តាមការពិត ផលិតផលគ្រឿងសម្អាង ៨ ប្រភេទនេះ គ្មានប្រសិទ្ធភាពក្នុងការប្រើប្រាស់ ដូចដែលអ្នកធ្លាប់គិតឡើយ!

ដើម្បីចង់បានសម្រស់ស្រស់ស្អាត អ្នកប្រាកដជា ចំណាយលុយច្រើនណាស់ ទៅលើផលិតផលគ្រឿងសម្អាងផ្សេងៗ។ ប៉ុន្តែ ថ្ងៃនេះយើងនឹងលើកយក ផលិតផលមួយចំនួន ដែលគ្មានប្រសិទ្ធភាពក្នុងការប្រើប្រាស់ និយាយរួមគឺ គ្មានប្រយោជន៍ ជូនប្រិយមិត្តអ្នកអាន ដើម្បីការពារ ការចំណាយលុយកាក់ខ្ជះខ្ជាយមិនបានការ។

តោះទៅតាមដានទាំងអស់គ្នា ដូចខាងក្រោមនេះ ៖

១. ផលិតផលព្យាបាលសក់បែកចុង ៖ ជឿចុះថា គ្មានអ្វីដែលអាចដោះស្រាយបញ្ហាសក់បែកចុងនេះបានទេ មិនថាសេរ៉ូម ឬប្រេងបែបណាឡើយ។ វីធីតែមួយគត់ ដែលអាចកម្ចាត់សក់បែកចុងបានគឺ កាត់សក់។ 

២. គ្រីមលាបដៃ គ្រីមលាបជើង និងឡេលាបស្បែក ៖ ថ្វីត្បិតតែគ្រីមឬឡេ មានច្រើនប្រភេទ សម្រាប់លាបផ្សេងៗគ្នាពិតមែន ប៉ុន្តែវាគ្រាន់តែជាយុទ្ធសាស្រ្តទីផ្សារប៉ុណ្ណោះ។ ជាក់ស្តែង អ្នកអាចប្រើឡេតែមួយប្រភេទ លាបពេញមួយដងខ្លួនបាន ដូចតែគ្នា។

៣. សាប៊ូបំបាត់អង្គែ ៖ ជាក់ស្តែង អង្គែ ដែលមានលើស្បែកក្បាល មិនអាចដោះស្រាយបានដោយសារ សាប៊ូកម្ចាត់អង្គែធម្មតាៗនោះទេ ពីព្រោះវាអាចបណ្តាលឲ្យស្បែកក្បាលស្ងួត។ ហេតុនេះ អ្នកគួរតែជាវសាប៊ូព្យាបាលអង្គែ នៅតាមឱសថស្ថានវិញ ទើបជាការប្រសើរ។

៤. ទឹកជូតមុខ (Toner) ៖ មនុស្សជាច្រើនគិតថាវាសំខាន់ ប៉ុន្តែជាក់ស្តែង អ្នកគ្រាន់តែ ប្រើសាប៊ូលាងមុខ តែមួយមុខគឺគ្រប់គ្រាន់ហើយ ដោយសារវាគ្មានជាតិអាល់កុល ដែលមិនធ្វើឲ្យស្បែកស្ងួតឡើយ។

៥. ក្រែមលាបមាត់ កុំឲ្យស្ងួត ៖ ជាក់ស្តែង ក្រែមបបូរមាត់ សម្រាប់ផ្តល់ជាតិសំណើមនេះ មានផ្ទុកជាតិអាល់កុល ដែលអាចធ្វើឲ្យមាត់កាន់តែស្ងួត។ ផ្ទុយទៅវិញ អ្នកគួរតែក្រមួនឃ្មុំ ជាដើម មកលាបមាត់បិញទើបជាការប្រសើរ។

៦. គ្រីមសម្រាប់កោររោម ៖ ជាក់ស្តែង អ្នកអាចប្រើ សាប៊ូដុសខ្លួនជាជំនួយ សម្រាប់កោររោមក៏បានដែរ នៅពេលអ្នកងូតទឹក ដោយសារតែវាមានផ្ទុកសារធាតុ Glycerol និងសារធាតុសំណើមផ្សេងទៀត ល្អជាងគ្រីមកោររោមទៅទៀត។

