កំពង់ស្ពឺ ៖ យុវជនម្នាក់ជាសិក្ខាកាមវរៈលេខ63សាលាហ្វឹកហ្វឺនរថក្រោះដែលគេស្គាល់ថា ជាក្មួយរបស់លោកផ្កាយ3 ឡាញ់ កៅ នោះត្រូវបានក្រុមជនដៃដល់មិនស្គាល់មុខស្ទាក់កាប់បណ្តាលឱ្យស្លាប់យ៉ាងអាណោចអធ័មរួចយកសពទៅទំលាក់ក្នុងទឹកបឹងរហូតដល់ព្រឹកទើបរកសពឃើញ ។
ហេតុការណ៍កាប់សម្លាប់មនុស្សដូចសម្លាប់សត្វនោះបានកើតឡើងកាលពីវេលាម៉ោង8និង40នាទីយប់ថ្ងៃទី24 ខែមីនា ឆ្នាំ2017 នៅលើខ្នងទំនប់បឹងសំរោងបាក់ ស្ថិតក្នុងភូមិក្រាំងល្ហុង ឃុំមហាសាំង ស្រុកភ្នំស្រួច ខេត្តកំពង់ស្ពឺ ។ តាមសម្តីរបស់នគរបាលបាលស្រុកបាននិយាយឱ្យដឹងថា យុវជនរងគ្រោះមានឈ្មោះ មុំ សារី អាយុ30ឆ្នាំ ជាយោធា សិក្ខាកាមវរៈលេខ63 សាលាហ្វឹកហ្វឺនរថគ្រោះ86 ស្នាក់នៅជាមួយលោកផ្កាយ3 (អា សេ អូរ) ឃុំមហាសាំង ស្រុកភ្នំស្រួច ខេត្តកំពង់ស្ពឺ មានស្រុកកំណើតភូមិដើរពោធិ ឃុំកណ្ដៀងរាយ ស្រុកស្វាយទៀប ខេត្តស្វាយរៀង ។
នគរបាលបានបន្តថា នៅមុនកើតហេតុនោះគឺជនរងគ្រោះ និងមិត្តភក្តិ2នាក់ទៀតបានជិះម៉ូតូតាមភ្លឺទំនប់ សំរោងបាក់ ភូមិក្រាំងល្ហុង ឃុំមហាសាំង ស្រុកភ្នំស្រួច ខេត្តកំពង់ស្ពឺ ជាមួយឈ្មោះ ឡញ់ ពិនថុនា ភេទប្រុស អាយុ22ឆ្នាំ និងឈ្មោះ ឆាយ សុខរី ភេទប្រុស អាយុ27ឆ្នាំ ជាសិក្ខាកាមសាលាហ្វឹកហ្វឺនរថក្រោះជាមួយគ្នាពេលជិះដល់ចំណុចផ្លូវចូលសាលាហ្វឹកហ្វឺនរថគ្រោះ86 ចម្ងាយប្រហែល30ម៉ែត្រ ក៏មានជនសង្ស័យចំនួន6នាក់មិនស្គាល់ឈ្មោះ និងមិនស្គាល់ទីលំនៅ ជិះម៉ូតូ2គ្រឿង បានហៅឱ្យឈ្មោះ មុំ សារី, ឈ្មោះ ឡាញ់ ពិនថុនា និងឈ្មោះ ឆាយ សុខរី ឱ្យឈប់ហើយក៏បានវាយទៅលើអ្នកទាំង3 ហើយឈ្មោះ ឆាយ សុខរី ឈ្មោះ ឡាញ់ ពិនថុនា បានរត់មកចូលក្នុងសាលា ចំណែកឈ្មោះ មុំ សារី បានបាត់ខ្លួនរកមិនឃើញ ។
លុះដល់វេលាម៉ោង7និង30នាទីថ្ងៃទី25 ខែមីនា ឆ្នាំ2017 បងប្អូន និងសិក្ខាកាមយោធាសាលាហ្វឹកហ្វឺនរថក្រោះ86 បាននាំគ្នាមុចទឹករាវរក ទើបឃើញសាកសពជនរងគ្រោះនៅក្នុងទឹកទំនប់សំរោងបាក់រួចក៏យកសពមករក្សាទុកក្នុងបន្ទាយដើម្បីឱ្យជំនាញធ្វើការពិនិត្យ ។ បើតាមប្រភពពីមន្ត្រីយោធាម្នាក់បានបង្ហើបឱ្យដឹងថា ជារៀងរាល់ថ្ងៃជនរងគ្រោះដែលជាក្មួយរបស់មេផ្កាយ3 និងចៅឈ្មោះ ឡាញ់ ពិនថុនា នេះពេលបញ្ចប់ការហ្វឹកហ្វឺនទៅយាម និងសំរាកនៅផ្ទះរបស់លោកផ្កាយ3 ហើយជារៀងរាល់ថ្ងៃតែងតែធ្វើដំណើរនៅម៉ោងជាង6ល្ងាច ហើយស្រាប់តែយប់ថ្ងៃកើតហេតុនេះនៅរហូតដល់យប់ជ្រៅពេលទៅដល់ពាក់កណ្តាលផ្លូវ ក៏ស្រាប់តែមានក្រុមជនសង្ស័យស្ទាក់កាប់តែម្តងដោយមិនមានរឿងអ្វីទាល់តែសោះ ។
