រាជធានីភ្នំពេញ ៖ បុរសលក់ត្រីដុតអំបិលម្នាក់ បានឆ្លងចរន្តអគ្គិសនីពីរទេះលក់ត្រី បណ្តាលឱ្យឆក់ដាច់ផ្ងាររងរបួសធ្ងន់ ត្រូវបានសាច់ញាតិហៅរថយន្តដឹកទៅសង្គ្រោះនៅមន្ទីពេទ្យព្រះកុសុមៈ តែអកុសលបុរសខាងលើបានដាច់ខ្យល់ស្លាប់កណ្តាលផ្លូវមុនពេលបញ្ជូនដល់មន្ទីពេទ្យបាត់ទៅហើយ។
ករណីនេះបង្កភ្ញាក់ផ្អើកាលពីម៉ោង២៣និង០០នាទីយប់ ថ្ងៃទី២៥ ខែមីនា ឆ្នាំ២០១៧ នៅមុខវិទ្យាល័យជម្ពូវ័ន្ត លើកំណាត់ផ្លូវជាតិលេខ៤ ភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ។
បុរសដែលស្លាប់ឈ្មោះ ឃុត ឈុនលីន អាយុ២៧ឆ្នាំ មុខរបរអាំត្រីលក់ ស្នាក់នៅផ្ទះលេខ០៧ផ្លូវជាតិលេខ០៤ ភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ។
ប្រភពពីបុរសឈ្មោះ ប៉ុក ឡេង អាយុ៤២ឆ្នាំ មុខរបរលក់ទាខ្វៃ នៅក្បែជនរងគ្រោះបានប្រាប់ថា នាល្ងាចមុនកើតហេតុ មានភ្លៀងកក់ខែមួយមេយ៉ាងខ្លាំង បណ្តាលឱ្យកន្លែងលក់ដូរមានទឹកដក់នៅដី ហើយរូបគាត់ និងជនរងគ្រោះលក់ដូរបណ្តើរជជែកគ្នាលេងបណ្តើរ លុះដល់ម៉ោងខាងលើ ពេលដែលលក់ជិតដល់ម៉ោងរើឥវ៉ាន់ទៅផ្ទះទៅហើយនោះ ជនរងគ្រោះទៅឈរតោងនឹងរទេះអាំងត្រី ស្រាប់តែស្រែកខ្លាំងៗថា ឆក់ខ្សែរភ្លើង ពេលនោះគាត់ស្មានតែជនរងគ្រោះនិយាយលេងផង។
ប្រភពដដែលបានប្រាប់ទៀតថា ពេលនោះគាត់បានយកដៃទៅប៉ះជនរងគ្រោះធ្វើឱ្យឆក់មកខ្លួនគាត់ ទើបគាត់ស្ទុះទៅដកឌុយភ្លើង ហើយឃើញជនរងគ្រោះដាច់ផ្ងារមកក្រោយ ពេលឃើញសភាពបែបនោះគាត់ក៏ព្យាយាមសង្គ្រោះ និងហៅរថយន្តដឹកទៅសង្គ្រោះនៅមន្ទីរពេទ្យព្រះកុសុមៈ តែអកុសលបុរសខាងលើបានដាច់ខ្យល់ស្លាប់កណ្តាលផ្លូវមុនបញ្ជូនដល់មន្ទីរពេទ្យបាត់ទៅហើយ។
បច្ចុប្បន្នសពត្រូវបានក្រុមគ្រួសារដឹកមកផ្ទះវិញ និងធ្វើបុណ្យតាមប្រពៃណី៕
ប្រភព៖ កោះសន្តិភាព
ដោយឡែករំលឹកព័ត៌មានមួយផ្សេងទៀត៖ ចិនជំរិតចិន ! តែកុំចេះហ៊ាន ជាមួយប៉ូលិសខ្មែរ