៧. ប្រេងជំនួយក្រចក ៖ មនុស្សមួយចំនួន ទិញប្រេងជំនួយក្រចក មកបន្តក់ពីលើក្រចក ដើម្បីជួយឲ្យថ្នាំលាបក្រចក និងក្រចក មានសម្រស់ ព្រមទាំងស្រស់ស្អាតបានយូរ ប៉ុន្តែជាក់ស្តែងវាខ្ជញខ្ជាយណាស់។

៨. ម៉ាសបិទមុខ ៖ ការប្រើម៉ាសបិទមុខ មិនមែនអត់ប្រយោជន៍នោះទេ ប៉ុន្តែសំខាន់បំផុតគឺ អ្នកអាចទទួលបានស្បែកស្អាតស្រស់ថ្លាបានដូចគ្នា ដោយគ្រាន់តែ ប្រើគ្រីមលាបមុខធម្មតាទៅគឺបានហើយ៕

ប្រភព៖ Bright Side

ដោយឡែកព័ត៌មានគួរឲ្យចាប់អារម្មណ៍មួយផ្សេងទៀត៖

ទម្លាប់ពាក់ព័ន្ធនឹងសុខភាពមួយចំនួន ដែលមនុស្សភាគច្រើន គិតខុសទាំងស្រុង ថាវាមានប្រយោជន៍

មនុស្សយើងម្នាក់ៗតែងតែមានទម្លាប់ជាក់លាក់ជាច្រើន ដែលគិតថាទម្លាប់ទាំងនោះមានសារៈសំខាន់ណាស់ សម្រាប់សុខភាព និងរូបរាងកាយរបស់យើង។ ប៉ុន្តែជាក់ស្តែង ទម្លាប់ប្រចាំថ្ងៃក្នុងនោះមួយចំនួន បែរជាគ្មានប្រយោជន៍ សម្រាប់សុខភាពអ្វីឡើយ។

ចង់ដឹងថាមានអ្វីខ្លះ តាមដានទាំងអស់គ្នា ដូចខាងក្រោមនេះ!

១. ទម្លាប់ទទួលទានថ្នាំវីតាមីន

ការទទួលទានថ្នាំវីតាមីន ឬប្រភេទថ្នាំបំប៉នផ្សេងៗ មិនបានកាត់បន្ថយហានិភ័យ ការកើតជំងឺផ្សេងៗ មិនបានជួយបង្កើនការចងចាំ ឬជួយបំប៉នកម្លាំងអ្វីនោះទេ។ ក្រុមអ្នកវិទ្យាសាស្រ្តមួយនៅឯសហរដ្ឋអាមេរិក បានសន្និដ្ឋានការធ្វើតេស្តលើមនុស្សជាង ៤៥០,០០០ នាក់ ឃើញថាការទទួលទានវីតាមីនជំនួយចម្រុះបែបនេះ បែរជាមានផលប៉ះពាល់អវិជ្ជមានលើសុខភាពរបស់អ្នក ទៅវិញទេ។

២. ទម្លាប់ប្រើទឹកលាងដៃ គ្មានជាតិអាល់កុល

ទឹកលាងដៃ ដែលមនុស្សសម័យឥលូវចូលចិត្តប្រើប្រាស់ ពិតជាអាចជួយកម្ចាត់បាក់តេរី និងមេរោគបាន ប៉ុន្តែក្នុងករណីតែទឹកលាងដៃ ដែលមានជាតិអាល់កុល ៦០% ឡើងប៉ុណ្ណោះ។ ទឹកលាងដៃក្រៅពីនេះ គ្មានប្រសិទ្ធភាព ជួយកម្ចាត់មីក្រូសារពាង្គកាយកខ្វក់បានឡើយ។ ហេតុនេះ ជម្រើសដែលត្រឹមត្រូវបំផុត គឺលាងសម្អាតដៃ ជាមួយនឹងសាប៊ូ។

