លំហាត់ប្រាណទាំង ៨ ប្រភេទ ដែលអ្នកអាចអនុវត្តន៍បាន ដោយមិនចាំបាច់ក្រោកចេញពីគ្រែឡើយ

លំហាត់ប្រាណ មិនត្រឹមតែជួយបញ្ចុះទម្ងន់ និងបង្កើនសាច់ដុំប៉ុណ្ណោះទេ វាថែមទាំងជួយឲ្យរាងកាយទាំងមូល មានសុខភាពល្អទៀតផង។ ដោយហេតុនេះហើយ ថ្ងៃនេះ យើងនឹងលើកយកនូវលំហាត់ប្រាណមួយចំនួនដែលអ្នកអាចអនុវត្តន៍បានរៀងរាល់ពេលក្រោកពីគេង ដោយមិនចាំបាច់ក្រោកចេញពីគ្រែគេងឡើយ។ លំហាត់ប្រាណទាំងនេះ នឹងជួយឲ្យរាងកាយដំណើរការបានល្អប្រសើរ និងជួយឲ្យអារម្មណ៍ស្រស់ថ្លា ព្រមទាំងតម្រង់ឆ្អឹងខ្នងអ្នក បានយ៉ាងមានប្រសិទ្ធភាព។

បញ្ជាក់៖ យកកន្សែងពោះគោមូរ ទុកមកប្រើប្រាស់ជំនួសខ្នោយកើយរបស់អ្នក

ចង់ដឹងថាយ៉ាងណានោះ សូមតាមដាន អត្ថបទខាងក្រោមនេះ ៖

លំហាត់ប្រាណទី ១៖

ដាក់កន្សែងពោះគោ នៅពីក្រោមក្បាលរបស់អ្នក ត្រង់ស្មា បន្ទាប់មកបោះដៃឡើងទៅលើឲ្យអស់ រួចរំកិលខ្លួន ដើម្បីឲ្យកន្សែងនោះរំកិលចុះឡើង ដូចជាការ៉េមកំពុងរលាយយ៉ាងអ៊ីចឹង។ 

លំហាត់ប្រាណទី ២៖

ដាក់កន្សែងពោះគោមូរនោះ នៅពីក្រោម ក រួចយកបាតដៃត្រដុសគ្នាឲ្យក្តៅ បន្ទាប់មកយកមកត្រដុស ផ្ទៃមុខ ថ្ងាស ត្រចៀក និងក្បាលវិញម្តង។ បន្ទាប់មក អនុវត្តម្តងទៀតលើ បរិវេណ ក ដើមទ្រូង និងក្បាលពោះ។ 

លំហាត់ប្រាណទី ៣៖

ដាក់កន្សែងពីក្រោម ក ដដែល រួចយកដៃស្តាំ ទៅសង្កត់ ត្រដុស ឈ្លី ដៃឆ្វេង ចាប់ពីម្រាមដៃ ដល់កែងដៃ រហូតមកដល់ចំហៀងក្រោមត្រគៀក។ បន្ទាប់មក អនុវត្តមួយលើកទៀត ដោយប្រើដៃឆ្វេងម្តង។ 

លំហាត់ប្រាណទី ៤៖

លំហាត់ប្រាណនេះ ដូចទៅនឹង លំហាត់ប្រាណទី ៣ ដែរ ប៉ុន្តែដោយគ្រាន់តែ ប្រើដៃមកញី ច្របាច់ជើង វិញម្តង ចាប់ពីម្រាម មក កជើង រហូតដល់គល់ភ្លៅ រួចផ្លាស់ប្តូរជើងម្ខាងទៀត ជាការស្រេច។ 

លំហាត់ប្រាណទី ៥៖

ដេកកល់កន្សែងនៅនឹងក ដដែល បន្ទាប់មក បត់ជង្គង់ឡើង ហើយយកដៃទៅឈ្លី និងច្របាច់ ឲ្យខ្លាំង ជាពិសេស ផ្ទៃបាត់ជើង ដែលប៉ះនឹងដី។ បន្ទាប់មកទៀត អនុវត្ត ដោយផ្លាស់ប្តូរជើងម្ខាងទៀត។ 