ក្រុងប៉ោយប៉ែត ៖ សមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ សហការជាមួយស្នងការដ្ឋាននគរបាលខេត្តបន្ទាយមានជ័យ និងកម្លាំងវរការពារព្រំដែន៩១១ និងអ្នកសម្របសម្រួលអមសាលាដំបូងរាជធានីភ្នំពេញ និងអយ្យការខេត្តបន្ទាយមានជ័យ កាលពីរសៀលថ្ងៃទី២៤ មីនា បានចុះបង្ក្រាបករណីជនជាតិចិនចាប់បង្ខាំងមនុស្ស ដើម្បីជំរិតទារប្រាក់ពីជនជាតិដូចគ្នា ស្ថិតនៅសណ្ឋាគារមួយ ក្នុងក្រុងប៉ោយបែត ។
តាមប្រភពថា ជនសង្ស័យមានចំនួន៤នាក់ (ប្រុស៣នាក់ និងស្ត្រី១) ក្នុងនោះដែរ សមត្ថកិច្ចមានការរំដោះជនរងគ្រោះ ដែលជនសង្ស័យចាប់យកទៅបង្ខាំងទុក ដើម្បីជំរិតប្រាក់ ។ ជនសង្ស័យ១-ឈ្មោះ SUN TAO ភេទប្រុស អាយុ៣៥ឆ្នាំ ឈ្មោះនេះ ជាមេខ្លោងរៀបចំគំរោង ២-ឈ្មោះ WANG ZUCHAO ភេទប្រុស អាយុ៤៧ឆ្នាំ ៣-ឈ្មោះ ZHU LiULiN ភេទប្រុស អាយុ៤៤ឆ្នាំ (២នាក់នេះ ជាអ្នកយាមមុខបន្ទប់បង្ខាំងជនរងគ្រោះ និង៤-ឈ្មោះ CHENG AiZHEN ភេទស្រី អាយុ៦២ឆ្នាំ (ជាអ្នកនៅជាមួយជនរងគ្រោះ ដើម្បីផ្គត់ផ្គង់បាយទឹក) ។ រីឯជនរងគ្រោះឈ្មោះ YANG FANG ភេទស្រី អាយុ៣៨ឆ្នាំ ។
ប្រភពបន្តថា កាលពីថ្ងៃទី៦ មីនា ២០១៧ មានស្ត្រីជនជាតិចិនម្នាក់ (ជនរងគ្រោះ) ត្រូវបានក្រុមជនសង្ស័យ៤នាក់ អន្ទងឲ្យមកស្រុកខ្មែរ លុះពេលជនរងគ្រោះមកដល់ ពួកគេបានបបួលនាងទៅលេងល្បែងស៊ីសង នៅកាស៊ីណូក្រុងប៉ោយប៉ែត ចាញ់អស់ប្រាក់ជាង៣០ម៉ឺនដុល្លារអាមេរិក ។ ក្រោយចាញ់ល្បែងអស់ប្រាក់ជាង៣០ម៉ឺនដុល្លារហើយ ក្រុមជនសង្ស័យបានបង្ខាំងជនរងគ្រោះទុកនៅក្នុងសណ្ឋាគារ ។ ពេលមួយនោះ ប្តីនាងបានឆាតតាមហ្វេសប៊ុកទាក់ទងចុះឡើង ត្រូវជនសង្ស័យគំរាមទារប្រាក់ជាង២០ម៉ឺនដុល្លារ បានធ្វើការដោះលែងស្ត្រីជាប្រពន្ធវិញ ។
ដោយដឹងច្បាស់ថា ប្រពន្ធត្រូវធ្លាក់ក្នុងអន្ទាក់ក្រុមជនចាប់ជំរិតភ្លាម បុរសជាប្តីបានធ្វើដំណើរមកស្រុកខ្មែរ ហើយក៏បានទាក់ទងតាមលំដាប់លំដោយពីស្ថានទូតចិនប្រចាំនៅកម្ពុជា និងបានប្តឹងទៅសមត្តកិច្ចឲ្យជួយអន្តរាគមក្នុងរឿងនេះ ។ ក្រោយពីចាប់ឃាត់ខ្លួន សមត្ថកិច្ចបាននាំខ្លួនជនសង្ស័យទាំង៤នាក់ មកកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]