អេស្ប៉ាញ៖ ពាក្យរិះគន់របស់អ្នកគាំទ្រមកកាន់ទម្រង់លេងរបស់ Lionel Messi ក្នុងក្រុមជម្រើសជាតិអាហ្សង់ទីន នៅតែបន្តមកទល់បច្ចុប្បន្ននេះ ខណៈម្ចាស់សាមីខ្លួន បានចេញមកបញ្ជាក់ថា ពាក្យរិះគន់ទាំងនោះមិនមានផលប៉ះពាល់អ្វីធំដុំទេសម្រាប់ខ្លួន។ នេះបើយោងតាមពាក្យសម្តីរបស់ Messi ថ្លែងកាន់សារព័ត៌មាន Esqurie របស់ប្រទេសអេស្ប៉ាញ។
ថ្លែងប្រាប់សារព័ត៌មាន Messi បានបញ្ជាក់ទៀតថា បើទោះជាមានការិះគន់យ៉ាងណាក៏ដោយ ក៏ខ្លួននៅតែបន្តខំប្រឹងលេងឲ្យក្រុមជម្រើសជាតិដដែល ពីព្រោះកីឡាករនីមួយៗសុទ្ធតែចង់បានជ័យជំនះជូនក្រុមរបស់ខ្លួន។
Messi បាននិយាយដូច្នេះថា «ពាក្យរិះគន់ដែលខ្ញុំទទួល គឺមិនមែនជាអ្វីៗដែលខ្ញុំត្រូវខ្វល់នោះទេ ព្រោះខ្ញុំបានដឹងច្បាស់ពីរឿងដែលបានកើតឡើង» ។
Messi បន្តទៀតថា «ខ្ញុំយល់ច្បាស់ណាស់ថាអ្នកគាំទ្រតែងតែចង់ឲ្យយើងជោគជ័យ ជាពិសេសនោះ គឺឈ្នះបានពានរង្វាន់សម្រាប់ក្រុមជម្រើសជាតិ ប៉ុន្តែវាមិនងាយស្រួលនោះទេ ព្រោះមិនមែនតែយើងទេ ដែលចង់ឈ្នះនោះ ពោលគឺនៅមានក្រុមជម្រើសជាតិផ្សេងៗទៀត ដែលខំប្រឹងប្រែងចង់ឈ្នះ» ។
ពាក់ព័ន្ធនឹងរឿងពានរង្វាន់នេះដែរ Messi បានថ្លែងប្រាប់សារព័តមានឲ្យដឹងទៀតថា «ក្នុងចំណោមពានរង្វាន់ទាំងអស់ ពានដែលខ្ញុំឲ្យតម្លៃ និងមានសារៈសំខាន់ជាងគេ គឺមេដាយមាសអូឡាំពិក ឆ្នាំ២០០៨ ដែលក្រុមជម្រើសជាតិអាហ្សង់ទីនបានឈ្នះ នៅក្នុងទីក្រុងប៉េកាំង ប្រទេសចិន» ។
Messi បានប្រាប់ពីមូលហេតុថា «ព្រឹត្តការណ៍កីឡាអូឡាំពិក ៤ឆ្នាំមានម្តង ហើយមិនប្រាកដថា យើងបានលេងជាប់រហូតនោះទេ ព្រោះជាទូទៅក្រុមជម្រើសជាតិតែងតែផ្តល់សិទ្ធិខ្ពស់បំផុតទៅលើកីឡាករក្មេងៗ ឲ្យចូលរួមលេងកីឡាអូឡាំពិក» ។
គួរបញ្ជាក់ផងដែរថា ថ្មីៗនេះ ក្រុមជម្រើសជាតិអាហ្សង់ទីន កំពុងប្រឈមនឹងក្តីបារម្ភ មិនបានឡើងទៅលេង World Cup នៅឆ្នាំក្រោយ ដោយសារតែ Messi ជាប់ពិន័យ៤ប្រកួត ស្របពេលដែលក្រុមស្ថិតក្នុងចំណាត់ថ្នាក់លេខ៥ នៅក្នុងតារាង៕
