រាជធានីភ្នំពេញ ៖ តារាកំប្លែងអ្នកស្រីណយ សំណាង ហៅយាយណាង សប្បាយចិត្តដែលបានផ្ទះថ្មរស់នៅមិនបានប៉ុន្មានផង បែរជាធ្លាក់ខ្លួនឈឺធ្វើឱ្យគាត់ខ្វល់ខ្វាយចិត្តវិញ ។
យាយណាងទទួលបានផ្ទះមួយល្វែងមាន២ជាន់ នៅក្រោយវត្តសន្សំកុសល ជាអំណោយរបស់សប្បុរសជន ក្រោយពីគាត់ប្រឡូកសិល្បៈរាប់ឆ្នាំគ្មានសល់អ្វីសោះនោះ ។ ចូលស្នាក់នៅផ្ទះថ្មីយាយណាងមានតែរបស់របរតិចតួចប៉ុណ្ណោះ ក្រៅពីនេះតុ ទូ កៅអី ពូក គ្រែ មុង ភួយ ទូចាន ត្រូវសប្បុរសជនរៀបចំជូនមិនឱ្យខ្វល់ចិត្តទេ ។
យាយណាងនិយាយថា «ឱលោកអើយ !ធ្វើការសិល្បៈជិតស្លាប់ទៅវិញហើយមិនធ្លាប់គិតថាមានផ្ទះនៅស្រួលចិត្តដូចពេលនេះឡើយ ពិតជាទឹកចិត្តមួយវិសេសវិសាលសម្រាប់ខ្ញុំក្នុងការទទួលបានផ្ទះនេះណាស់ ។ ទោះបីជាយ៉ាងណាក្តី ខ្ញុំពិតជាឆ្ងល់មិនដឹងជាចង្រៃអីជំងឺមកបៀតបៀនមិនចប់សោះ ។ បានផ្ទះនៅស្រួលមានគេអាណិតជួយផ្តល់អំណោយ ផ្សេងៗសម្រាលទុក្ខឱ្យស្បើយហើយ បែរជាមករកាំចិត្តរឿងមានជំងឺ ផ្សេងៗអត់ចេះស្វាងសោះ ឈឺរហូតដើរមិនចង់រួចឡើយ» ។
យាយណាងទើបតែមកពីមន្ទីរពេទ្យនៅខេត្តសុរិន្ទ ដោយគ្រូពេទ្យឱ្យវះកាត់បេះដូងដាក់ថ្មក្នុងហេតុផលថាអាចរស់បាន១០ឆ្នាំទៀត តែបើមិនវះកាត់ទេ គឺយូរបំផុត២ទៅ៣ឆ្នាំ ។ ទោះជាយ៉ាងណាក្តី យាយណាងមិនហ៊ានវះកាត់ទេ។ ដូច្នេះហើយគាត់ថាមានតែសមាធិបន់ព្រះសំពះទេវតាសុំឱ្យជួយឃុំគ្រងគាត់ឱ្យមានកម្លាំងរឹងមាំឡើងវិញ ដើម្បីមើលថែខ្លួននិងកូនចៅ ព្រមទាំងមើលផ្ទះសម្បែង ។
លោកពេជ្រ កែវមុនី អភិបាលខណ្ឌមានជ័យបានទៅសួរសុខទុក្ខដល់គេហដ្ឋានរបស់យាយណាងផ្ទាល់ ព្រមទាំងបានផ្តល់ជូនប្រាក់១០០ដុុល្លារ អង្ករមួយបាវ ទឹកបរិសុទ្ធ ទឹកត្រី និងមី ។
លោកអភិបាលខណ្ឌបានផ្តាំផ្ញើឱ្យយាយណាងកុំគិតច្រើន ខិតខំពង្រឹងស្មារតីថែទាំសុខភាពព្រោះមានផ្ទះនៅមិនលំបាក កម្សត់នៅផ្ទះជួលដូចមុនទេ ។
លោកពេជ្រ កែវមុនី សម្តែងការពេញចិត្តចំពោះទេពកោសល្យយាយណាង ហើយចាត់ទុកគាត់ជាធនធានសិល្បៈបុរាណដ៏កម្រ ។
លោកអភិបាលខណ្ឌបានបន្តដំណើរទៅផ្តល់អំណោយមួយចំនួនទៀតដល់អ្នកស្រីវណ្ណ ថន តារាសម្តែងជើងចាស់ និងជាអនុប្រធានភូមិ សង្កាត់ទំនប់ទឹក ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
