រាជធានីភ្នំពេញ ៖ បើទោះជាបានក្លាយខ្លួន ជាកីឡាករប្រដាល់ដែលមានកេរ្តិ៍ឈ្មោះបោះសំឡេងម្នាក់ តែកីឡាករ ឡុង សុភី បានអះអាងថា លោកមិនភ្លេចអតីតកាលមុនពេលប្រឡូកការប្រដាល់នោះឡើយ ដោយសារតែក្នុងពេលនោះ លោកគ្រាន់តែជាក្មេងប្រុសម្នាក់ស្ថិត នៅក្នុងគ្រួសារខ្វះខាត ។ លោកបានរៀបរាប់ពីរឿងរ៉ាវជាច្រើន ដែលលោកប្រកាសថា មិនអាចបំភ្លេចបាន ។
ឡុង សុភី បញ្ជាក់ថា លោកបានប្រឡូកការប្រដាល់ ដំបូងបំផុតក្នុងវ័យ១៥ឆ្នាំ ដោយសារតែឃើញបងប្រុសលោក ទាំង៥រូបសុទ្ធតែជាអ្នកប្រដាល់ ហើយម្យ៉ាងលោកក៏ចង់បានលុយ និងចង់មានឱកាសឡើង មករស់នៅទីក្រុងភ្នំពេញ ។
លោកថា បងប្រុសលោកទាំង៥រូប ប្រឡូកការប្រដាល់គ្រប់គ្នាដោយសូម្បីតែអាជីពមួយនោះមិនមានចំណូល ខ្ពស់ដូចពេលបច្ចុប្បន្ន ។ លោកថា ខ្លួនពីដំបូងមិនមានចំណូលចិត្តចង់ប្រដាល់នោះទេ ដោយចាត់ទុកថាគ្រាន់តែ ចង់ឡើងប្រដាល់ដើម្បីបានស្គាល់ភ្នំពេញ ប៉ុន្តែបន្តបន្ទាប់មកលោក ក៏មានចំណូលចិត្ត ហើយតាំងចិត្តថា ត្រូវតែប្រឡូកការប្រដាល់រហូតមានឈ្មោះបោះសំឡេងតែម្ដង ។
លោកថា ក្នុងចំណោមបងប្អូន៧នាក់ មានប្រុស៦នាក់ សុទ្ធតែជាអ្នកប្រដាល់ទាំងអស់ មានតែលោក និងលោក ឡុង សាលវ័ន្តប៉ុណ្ណោះ ដែលប្រឡូកការប្រដាល់ ហើយមានឈ្មោះបោះសំឡេង ។ គ្រួសារលោកជាអ្នកបាត់ដំបង នៅភូមិស្វាយកោះ ឃុំអន្លង់វិល ស្រុកសង្កែ ខេត្តបាត់ដំបង ប៉ុន្តែលោកកើតនៅជំរំសាយធូជាប់ព្រំដែនថៃ ។
ឡុង សុភី បានរំលឹកថា ការប្រកួតលើកដំបូងលោកហ្វឹកហាត់តែមួយសប្ដាហ៍ប៉ុណ្ណោះតែបានវាយឈ្នះហើយទទួលបានតម្លៃខ្លួន៥ម៉ឺនរៀលធ្វើឱ្យលោកសប្បាយចិត្តចង់ហោះ និងចាយលុយនោះដោយការសន្សំសំចៃបំផុត បានរហូតដល់រយៈពេលមួយខែព្រោះតែការស្រឡាញ់លុយដែលជាញើសឈាមនោះផង ។
លោកនៅតែយល់ឃើញថា ប្រាក់៥ម៉ឺនរៀល ដែលខ្លួនរកបានពីការប្រដាល់លើកដំបូង គឺជាកម្លាំងចិត្តមិននឹកស្មានដល់នៅក្នុងជីវិត ដែលធ្វើឱ្យលោកឈានឡើងនៅក្នុងអាជីពប្រដាល់នាពេលបន្តបន្ទាប់ផងដែរ ។
លោកបានចាប់ផ្ដើមល្បីឈ្មោះ កាន់តែខ្លាំងកាលពីឆ្នាំ២០១០ ដោយសារតែបានឡើងប្រកួតជាលក្ខណៈអន្តរជាតិ និងដណ្ដើមបានខ្សែក្រវាត់ជើងឯកជាបន្តបន្ទាប់ចំនួន៦ ដោយមិនទាន់រាប់បញ្ចូលពានជើងឯក មេដាយមាស ប្រាក់ និងមេដាយជើងឯកដែលបញ្ជាក់ពីភាពខ្លាំងក្លារបស់ខ្លួននៅឡើយផង ។