ប្រភព៖ Dailymail
ដោយឡែក ព័ត៌មានគួរឲ្យចាប់អារម្មណ៍មួយផ្សេងទៀត៖ Ronaldo ដាក់លក់រថយន្ដដំបូងបំផុតរបស់ខ្លួន តម្លៃជាង ១ម៉ឺន៦ពាន់ដុល្លារ
ព័រទុយហ្គាល់៖ តារាឆ្នើមរបស់ក្លឹប Real Madrid កីឡាករ Cristiano Ronaldo ត្រូវបានគេស្គាល់ថាជាកំពូលកីឡាករបាល់ទាត់មួយរូបក្នុងពេលបច្ចុប្បន្ននេះ។
ចំនែកឯចំណូលរបស់ Ronaldo ដែលរកបានពីការប្រកបអាជីពបាល់ទាត់ កុងត្រាជាមួយក្រុមហ៊ុនផ្សេងៗ ក៏ដូចជាជំនួញរបស់គេ បានធើ្វឲ្យកីឡាកររូបនេះ ក្លាយជាបុរសដែលអាចរកចំណូលបានច្រើនជាងគេនៅក្នុងពិភពកីឡាផងដែរ។
Ronaldo ជាកីឡាករបាល់ទាត់ម្នាក់ដែលចូលចិត្ដលេងម៉ូតរថយន្ត ស្របពេលដែលរូបគេបានចំណាយទឹកប្រាក់រហូតដល់ទៅ ៥លានផោន (ជាង៦លានដុល្លារ) ក្នុងការទិញរថយន្តមួយចំនួនសម្រាប់ជិះលេងកម្សាន្ត។
យ៉ាងណាមិញ បើតាមអ្នករាយការណ៍បានឲ្យដឹងថា កីឡាករវ័យ៣២ឆ្នាំរូបនេះ បានសម្រេចចិត្តដាក់លក់រថយន្ដដំបូងបំផុតរបស់គេហើយ ក្នុងតម្លៃរហូតដល់ ១៣,៥០០ផោន (១៦,៨៤៥ដុល្លា) ។
គួរបន្ថែមទៀតផងដែរថា នេះគឺជារថយន្ដដែល Ronaldo បើកបរជាលើកដំបូង នៅពេលដែលរូបគេមកកាន់ក្លឹបបិសាចក្រហម Manchester United ។
បើយោងតាមប្រភពព័ត៌មាននៅក្នុងប្រទេសព័រទុយហ្គាល់ ឈ្មោះ Mutidesportos បានឲ្យដឹងថា រថយន្តរបស់ Ronaldo ត្រូវបានដាក់លក់ក្នុងគេហទំព័រ Standvirtual ដោយរថយន្តមួយគ្រឿងនេះ មានពណ៌ខៀវចាស់ ម៉ាក Audi S3 coupe ដែលរូបគេបានទិញនៅអាយុ១៨ឆ្នាំ អំឡុងពេលលេងឲ្យ Manchester United។
ប្រព័ន្ធផ្សព្វផ្សាយក្នុងប្រទេសព័រទុយហ្គាល់ដដែលបានអះអាងថា នេះគឺជារថយន្តដែលផលិតក្នុងប្រទេសអីុតាលី ហើយធ្លាប់បានធ្វើដំណើរអស់ចំនួន ១៦២០០០គីឡូរួចមកហើយ ខណៈដែលរថយន្តនេះមិនមែនជារតយន្តទីមួយទេ ដែល Ronaldo បានលក់នោះ ពោលគឺរូបគេធ្លាប់បានដាក់លក់ឡានមុនៗអស់ជាច្រើនគ្រឿងមកហើយ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
