រាជធានីភ្នំពេញ ៖ អ្នកនាងយក់ ឋិតរដ្ឋា ពេញចិត្តការសម្តែងភាពយន្តណាស់ដែរ ដោយគិតថា បើមានពេលវេលាល្អ នាងអាចចូលរួមសម្តែង ខណៈទីផ្សារភាពយន្តងើបឡើង ។
តារាចម្រៀងអ្នកនាងយក់ ឋិតរដ្ឋា បានតាំងជំហរថា ប្រសិនបើអាចនាងនឹងសម្តែងភាពយន្តឲ្យបានច្រើនគ្រាដែលនាងកំពុងមើលឃើញថាទីផ្សារភាពយន្តខ្មែរកំពុងរីកឡើងជាលំដាប់ ។ យក់ ឋិតរដ្ឋា មានគោលគំនិតបែបនេះព្រោះតែយល់ថា នាងធ្លាប់សម្តែងភាពយន្តបានប៉ុន្មានរឿងដែរ កាលពីអំឡុងពេលនាងកំពុងពេញល្បីនិងមិនទាន់រៀបការ ។ ស្របពេលការងារសម្តែងភាពយន្តកាន់តែសម្បូរ និងប្រាក់កម្រៃលើសពីសម័យមុន ធ្វើឲ្យយក់ ឋិតរដ្ឋា ចង់សាកល្បងបង្ហាញទេពកោសល្យសម្តែង ។
អ្នកនាងយក់ ឋិតរដ្ឋា កាលពីពេល ថ្មីៗកន្លងមកនិយាយថា «ការសម្តែងភាពយន្តនាងខ្ញុំមានចំណូលចិត្តនិងចង់បង្ហាញស្នាដៃនៃការសម្តែងនេះផងដែរ ដោយយល់ថាទីផ្សារភាពយន្តនៅកម្ពុជាយើងសព្វថ្ងៃមានការរីកលូតលាស់ល្អ រាប់ទាំងប្រភេទបច្ចេកទេស និងកាម៉ារ៉ាក៏មើលទៅអាចប្រជែងជាមួយគេឯងបានដែរ ។ ដូចដឹងហើយពីមុនមិនត្រឹមតែបានច្រៀងជាតារាចម្រៀងនោះទេ នាងខ្ញុំក៏ធ្លាប់សម្តែងកុនជាខ្សែភាពយន្តបានប៉ុន្មានរឿងដែរ ទើបគិតថាអាចទៅរួច បើទោះជាខកខានយូរក៏អាចសម្តែងបាន ព្រោះថតរឿង និងខារ៉ាអូខេមិនសូវជាខុសគ្នាប៉ុន្មាននោះទេ ប្រហាក់ប្រហែលគ្នាច្រើនដែរ ។
ទោះបីជាយ៉ាងណាក៏ដោយ ការងារសម្តែងកុននេះអាច ស្ថិតលើពេលវេលាគ្រប់គ្រាន់ ប្រសិនបើមានពេលនាងសម្តែងតែបើអត់ពេលទុកឲ្យអ្នកអាជីពគេបន្តការងារនេះសិនចុះ ព្រោះនាងខ្ញុំត្រូវមានបទចម្រៀង ថ្មីៗជាច្រើនទៀតសម្រាប់ថតឱ្យផលិតកម្មថោន និងរៀនស្ទីលបញ្ចេញក្បាច់រាំ ថ្មីៗទៀតដើម្បីបង្ហាញអ្នកគាំទ្រ និងដើម្បីឲ្យមើលទៅសមសួនជាតារាចម្រៀង ព្រោះនាងខ្ញុំមានក្រុមរាំនឹងគេដែរសម្រាប់ឡើងឆាកហើយទាល់តែមានការរាំ ប្លែកៗៗទើបល្អភ្នែកអ្នកទស្សនា ។
ក្រៅពីនេះនាងខ្ញុំក៏ត្រូវចំណាយពេលមើលថែរកូន និងស្វាមី ព្រមទាំងមុខរបរប្រចាំថ្ងៃទើបមិនទាន់គិតថា សម្តែងបាន ឬអត់ តែចិត្តពិតជាចង់ជួយលើកស្ទួយវិស័យភាពយន្តខ្មែរយើងដូចបណ្តាសិល្បករមួយចំនួនផងដែរ ព្រោះទាំងនេះសុទ្ធតែជាសិល្បៈ និងផ្តល់កិត្តិយសឲ្យយើងដូចគ្នាមិនថា តែបទចម្រៀងនោះទេ » ។
ចាប់តាំងពីចូលផលិតកម្មថោនមក យក់ ឋិតរដ្ឋា មានកេរ្តិ៍ឈ្មោះងើបឡើងវិញព្រោះមានបទចម្រៀង ល្អៗប្រជែងតារាឯទៀត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]