៣. ទម្លាប់មិនទទួលទានប៊ីចេង

យើងធ្លាប់តែឮគេនិយាយថា ប៊ីចេង អាចធ្វើឲ្យមនុស្សចង់ក្អួត និងឈឺក្បាល ព្រមទាំងកើតជំងឺផ្សេងទៀត នៅរយៈពេលយូរ។ ប៉ុន្តែ ជាក់ស្តែង វាអាចបង្កបញ្ហាទាំងនេះបានតែក្នុងករណីអ្នកទទួលទានប៊ីចេងផ្ទាល់ លើសពី ៣ ក្រាមប៉ុណ្ណោះ។ ហេតុនេះ ទោះបីជាអ្នកប្រើប្រាស់ ឬមិនប្រើប្រាស់ប៊ីចេងក៏ដោយ ក៏វាមិនមានអ្វីប៉ះពាល់ដល់អ្នកដែរ។

៤. ទម្លាប់ទទួលទានតែបន្លែ និងផ្លែឈើ

មនុស្សយើងសព្វថ្ងៃនេះ មានរបបអាហារ ដែលសម្រាប់បំបាត់ជាតិពុលផ្ទាល់ខ្លួន សម្រាប់ធានាថារាងកាយ នឹងគ្មានជាតិពុលយាយី។ គួរបញ្ជាក់ផងដែរថា របបអាហារទាំងនោះមនុស្សយើងភាគច្រើនគិតថាជាបន្លែ និងផ្លែឈើប៉ុណ្ណោះ ហេតុនេះ ប្រសិនបើអ្នកពិតជាទទួលទានអាហារបែបនេះច្រើនលើសហួសហេតុ រាងកាយអ្នកមិនអាចបញ្ចេញជាតិពុលបានគ្រប់គ្រាន់ ដូចដែលអ្នកគិតនោះទេ។

៥. ទម្លាប់ទទួលទានអាហារគ្មានគីមី

នៅតាមបណ្តាប្រទេសជាច្រើន គ្មានច្បាប់ណា ដែលហាមឃាត់មិនឲ្យបិទផ្លាកសម្គាល់លើផលិតផលថា “ជារបស់ធម្មជាតិ” “គ្មានជាតិគីមី” អ្វីនោះទេ។ ជាការពិត ភាគច្រើន វាគ្រាន់តែជា យុទ្ធសាស្រ្តទីផ្សារ សម្រាប់ទាក់ទាញអតិថិជនប៉ុណ្ណោះ។ ហេតុនេះ អ្នកអាចជ្រើសរើសទិញទំនិញ ដែលធម្មតាៗទៅបានហើយ ពីព្រោះតាមពិតវាគ្មានខុសគ្នាអ្វីឡើយ។

៦. ទម្លាប់មិនប្រើម៉ាស៊ីន Microwave

គេជឿថា ការកម្តៅម្ហូបអាហារ ក្នុងម៉ាស៊ីន Microwave អាចធ្វើឲ្យបាត់បង់សារធាតុចិញ្ចឹមក្នុងអាហារ។ ប៉ុន្តែ ជាក់ស្តែង ការប្រើប្រាស់ ចង្ក្រានហ្គាស ឬម៉ាស៊ីនដុតនំ កម្តៅ ក៏កាន់តែយ៉ាប់យ៉ឺនជាង ការប្រើម៉ាស៊ីន Microwave ទៅទៀត ដោយ Microwave វាមិនត្រឹមតែមានភាពងាយស្រួលប៉ុណ្ណោះទេ វាថែមទាំងអាចរក្សាសារធាតុវីតាមីន C ឲ្យនៅក្នុងអាហារបាន មិនដូចពីការគិតរបស់មនុស្សភាគច្រើនឡើយ។

៧. ទម្លាប់ទទួលទានតែផលិតផលគ្មានជាតិខ្លាញ់

រាងកាយរបស់មនុស្សក៏ទាមទារ នូវជាតិខ្លាញ់ដែរ ហេតុនេះ ការទទួលទានអាហារដែលសំបូរជាតិខ្លាញ់ល្អសម្រាប់សុខភាព គឺជារឿងត្រឹមត្រូវ មិនមែនបរិភោគតែផលិតផល គ្មានជាតិខ្លាញ់នោះទេ។ ជាក់ស្តែង ផលិតផលដែលគ្មានជាតិខ្លាញ់ទាំងនោះ មានផ្ទុកជាតិស្ករខ្ពស់ ដែលអាចប៉ះពាល់ដល់សុខភាព ថែមទៀតផង៕