(កំពត)៖ ស្ដ្រីម្នាក់ទើបសម្រាលកូនបាន៦ថ្ងៃ និងបក្ខពួក២នាក់ ឆ្លៀតឱកាសលក់ថ្នាំញៀនក្នុងមន្ទីរពេទ្យបង្អែក ហើយក៏ត្រូវនគរបាលឆ្លៀតឱកាសបង្ក្រាបបានផងដែរ។

ប្រតិបត្តិការបង្ក្រាបនេះ ត្រូវធ្វើឡើងនៅល្ងាចថ្ងៃទី២៥ ខែមេសា ឆ្នាំ២០១៧នេះ ស្ថិតក្នុងមន្ទីរពេទ្យបង្អែកខេត្តកំពត នៅភូមិកំពង់បាយខាងត្បូង សង្កាត់កំពង់បាយ ក្រុងកំពត។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត បានបញ្ជាក់ថា ស្ដ្រីជនសង្ស័យដែលកម្លាំងបង្ក្រាបបាននេះ ឈ្មោះ ធី កញ្ញា អាយុ៣១ឆ្នាំ រស់នៅភូមិក្រោលគោ ខេត្តស្វាយរៀង ហើយទើបសម្រាលកូនបាន៦ថ្ងៃតែប៉ុណ្ណោះប៉ុន្តែឆ្លៀតលក់គ្រឿងញៀននៅក្នុងពេទ្យទៀត។ ដោយឡែកបក្ខពួក២នាក់ទៀត ឈ្មោះ ឈុន សេងហូង ភេទស្រី អាយុ៣៤ឆ្នាំ និងឈ្មោះ លីវ ស៉ីវ៉ា ភេទប្រុស ជនជាតិចិន អាយុ៥០ឆ្នាំ ស្នាក់នៅសង្កាត់ផ្សារថ្មី រាជធានីភ្នំពេញ។

លោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកម្រិតស្រាល បានបន្ថែមថា ក្នុងប្រតិបត្តិការនេះ កម្លាំងជំនាញដកហូតបាន វត្ថុតាងថ្នាំញៀន ០៨កញ្ចប់ និងសម្ភារ:ពាក់ព័ន្ធមួយចំនួនទៀត។

បច្ចុប្បន្នជនសង្ស័យទាំងបីនាក់ ត្រូវបានបញ្ជូន​​ទៅការិយាល័យគ្រឿងញៀនខេត្ត ដើម្បីកសាងសំណុំរឿង​ ចាត់ការតាមនីតិវិធី​៕

ប្រភព៖ Fresh News

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]