ខេត្តប៉ៃលិន ៖ បន្ទាប់កូនតុងទីន ៨នាក់បានលើកគ្នា ទៅដាក់ពាក្យបណ្តឹងនៅការិយាល័យនគរបាល ព្រហ្មទណ្ឌកម្រិតធ្ងន់ នៃស្នង ការនគរបាលខេត្តប៉ៃលិនឱ្យចាត់ការតាមផ្លូវច្បាប់ ករណីមេតុងទីនបានលេងក្បាច់ខូច គឺស៊ីដាច់លុយជាង៦២លានរៀល ដោយមិនព្រមសងពួកគេនោះ ។
ហេតុការណ៍ចាប់ខ្លួននេះ បានធ្វើឡើងកាលពីព្រឹកថ្ងៃទី២៤ មីនា បន្ទាប់ពីទទួលបានពាក្យបណ្តឹងកាលពីព្រឹកថ្ងៃទី១៨ មីនា កន្លងទៅ ។
ប្រភពពីលោកវរសេនីយ៍ឯក ឆម វ៉ាន់ធី នាយការិយាល័យនគរបាលព្រហ្មទណ្ឌកំរិតធ្ងន់ នៃស្នងការនគរបាលខេត្តប៉ៃលិន បានឱ្យដឹងថា ក្រោយទទួលបានពាក្យបណ្តឹងករណីរំលោភលើទំនុកចិត្ត (តុងទីន) ពីកូនតុងទីនចំនួន៨នាក់រួចមក ខាងលោកបានចាត់ឱ្យមន្ត្រីក្រោមឱវាទធ្វើការចុះស៊ើបអង្កេត និងឃាត់ខ្លួនមេតុងទីនឈ្មោះហូយ ណាវិន ហៅម៉ាក់ស្រីការ ភេទស្រី អាយុ២៩ឆ្នាំ ជាកសិករ រស់នៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ដែលធ្វើឱ្យមានការបាត់បង់ ខូតខាតលុយចំនួន៦២,៣៨០.០០០៛ (ហុកសិបពីរលានបីសែនប្រាំបីម៉ឺនរៀលគត់) ។
លោកបន្តទៀតថា ក្រោមការសម្របសម្រួ លលោក តូច សុភក្តី ព្រះរាជអាជ្ញាអមសាលាដំបូងខេត្តប៉ៃលិន ខាងលោកក៏បានបញ្ជាឱ្យន គរបាលក្រោមឱវាទចុះធ្វើការចាប់ខ្លួនស្ត្រីមេតុងទីនខាងលើនៅក្នុងផ្ទះរបស់ខ្លួន យកមកសាកសួរបន្ថែម ។ លោកបញ្ជាក់ទៀតថា ស្ត្រីខាងលើបានសារភាពថា រូបគេពិតជាបានធ្វើឱ្យបាត់បង់ ទឹកប្រាក់ជាង៦២លានរៀលមែន ដោយសារតែកូនតុងទីនមួយចំនួនអត់បង់លុយឱ្យ ហើយ រូបគេអត់មានលុយបង់ជំនួស ក៏ទុកចោលរហូតដល់មានពាក្យបណ្តឹងបែបនេះ ។ បច្ចុប្បន្ន ខាងការិយាល័យជំនាញកំពុងកសាងសំនុំរឿង ដើម្បីបញ្ជូនស្ត្រីខាងលើទៅ តុលាការ ឱ្យចាត់ការតាមនិតិវិធីច្បាប់ ។
សូមបញ្ជាក់ថា ការលេងតុងទីននេះ ធ្លាប់មានមេវេចលុយរត់អស់ជាច្រើននាក់រួចមកហើយនៅក្រុងប៉ៃលិន ក្នុងនោះ ក៏មានប្រពន្ធនគរបាលមួយចំនួនផងដែរ ជាមេតុងទីនបោកលុយប្រជាពលរដ្តតែម្តង ។ តែកូនតុងទីននៅតែមិនរាងចាល ដោយចង់បានប្រាក់ពីល្បែងមួយនេះខ្លាំងពេក ក៏បបួលគ្នាបន្តលេង ត្រូវគេបោកប្រាស់បន្តបន្ទាប់ជាហូរហែ ។
ដូច្នេះ បងប្អូនប្រជាពលរដ្ឋ ដែលមានលុយគួរតែយកទៅរក្សាទុក ឬរកស៊ីមុខរបរអ្វីម្យ៉ាងក្រៅ ពីលេងល្បែងមួយនេះ ទើបអាចមានសល់លុយកាក់ខ្លះសម្រាប់ក្រុមគ្រួសារ ៕
ប្រភព៖ កោះសន្តិភាព
ដោយឡែក ព័ត៌មានគួរឲ្យចាប់អារម្មណ៍មួយផ្សេងទៀត៖