លំហាត់ប្រាណទី ៦៖

ដាក់កន្សែងមូរនៅក្រោមក ដដែល រួចយកដៃបោះឡើងទៅលើ ក្តាប់ចូលគ្នា និងដាក់បាតជើង ផ្គុំជាប់គ្នា បន្ទាប់មក ប្រឹងធ្វើកាយវិការ ដូចជាឈរជំទើត (ដូចអ្នករាំរបាំបាលេ) ឲ្យបាន ២ ទៅ ៣ ដង ជាការស្រេច។ 

លំហាត់ប្រាណទី ៧៖

លំហាត់ប្រាណនេះ ពត់ពែនស្រដៀងនឹងខាងលើដែរ ប៉ុន្តែអ្នកត្រូវបត់ជង្គង់ជើងឆ្វេង រួចប្រើដៃស្តាំពត់មកប៉ះក្បាលជង្គង់ខាងឆ្វេងនោះ។ បន្ទាប់មក ផ្លាស់ប្តូរជើងខាងស្តាំ និងប្រើដៃឆ្វេងវិញម្តង។ 

លំហាត់ប្រាណទី ៨៖

បញ្ឈរជង្គង់ឡើង រួចដាក់ដៃផ្តេក ទៅចំហៀងទាំងសងខាង។ បន្ទាប់មកបត់ជង្គង់ទៅខាងឆ្វេង រួចបត់ក្បាលមកខាងស្តាំ។ អនុវត្តសាឡើងវិញ ដោយបត់ជង្គង់ទៅខាងស្តាំ រួចបត់ក្បាលមកខាងឆ្វេង វិញ ជាពិសេស ធ្វើឲ្យបានកាន់តែច្រើនដង គឺកាន់តែល្អ៕ 

ប្រភព៖ Bright Side

ដោយឡែកព័ត៌មានគួរឲ្យចាប់អារម្មណ៍មួយផ្សេងទៀត៖

ក្បាច់យូហ្គាទាំង ៧ប្រភេទ ដែលជួយឲ្យដើមទ្រូងប្រែជាមូលក្លំបាន យ៉ាងមានប្រសិទ្ធភាព!

អ្នកណាៗ ក៏ប្រាថ្នា ចង់បានរូបរាងកាយ ស្លីមស្អាតឥតខ្ចោះដែរ ជាពិសេស នារីយើងៗតែម្តង។ ដោយហេតុនេះហើយ ទើបថ្ងៃនេះ យើងនឹងលើកឡើងនូវយូហ្គា ចំនួន ៧ក្បាច់ ជូនប្រិយមិត្តនារីៗ ដើម្បីជួយឲ្យ ដើមទ្រូងមូលក្លំស្អាត និងថែមទាំងធ្វើឲ្យអ្នក មានភាពរឹងមាំ ព្រមទាំងសុខភាពល្អផងដែរ។

ដើម្បីកុំឲ្យប្រិយមិត្តរង់ចាំយូរ សូមតាមដានទាំងអស់គ្នា ដូចខាងក្រោមនេះ ៖

១. យូហ្គា ក្បាច់អ្នកចម្បាំង

• ដាក់ជើងរបស់អ្នកឃ្លាតពីគ្នាឲ្យធំ លើខ្សែបន្ទាត់តែមួយ

• ដកដង្ហើមចេញមួយៗ រួចប្តូរជើងឆ្វេងរបស់អ្នក ឲ្យទៅជាមុំ ៩០ ដឺក្រេ

• ជើងស្តាំរបស់អ្នកត្រូវតែត្រង់។ បន្ទាប់មក លើកដៃឡើងឲ្យត្រង់ ហើយងាកក្បាលមើលទៅ កដៃខាងឆ្វេង