ចំពោះប្រាក់តម្លៃខ្លួន និងប្រាក់រង្វាន់ថ្វីដ្បិតថា មិនធ្វើឱ្យលោកមានបាន តែក៏ជួយឱ្យលោកបានស្គាល់ប្រាក់ដុល្លារ និងមានម៉ូតូជិះបានសមរម្យជាមនុស្សម្នាក់ផងដែរ បើធៀបនឹងស្ថានភាពរស់នៅរបស់លោក កាលពីមុនពេលចូល ប្រដាល់គឺគ្រួសារខ្វះមុខខ្វះក្រោយ។
លោកប្រកួតឈ្នះខ្សែក្រវាត់ដំបូងគេ ក្នុងប្រភេទទម្ងន់៦០គីឡូក្រាម ដោយទទួលបានម៉ូតូមួយគ្រឿងជារង្វាន់ ដែលមានតម្លៃបំផុត សម្រាប់ជីវិតលោក ដោយសារតែលោកមិនមានលទ្ធភាពទិញម៉ូតូជិះនោះ ។
ឆ្នាំ២០០៨ គឺជាឆ្នាំដែលលោកយល់ថា ខ្លួនឯងឈានឡើងដោយសារតែក្នុងពេលនោះកីឡាករ វ៉ាន់ ចាន់វ៉េត បានក្លាយជាកីឡាករល្បី និងខ្លាំង តែលោកអាចយកស្មើពិន្ទុបាន ក្នុងពេលដែលកីឡាករផ្សេងទៀតឱ្យតែប៉ះ វ៉ាន់ ចាន់វ៉េត នៅក្នុងពេលនោះ គឺរមែងសន្លប់ ។
កីឡាករ ឡុង សុភី បញ្ជាក់ថា លោកសិក្សាបានត្រឹមតែថ្នាក់ទី៧នៅស្រុកកំណើតប៉ុណ្ណោះ ដោយសារតែជីវភាពនាអតីតកាលខ្វះព្រឹកខ្វះល្ងាច និងចង់រកលុយពីការប្រដាល់។ លោកសារភាពថា ក្រោយទទួលបានខ្សែក្រវាត់ ជើងឯកបន្តបន្ទាប់ លោកមានសល់ទ្រព្យរបស់គួរសម ប៉ុន្តែមកពីលោកមាន បញ្ហារង្គោះរង្គើស្នេហាទី១ ដោយបន្សល់ទុកនូវកូន២នាក់ ទើបលោកនៅតែសល់សំបកខ្លួន ដោយសារតែលោកចុះចេញដោយមិនយកអ្វី មកជាមួយទាំងអស់ គឺទុកចែកកេរឱ្យកូន និងចង់កសាងជីវិតជាថ្មីដោយបាតដៃទទេ ។
លោកថា ខ្លួនមានកូនប្រុស-ស្រី ២នាក់ ជាមួយភរិយាមុន តែលោកមិនបានបោះបង់កាតព្វកិច្ចនោះទេ បើទោះជាលោកបានរៀបការភរិយាថ្មី ហើយភរិយាក្រោយក៏ទើបនឹងពពោះ៤ខែ ។ លោកកើតនៅឆ្នាំ១៩៨៨ និងបានរៀបការជាមួយភរិយាមុន កាលពីឆ្នាំ២០០៨ តែដោយសារតែការរស់នៅមិនចុះសម្រុងគ្នា ទើបធ្វើឱ្យបាក់បែកគ្នាកណ្ដាលទី។
លោកសម្រេចចិត្តរៀបការជាលើកទី២ កាលពីពេលថ្មីៗកន្លងទៅនេះ និងបានប្រកាសថាកំពុងរៀបគម្រោងបើកហាង លក់បាយមួយក្រោយ ពេលភរិយាសម្រាលកូនរួច ។ បើទោះជាអាជីពនេះ មានការពិបាក តែលោកប្រកាសថា នឹងឱ្យកូនៗរបស់ខ្លួនបន្តអាជីពប្រដាល់បើកូនណាម្នាក់ របស់លោកមាននិស្ស័យនឹងអាជីពនេះ ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
មានដឹងអត់ ថាហេតុអ្វីបានជាពហុកីឡដ្ឋានជាតិមរតកតេជោ មានរាងដូចសំពៅ?
