ទស្សនាទិដ្ឋភាពចុងក្រោយ នៃពហុកីឡដ្ឋានមរតកតេជោ មុនសម្ពោធផ្លូវការថ្ងៃទី៤ ខែមេសា

(ភ្នំពេញ)៖ ទស្សនីយ៍ភាពដ៏ស្រស់ស្អាត ត្រូវបានផុសចេញជារូបរាងហើយពីពហុកីឡដ្ឋានមរតកតេជោ ដែលត្រៀមសម្ពោធដាក់ឲ្យប្រើប្រាស់ជាផ្លូវការនៅថ្ងៃអង្គារ ទី៤ ខែមេសា ឆ្នាំ២០១៧ ដ៏ខ្លីខាងមុខ ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា រួមជាមួយនឹងការជួបជុំមន្រ្តីកីឡា គ្រូបង្វឹក និងកីឡាករ-កីឡាការិនីជាច្រើនទៀតផង ដែរ។

ទន្ទឹមគ្នានោះ រដ្ឋមន្រ្តីក្រសួងទេសចរណ៍លោក ថោង ខុន និងជាប្រធានគណៈកម្មាធិការជាតិអូឡាំពិកកម្ពុជា (NOCC) ផងនោះ ក៏បានដឹកនាំមន្រ្តីកីឡាចុះទៅពិនិត្យផ្ទាល់នៅពហុកីឡដ្ឋានមរតកតេជោនាព្រឹកថ្ងៃសុក្រ ទី៣១ ខែមីនា ឆ្នាំ២០១៧ និងពិភាក្សាការងារចុងក្រោយផងដែរ មុនថ្ងៃសម្ពោធផ្លូវការនៅថ្ងៃទី៤ ខែមេសាខាងមុខ។

លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ធ្លាប់ថ្លែងប្រាប់ Fresh News ឲ្យដឹងថា «ដំណាក់កាលទី១ នៃពហុកីឡដ្ឋានដ៏ធំលើផ្ទៃដីប្រមាណ ៨៣ហិចតា ស្ថិតក្នុងសង្កាត់ព្រែកតាសេក ខណ្ឌឫស្សីកែវនេះ នឹងបញ្ចប់ការសាងសង់នាចុងខែមីនានេះ»។

សមិទ្ធផលគ្រោងសម្ពោធដាក់ឲ្យប្រើប្រាស់មុនគេ រួមមានមជ្ឈមណ្ឌលអាងហែលទឹក, មជ្ឈមណ្ឌលកីឡាក្នុងសាល, ទីលានបាល់បោះ, ទីលានបាល់ទះ និងអគារស្នាក់នៅរបស់អត្តពលិក។ ហើយជាមួយគ្នានោះ សម្ដេចតេជោ ហ៊ុន សែន ក៏មានកម្មវិធីសំខាន់ចំនួន ២ចំណុចផ្សេងទៀតដែរ ពោលគឺការរៀបចំពិធីបុកគ្រឹះសាងសង់ពហុកីឡដ្ឋានមរតកតេជោ ដំណាក់កាលទី២ ផ្ដោតលើកីឡដ្ឋានបាល់ទាត់ និងមួយទៀត គឺការទទួលទានអាហារជួបជុំជាមួយមហាគ្រួសារកីឡាកម្ពុជា លោក វ៉ាត់ ចំរើន បញ្ជាក់បន្ថែម។

សូមទស្សនារូបភាពស្អាតៗដែលទទួលបានពីភ្នាក់ងារសារព័ត៌មាន Fresh News តែគ្រាន់ជារូបភាពមួយផ្នែកនៃពហុកីឡដ្ឋានមរតកតេជោតែប៉ុណ្ណោះ៖

ប្រភព៖ Fresh News

ដោយឡែក ព័ត៌មានគួរឲ្យចាប់អារម្មណ៍មួយផ្សេងទៀត៖ ស្តេចប្រដាល់ពិភពលោក Pacquiao នឹងមកទស្សនកិច្ចកម្ពុជា ជាលើកទី២ នាពេលឆាប់ៗខាងមុខនេះ

(ភ្នំពេញ)៖ លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា បានថ្លែងប្រាប់សារព័ត៌មាន Khmertalking នៅមុននេះបន្តិចថា «ខាងភាគីហ្វីលីពីនបានរៀបចំរួចហើយ ដើម្បីឲ្យកីឡាករស្តេចប្រដាល់ Manny Pacquiao បានធ្វើ ដំណើរទស្សនកិច្ចកម្ពុជាជាលើកទី២ នាពេលឆាប់ៗខាងមុខនេះ»។

រដ្ឋមន្រ្តីក្រសួងទេសចរណ៍ខាងលើបានបញ្ជាក់ថា រូបលោកបានធ្វើដំណើរទៅប្រទេសហ្វីលីពីននាពេលកន្លងមក ហើយក៏បានធ្វើការជួបសំណេះសំណាលជាមួយភាគីកីឡានៃប្រទេសស្ថិតក្នុងតំបន់អាស៊ីអាគ្នេយ៍ ហើយពួកគេ (ភាគីហ្វីលីពីន) ក៏បានប្រាប់លោកថា ពួកគេបានរៀបចំរួចហើយក្នុងដឹកនាំស្តេចប្រដាល់ Manny Pacquiao មកកម្ពុជា ជាលើកទី២ទៀត នាពេលដ៏ខ្លីខាងមុខនេះ។

សូមរំលឹកផងដែរថា ស្តេចប្រដាល់ប្រដាល់ដែលកំពុងគ្រប់គ្រងខ្សែក្រវាត់ WBO ទម្ងន់មធ្យមពិភពលោក ធ្លាប់បានមក ទស្សនាជាលក្ខណៈផ្លូវរដ្ឋម្តងរួចមកហើយមានរយៈពេល២ថ្ងៃកាលពីពាក់កណ្តាលខែធ្នូ ឆ្នាំ២០១៦កន្លងទៅ ក្នុងនាម ជាអ្នកអមដំណើរប្រធានាធិបតីនៃប្រទេសហ្វីលីពីន ឌូរីដ្រូ ឌូធឺតេ។

ក្នុងដំណើរទស្សនកិច្ច២ថ្ងៃនោះដែរ កីឡាករដែលមានវ័យ៣៨ឆ្នាំ Pacquiao ក៏បានជួបសំណេះសំណាលជាមួយលោក ថោង ខុន ប្រធាន NOCC និងកីឡាករប្រដាល់កម្ពុជាជាច្រើនរូបផងដែរ៕