• អនុវត្តន៍ដដែលៗពី ៧ ទៅ ១០ ដង រួចផ្លាស់ប្តូរមកជើងខាងស្តាំវិញម្តង។

២. យូហ្គា ក្បាច់ត្រីកោណ

• ដាក់ជើងរបស់អ្នកឃ្លាតពីគ្នាឲ្យធំ ពត់ជើងឆ្វេងឲ្យចេញជាមុំ ៩០ ដឺក្រេ និងពត់ជើងស្តាំចេញជាមុំ ១៥ ដឺក្រេ

• បន្ទាប់មក យកដៃឆ្វេងប៉ះ ខ្មងជើងឆ្វេង ម្តងបន្តិចៗ រួចលាតដៃស្តាំ ត្រង់ឡើងទៅលើ និងរក្សាជើងទាំងសងខាងឲ្យត្រង់ដូចគ្នា

• បន្ទាប់មកទៀត ងើយមុខឡើងទៅលើ រួចអនុវត្តន៍ម្តងទៀត ដោយផ្លាស់ប្តូរខាងវិញម្តង។

៣. យូហ្គា ក្បាច់ពស់

• ដេកផ្កាប់មុខ ទៅនឹងដី រួចងើបខ្លួនមួយកំណាត់លើ ឡើងសន្សឹមៗ ដោយយកជើង និងដៃទប់លំនឹងរបស់អ្នក

• បន្ទាប់មកងើបក្បាលឡើង ហើយមើលទៅលើ

• ដកដង្ហើមចេញមួយៗ រួចអនុវត្តន៍ដដែលៗ តែត្រូវប្រឹងទប់ខ្លួនឲ្យបានយូរជាងមុនម្តងបន្តិចៗ។

៤. យូហ្គា ក្បាច់បូ

• ដេកផ្កាប់មុខ ដកដង្ហើមចេញ រួចបត់ជង្គង់ឡើង ដោយប្រើដៃកាន់ខ្មងជើងឲ្យជាប់

• ដកដង្ហើមចេញមួយៗម្តងទៀត រួចប្រឹងបត់ជើង និងដៃឡើង តាមដែលអាចធ្វើទៅបាន ដោយរក្សាតែពោះ ឲ្យជាប់នឹងដីគឺបានហើយ

• រក្សាឥរិយាបថ បែបនេះឲ្យបាន ៣០ វិនាទី។

៥. យូហ្គា ក្បាច់កង់ឡាន

• ដេកផ្ងារ រួចកន្ធែកជើងបន្តិច

• ដាក់បាតដៃសងខាងជាប់នឹងដី ដោយបែរម្រាមដៃ មកខ្នង រួចប្រឹងងើបដើមទ្រូង និងត្រគាក ឲ្យបានខ្ពស់តាមដែលអាចធ្វើទៅបាន

• បន្ទាប់មក ដាក់ដៃយ៉ាងនាឲ្យត្រង់ រួចរក្សាឥរិយាបថនេះ ឲ្យបាន ៣០ វិនាទី។

៦. យូហ្គា ក្បាច់ដាំក្បាលចុះ

• លុតជង្គង់ចុះ រួចដាក់ដៃនៅលើដី។ ផ្តេកក្បាលចុះ រួចក្តាប់ដៃរបស់អ្នកពីលើ

• ដកដង្ហើមចេញមួយៗ រួចបត់ជង្គង់ និងជើង ឡើងទៅលើសន្សឹមៗ

• សណ្តូកជើងឡើងលើឲ្យត្រង់ ឲ្យបាន ៣០ វិនាទី ទៅ ២ នាទី ប្រសិនបើអាចធ្វើបាន។

៧. យូហ្គា ក្បាច់អូដ្ឋ

• លុតជង្គង់ចុះ រួចផ្គួបជើងចូលគ្នា

• បត់ខ្លួនមកក្រោមសន្សឹមៗ រួចដាក់ដៃ លើកែងជើង បន្ទាប់មកពើងខ្នង និងត្រគាកឲ្យកោងឡើង

• រក្សាឥរិយាបថបែបនេះ ឲ្យបាន ៣០ វិនាទី រួចអនុវត្តម្តងទៀត៕