ភ្នំពេញ៖ ពហុកីឡដ្ឋានជាតិមរតកតេជោដំណាក់កាលទី១ ត្រូវបានសម្ពោធដាក់ឲ្យប្រើប្រាស់ជាផ្លូវការណ៍ហើយ កាលពីព្រឹកថ្ងៃទី០៤ ខែមេសា ឆ្នាំ២០១៧នេះ ក្រោមអធិបតីភាពរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃ ព្រះរាជាណាចក្រកម្ពុជា។
ស្របពេលជាមួយគ្នានេះដែរ សម្ដេច ក៏បានប្រកាសបើកការសាងសង់ ពហុកីឡដ្ឋានជាតិមរតកតេជោរដំណាក់កាលទី២ ផងដែរ ដែលជាគម្រោងធំ សាងសង់កីឡដ្ឋានបាល់ទាត់។
ថែ្លងក្នុងពិធីសម្ពោធដាក់ឲ្យប្រើប្រាស់នេះ សម្ដេចតេជោ បានលើកឡើងឲ្យដឹងថា មូលហេតុបានជាពហុកីឡដ្ឋានជាតិនេះ មានរាងដូចសំពៅ ព្រោះតែ វាបង្ហាញនូវការទំនាក់ទំនងទៅមក រកគ្នា រវាងប្រទេសកម្ពុជា នឹងសាធារណរដ្ឋប្រជាមានិតចិន ។
សម្ដេចបានបន្ដថា «ប្រវត្ដិសាស្រ្ដដើមរបស់កម្ពុជា ប្រទេសក្នុងតំបន់ ក៏ដូចជាប្រទេសចិនក្ដី គឺធើ្វដំណើរតាមសំពៅ ដើម្បីធើ្វពាណិជ្ជកម្មជាមួយគ្នា ខណៈដែលទំនាក់ទំនងរវាង កម្ពុជា នឹង ចិន មានតាំងពីបុរាណកាលមកម្លេះ»។
គួរបញ្ជាក់ផងដែរថា ពហុកីឡដ្ឋានជាតិមរតកតេជោដំណាក់កាលទី១នេះ គឺជាជំនួយឥតសំណងរបស់រដ្ឋាភិបាលចិន ហើយចំពោះការបើកការដ្ឋានសាងសង់ដំណាក់កាលទី២នេះ ក៏ជាជំនួយឥតសំណងរបស់ចិន ដូចគ្នាផងដែរ។
ពហុកីឡាដ្ឋានស្ដង់ដាអន្ដរជាតិ ដំណាក់កាលទី១ ដែលនឹងត្រៀមធើ្វជាម្ចាស់ផ្ទះកីឡាស៊ីហ្គេមឆ្នាំ២០២៣ នេះ គឺមានចំនួន ២អាគារ គឺអគារទី១ ជាទីលានហែលទឹកកម្រិតស្តង់ដារអន្តរជាតិ និងបំពាក់ដោយសម្ភារៈទំនើបទាន់សម័យបំផុត ស្របពេលដែល អគារទី២ គឺជាអាគារនៃទីលានកីឡាបាល់ទះ កីឡាបាល់បោះ ព្រមទាំងកីឡាក្នុងសាលផ្សេងៗទៀតផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