បើតាមប្រភពដែលទទួលយកបានប្រាប់ឱ្យដឹងថា ក្រុមជនដៃដល់បានរៀបគំរោងរួចជាស្រាច់អស់ទៅហើយដោយនៅកន្លែងកើតហេតុមានទាំងសំបកកំប៉ុងស្រាបៀរទៀតផង ហើយបន្សល់ទុកនៅកន្លែងកើតហេតុមានទាំងដែកសរសៃ និងដាវ1ដើមទៀតផង ។ បើតាមសម្តីឈ្មោះ ឆាយ សុខរី បានប្រាប់ថា គ្រាន់តែក្រុមជនសង្ស័យវាយពួកខ្លួនហើយថែមតាំងស្រែកថា ចោរៗទៀតផងដោយមានការភ័យខ្លាចពេកពួកគេទាំង2នាក់បានរត់ចូលក្នុងបន្ទាយ ប៉ុន្តែក្រុមប្រជាពលរដ្ឋទាំងហ្វូងបានរត់ដេញពួកគេរហូតដល់ក្នុងបន្ទាយទៀតដោយចោទថា ពួកគេជាចោរទៅវិញ នេះជាលេសរបស់ក្រុមជនសង្ស័យ ។ ក្រោយកើតហេតុនគរបាលជំនាញបានចុះទៅពិនិត្យឃើញថា យុវជនខាងលើពិតជាបានរងរបួសចំក្បាលត្រូវ និងវត្ថុរឹងបណ្តាលឱ្យស្លាប់មែន រួចក៏ប្រគល់សពឱ្យសាច់ញាតិយកទៅធ្វើបុណ្យតាមប្រពៃណី ៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ជំពាក់បំណុលគេច្រើនពេក បង្ខំឲ្យស្ត្រីវ័យ៥៣ឆ្នាំ ចង-កសម្លាប់ខ្លួនក្នុងផ្ទះបាយ នៅក្រុងពោធិ៍សាត់
(ពោធិ៍សាត់)៖ ស្ត្រីវ័យ៥៣ឆ្នាំម្នាក់ ត្រូវបានក្រុមគ្រួសារប្រទះឃើញចង-ក សម្លាប់ខ្លួនជាមួយអាវជជុះ ជាប់នឹងធ្នឹមផ្ទះបាយ ហើយត្រូវបានគេសង្ស័យថា អាចមកពីជំពាក់លុយគេខ្លាចប្តីដឹង។
ហេតុការណ៍នេះបង្កឲ្យមានការភ្ញាក់ផ្អើល នៅព្រឹកថ្ងៃទី២៥ ខែមីនា ឆ្នាំ២០១៧នេះ ស្ថិតក្នុងភូមិបាក់រទះ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់។
មន្ដ្រីនគរបាលខេត្តពោធិ៍សាត់ បានប្រាប់ភ្នាក់ងារ Fresh News ឲ្យដឹងថា ស្ត្រីដែលដាច់ចិត្តចងកសម្លាប់ខ្លួន មានឈ្មោះ មាស សុផល អាយុ៥៣ឆ្នាំ មានមុខរបរជាអាជីវករលក់អាវជជុះ ក្នុងផ្សារពោធិ៍សាត់ មានប្តីឈ្មោះ អ៊ីត សួងមុនី អាយុ៥៤ឆ្នាំ មានមុខរបរជាមន្ត្រីនគរបាលខេត្ត បច្ចុប្បន្នរស់នៅភូមិសង្កាត់កើតហេតុខាងលើ។
សមត្ថកិច្ចបន្តថា មុនពេលកើតហេតុ ក្រោយពីហូបបាយរួច ស្ត្រីរងគ្រោះបានកាន់កាបូបដើរឆ្លេរឆ្លាចុះឡើង ហើយប្តីក៏មិនចាប់អារម្មណ៍នឹងកាយវិការបស់ប្រពន្ធនោះឡើយ ព្រោះសព្វថ្ងៃគេងផ្សេងគ្នា។ លុះព្រឹកឡើងបាត់ប្រពន្ធ ក៏ស្រែកហៅរកមើល ឃើញប្រពន្ធរបស់ខ្លួនចង-កនឹងអាវជជុះ ជាប់នឹងធ្នឹមផ្ទះបាយបង្កឲ្យមានការភ្ញាក់ផ្អើលតែម្តង។
យ៉ាងណាមិញ ប្រជាពលរដ្ឋនៅជិតនោះបានឲ្យដឹងថា ស្ត្រីរងគ្រោះមិនដែលមានទំនាស់ពាក្យសម្តី ជាមួយប្តីម្តងណាឡើយ តែស្ត្រីរងគ្រោះធ្លាប់ធ្វើមេតុងទីន និងធ្លាប់ជំពាក់លុយធនាគារជិត១ម៉ឺនដុល្លារ ចំពោះករណីចងកសម្លាប់ខ្លួននេះអាចមកពីស្ត្រីរងគ្រោះជំពាក់លុយគេ ខ្លាចប្តីដឹងផងដែរ។
ក្រោយកើតហេតុសមត្ថកិច្ច និងមន្រ្តីជំនាញបានធ្វើការពិនិត្យសាកសព ហើយបញ្ជាក់ថា ស្ត្រីរងគ្រោះ ពិតជាចងកសម្លាប់ខ្លួនឯងប្រាកដមែន រូចបានប្រគល់សពទៅឲ្យក្រុមគ្រួសារ យកទៅធ្វើបុណ្យតាមប្រពៃណី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
