញាថា ខ្លួនមិនទទួលយកការងារកុងត្រាជាមួយទូរទស្សន៍នោះឡើយ បើទោះជាត្រូវទទួលបានមួយខែ៥០០ដុល្លារ ឬ១០០០ដុល្លារបន្ថែមក៏ដោយ ។
នាងថា ខ្លួនមិនចូលចិត្ត Live រយៈពេលច្រើនម៉ោង និងម្យ៉ាងអត់មានពេលផង ។ នាងនិយាយថា៖ «ខ្ញុំចូលកម្មវិធីគាត់ជាតារាកិត្តិយសតើ បើឱ្យទៅកុងត្រាមួយខែ២០ម៉ោងឬ៤០ម៉ោងអី អត់ទេ រកអីនិយាយអត់បានទេ ហើយសំខាន់ខ្ញុំហាត់រាល់ថ្ងៃមានពេលឯណាទៅLiveអ៊ីចឹង!»។
ខ្លួនមិនចាប់អារម្មណ៍នឹងការងារកុងត្រានោះទេ ដោយសារតែការ Live រយៈពេលយូរៗ មិនមែនជាចំណូលចិត្តរបស់ខ្លួន ។ នាងថា ខ្លួនរវល់ហ្វឹកហាត់ត្រៀមខ្លួនទៅប្រកួតតេក្វាន់ដូកម្រិតពិភពលោកនៅក្នុងប្រទេសកូរ៉េនៅពាក់កណ្ដាលខែមិថុនា ខាងមុខ ទើបមិនចាប់អារម្មណ៍ចំពោះការលក់ម៉ោងរបស់ខ្លួនទៅឱ្យកម្មវិធីណាទេ បើទោះជាកេរ្តិ៍ឈ្មោះរបស់នាងជាការចង់បានរបស់ផលិតករទូរទស្សន៍ ដែលបានទិញសិទ្ធិកម្មវិធី Tutu Live យកមកប្រើនៅកម្ពុជាក្ដី ។
នាងនិយាយថា ខ្លួនរវល់ណាស់ រាល់ថ្ងៃអត់មានពេលហូបបាយបានត្រង់មាត់ផង ទើបមិនចូលចិត្តតែម្ដងក្នុងការងារទាំងឡាយណាដែលពាក់ព័ន្ធនឹងការផ្សាយបន្តផ្ទាល់ពីសកម្មភាពរបស់ខ្លួន ដើម្បីទាក់ទាញអ្នកគាំទ្រ ។
ក្នុងនោះបើទោះជាការប្រកួតរបស់នាងត្រូវបញ្ចប់ ហើយមានពេលសម្រាកបានច្រើនជាងនេះ ក៏នាងប្រាប់ថាមិនទទួលការងារបែបនេះដែរ ។ មិនខុសគ្នាដែរ តារាមួយចំនួន និងកីឡាករល្បីឈ្មោះមួយចំនួនក៏បានប្រកាសច្រានចោលមិនទទួលកម្មវិធីនេះដែរ ដោយសារតែ Tutu Live មានគោលការណ៍មិនឱ្យតារា ឬអ្នកកុងត្រានិយាយផ្សព្វផ្សាយពីផលិតផល ដោយតម្រូវឱ្យតែនិយាយលេងសើច និងធ្វើសកម្មភាពប្លែកៗឱ្យអ្នកទស្សនាសប្បាយៗ ដើម្បីទទួលបានពិន្ទុ និងរង្វាន់ដែលអាចដូរជាប្រាក់ ។
ពិន្ទុ និងប្រាក់រង្វាន់នេះ ៣០ភាគរយបានទៅលើសាមីខ្លួន និង៧០ភាគរយបានទៅលើក្រុមហ៊ុន ដោយតារាដែលមានពេលទំនេរច្រើន គេចាប់អារម្មណ៍នឹងកម្មវិធីនេះច្រើន លើកលែងតែស៊ន សៀវម៉ី ដែលអះអាងថា មិនចាប់អារម្មណ៍ ទោះបានLive ម្ដងនៅក្នុងកម្មវិធីនេះក្ដី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]