អស្ចារ្យ... រៀនពេទ្យចប់ភ្លាម បើកផ្ទះព្យាបាលជំងឺភ្លាម
ខេត្តកំពង់ស្ពឺ ៖ កាលពីរសៀលថ្ងៃទី២៣ ខែមីនា ឆ្នាំ២០១៧ សមត្ថកិច្ចចម្រុះមួយក្រុមដឹកនាំដោយលោកវេជ្ជបណ្ឌិត ជិន កែវសុវណ្ណ អនុប្រធានមន្ទីរសុខាភិបាលខេត្តកំពង់ស្ពឺ និងជាប្រធានក្រុមការងារថ្នាក់ខេត្ត បានចុះពិនិត្យកន្លែងព្យាបាលជំងឺទូទៅរបស់និស្សិតពេទ្យម្នាក់ ដែលទើបនឹងបញ្ចប់ការសិក្សាបានយកសញ្ញាប័ត្ររបស់ខ្លួនមកដាក់តាំង ហើយបើកបន្ទប់ពិគ្រោះព្យាបាលជំងឺ ព្រមទាំងចេញលិខិតផ្សេងៗដល់អ្នកជំងឺទៀតផង។
គ្រូពេទ្យរូបនេះឈ្មោះ ញ៉ែម សុខម៉េង ភេទប្រុស អាយុ២៨ឆ្នាំ ស្នាក់នៅ និងបើកកន្លែងព្យាបាលជំងឺ ស្ថិតនៅភូមិរំដួល៨៨ ហៅផ្សារតាឡាត់ ឃុំអូរ ស្រុកភ្នំស្រួច ខេត្តកំពង់ស្ពឺ។
អ្វីដែលជាការកត់សម្គាល់ របស់សមត្ថកិច្ចចម្រុះនោះត្រង់ថា លោកគ្រូពេទ្យរូបនេះ បានបោះពុម្ពក្រដាសវេជ្ជបញ្ជា ដោយយកឈ្មោះមន្ទីរសុខាភិបាលខេត្តកំពង់ស្ពឺ មកដាក់ទៀតផង ដែលការដាក់ដូច្នេះត្រូវបានចាត់ទុកថា ខុសច្បាប់ ព្រោះតែរូបគាត់មិនមែនជាមន្ត្រីរាជការ ដែលបម្រើការក្នុងអង្គភាពរដ្ឋ ។ ការបើកអាជីវកម្មរកស៊ីបែបនេះ ត្រូវបានមន្ត្រីប្រាប់ថា វាជារឿងមិនត្រឹមត្រូវឡើយ ករណីនេះអាចហៅបានថា រកស៊ីបន្លំមហាជន ជាពិសេសប្រជាពលរដ្ឋ ដែលរស់នៅតំបន់ខាងលើតែម្តង។
ក្នុងការពិនិត្យនេះដែរ ក្រុមចម្រុះរកឃើញថា កន្លែងព្យាលជំងឺរបស់លោក ញ៉ែម សុខម៉េង បើកមិនត្រឹមត្រូវតាមស្តង់ដា និងខ្វះអនាម័យ ជាពិសេស គឺទូដាក់ថ្នាំតែម្តង។ ក្នុងការត្រួតពិនិត្យគណៈកម្មការចម្រុះបានណែនាំដល់គ្រូពេទ្យរូបនេះ ព្រមទាំងឱ្យធ្វើកិច្ចសន្យា៣ចំណុច ៖
ទី១-ឱ្យកាត់បន្ថយចំនួនគ្រែពីច្រើនមកតិច អាចនៅត្រឹម២គ្រែ កាត់បន្ថយមុខឱសថ ព្រមទាំងអនាម័យក្នុង និងក្រៅបរិវេណ ព្រមទាំងត្រួតពិនិត្យទុយោទីបអុកស៊ីហ្សែនផងដែរ
ទី២-ឈប់យកវេជ្ជបញ្ជាជ្រកក្រោមស្លាកមន្ទីរសុខាភិបាលមកប្រើប្រាស់ចាប់ពីថ្ងៃធ្វើកិច្ចសន្យានេះតទៅ
ទី៣-បើសិនជាថ្ងៃក្រោយលោក ញ៉ែម សុខម៉េង មិនគោរពតាមកិច្ចសន្យានេះទេ លោកសូមទទួលខុសត្រូវចំពោះមុខច្បាប់ទាំងស្រុង។
បើតាមគ្រូពេទ្យមួយរូបលើកឡើងថា តាមពិតនិស្សិតពេទ្យដែលទើបបញ្ចប់ការសិក្សាសាលារដ្ឋក្តី ឯកជនក្តី ត្រូវចុះធ្វើកម្មសិក្សារយៈពេល៣ឆ្នាំយ៉ាងតិច ទើបអាចសុំច្បាប់បើកអាជីកម្មបាន មិនមែនរៀនចប់ភ្លាមមកបើកភ្លាមនោះទេ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
