អង់គ្លេស៖ អាយុច្រើន មានក្រុមគ្រួសារ និងកូនៗ៤នាក់ក៏ពិតមែន ប៉ុន្តែអតីតកំពូលកីឡាករជើងចាស់ David Beckham នៅតែថែរក្សារាងកាយរបស់ខ្លួនឲ្យស្រស់សង្ហាដដែល មិនតែប៉ុណ្ណោះអាចនឹងធ្វើឲ្យនារីៗឈ្លក់វង្វេងថែមទៀតផង។
ប៉ុន្តែយ៉ាងណាមិញ ស្រាប់តែថ្មីៗនេះ អតីតកីឡាករជម្រើសជាតិអង់គ្លេស វ័យ៤១ឆ្នាំរូបនេះ បានបង្ហោះរូបភាពមួយសន្លឹក ធ្វើឲ្យអ្នកគាំទ្រជាច្រើននាក់នៅក្នុងបណ្តាញសង្គមរូបភាព Instagram មានការងឿយឆ្ងល់គ្រប់គ្នា ដោយសារតែផ្ទៃមុខទាំងមូលរបស់ Beckham ត្រូវបានបំផ្លាញដោយស្លាកស្នាម។
បើតាមការឲ្យដឹងពីប្រភពព័ត៌មានបានបញ្ជាក់ថា នេះគ្រាន់តែជាការតុបតែងខ្លួន ត្រៀមថតរឿងតែប៉ុណ្ណោះ ដោយ David Beckham នឹងត្រូវចូលរួមសម្តែងជាតួអង្គមួយនៅក្នុងខ្សែភាពយន្តថ្មី «King Arthur» ។
ក្នុងនោះដែរ Beckham ត្រូវបានតុបតែងខ្លួន ដោយមានស្លាកស្នាមពេញផ្ទៃមុខ ទាំងមាត់និងច្រមុះឡើងក្រហម និងធ្មេញឡើងលឿង ហើយមានជាប់កម្ទេចខ្មៅនៅខាងក្នុងទៀតផង។
បន្ថែមពីនេះទៀត បន្ទាប់ពីបង្ហោះរូបមួយសន្លឹកនេះ Beckham ក៏បានឆ្លៀតសរសេរបញ្ជាក់ថែមទៀតថា «ថ្ងៃដ៏សែនលំបាកនៅក្នុងការិយាល័យ» ដែលនេះហើយបានធ្វើឲ្យមហាជននៅក្នុងបណ្តាញសង្គមនាំគ្នាឆ្ងល់។
ក្រោយពីបានឃើញរូបមួយសន្លឹកនេះ មានអ្នកគាំទ្រម្នាក់បាននិយាយ «ព្រះជាម្ចាស់! ខ្ញុំមិនចូលចិត្តមុខនេះទេ..តើមានរឿងអ្វីកើតឡើង? តើនេះជា Beckham មែនឬ?» ឯខ្លះទៀតនិយាយថា «ព្រះអើយខ្ញុំខំតែគិតថា គាត់ជួបគ្រោះថ្នាក់អ្វីមួយ!» ៕
ចុះប្រិយមិត្តវិញយល់យ៉ាងណាដែរ?
ប្រភព៖ Dailymail
ដោយឡែក ព័ត៌មានគួរឲ្យចាប់អារម្មណ៍មួយផ្សេងទៀត៖ ធ្ងន់កហើយ! Messi ត្រូវសហព័ន្ធ FIFA ពិន័យមិនឲ្យលេង៤ប្រកួត ដោយសារប្រើសម្តីមិនសមរម្យ ដាក់អាជ្ញាកណ្តាល
អាហ្សង់ទីន៖ ម្ចាស់ជើងឯក Ballon d’Or ៥សម័យ Lionel Messi ត្រូវបានសហព័ន្ធ FIFA ដាក់ពិន័យមិនឲ្យលេង៤ប្រកួតក្នុងវគ្គជម្រុះ World Cup ដោយសារការប្រើពាក្យសម្តីមិនសមរម្យទៅកាន់អាជ្ញាកណ្តាលខ្សែបន្ទាត់អំឡុងពេល អាហ្សង់ទីន ប្រកួតជាមួយ ឈីលី កន្លងទៅ។
ការពិន័យរបស់ FIFA ទៅកាន់ខ្សែប្រយុទ្ធ Lionel Messi ត្រូវបានធ្វើឡើងកាលពីម្សិលមិញ និង៦ម៉ោងមុនការប្រកួតជម្រុះ World Cup ដែលធ្វើឲ្យក្រុមជម្រើសជាតិអាហ្សង់ទីន ទទួលបរាជ័យក្រោមថ្វីជើង បូលីវី ក្នុងលទ្ធផល ២-០ ដោយគ្មានវត្តមាន Messi ។
Messi មិនត្រឹមតែរងការពិន័យមិនឲ្យលេង៤ប្រកួតប៉ុណ្ណោះទេ ខ្សែប្រយុទ្ធឆ្នើមរូបនេះថែមទាំងត្រូវបង់ប្រាក់ពិន័យចំនួនជាង ១មឺុនដុល្លារទៀតផង។
បើតាមការឲ្យដឹងពីប្រភពបានបញ្ជាក់ថា Messi បានប្រើពាក្យសម្តីមិនសមរម្យ ជាលក្ខណៈជេរប្រទេច និងដាក់ទំនាយទៅអាជ្ញាកណ្តាលខ្សែបន្ទាត់សញ្ជាតិប្រេស៊ីល លោក Emerson Augusto do Carvalho បន្ទាប់ពីការប្រកួតរវាង អាហ្សង់ទីនបានបញ្ចប់ទៅ ដោយបានយកឈ្នះឈីលី ១-០ ។ បន្ថែមពីនេះទៀត មន្ត្រីអាជ្ញាកណ្តាលក្នុងទីលានក៏បានព្យាយាមទៅប្រាប់ឲ្យ Messi សម្រួលអារម្មណ៍ផងដែរ ប៉ុន្តែកីឡាកររូបនេះនៅតែបន្តប្រើសម្តីមិនសមរម្យទៅកាន់អាជ្ញាកណ្តាលបន្ទាត់។
យ៉ាងណាមិញ អាជ្ញាកណ្តាលខ្សែបន្ទាត់សញ្ជាតិប្រេស៊ីលរូបនេះ មិនបានមានប្រតិកម្មតបតភ្លាមៗនោះទេ ដោយសារតែមិនដឹងថា ពាក្យ Messi និយាយមកកាន់គាត់ គឺជាការជេរ និងដាក់ទំនាយ។ លុះក្រោយមក នៅពេលធ្វើសន្និសីទសារព័ត៌មានទើបលោកដឹងថា ពាក្យទាំងនោះគឺជាពាក្យមិនសមរម្យ ទើបធ្វើឲ្យ លោក Carvalho ដែលជាអាជ្ញាកណ្តាលខ្សែបន្ទាត់សម្រេចចិត្តផ្ញើលិខិតទៅកាន់សហព័ន្ធ FIFA តែម្តង ដើម្បីប្តឹងកីឡាករ Lionel Messi ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]