ខេត្តបន្ទាយមានជ័យ ៖ សមត្ថកិច្ចនាយកដ្នានគរបាល ព្រហ្មទណ្ឌក្រសួងមហាផ្ទៃ ដោយមានការសហការជាមួយ ស្នងការដ្ឋាននគរបាល ខេត្តបន្ទាយមានជ័យ និងកម្លាំងវរៈការពារព្រំដែន៩១១ ព្រមទាំងមានការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញ និងអយ្យការ នៃសាលាដំបូង ខេត្តបន្ទាយមានជ័យ នៅរសៀលថ្ងៃទី២៤ មីនា ២០១៧នេះ បានចុះបង្ក្រាបករណីជនជាតិចិនចាប់បង្ខាំងជំរិតទារប្រាក់ពីជនជាតិចិនដូចគ្នា នៅសណ្ឋាគារមួយក្នុងក្រុងប៉ោយបែត។
តាមមប្រភពព័ត៌មាន បានឲ្យដឹងថា ជនសង្ស័យដែលសមត្ថកិច្ច សហការចាប់ខ្លួននោះមាន៤នាក់ ប្រុស៣នាក់ និងស្ត្រីម្នាក់ ក្នុងនោះដែរសមត្ថកិច្ច ក៏មានការរំដោះជនរងគ្រោះដែលជនសង្ស័យ ចាប់យកទៅបង្ខាំងទុក ដើម្បីជំរិតទារប្រាក់។ ប្រភពបន្តថា កាលពីថ្ងៃទី៦ មីនា ២០១៧ មានស្ត្រីជនជាតិចិនម្នាក់ (ជនរងគ្រោះ)ត្រូវបានក្រុមជនសង្ស័យ៤នាក់អន្ទង ឲ្យមកលេងស្រុកខ្មែរ លុះពេលជនរងគ្រោះមកដល់ពួកគេបានបបួលនាងទៅលេងល្បែង ស៊ីសងនៅកាស៊ីណូក្រុងប៉ោយប៉ែត ចាញ់អស់ប្រាក់ជាង៣០ម៉ឺនដុល្លារអាមេរិក។
ក្រោយចាញ់ល្បែង អស់ប្រាក់ជាង ៣០ម៉ឺនដុល្លារហើយ ក្រុមជនសង្ស័យបានបង្ខាំងជនរងគ្រោះទុកនៅក្នុងសណ្ឋាគារ ពេលមួយនោះប្តី នាងបានឆាតតាមហ្វេសប៊ុកទាក់ទងចុះឡើង ត្រូវជនសង្ស័យគំរាម ទារប្រាក់ជាង២០ម៉ឺនដុល្លារ បានធ្វើការដោះលែងស្ត្រីជាប្រពន្ធវិញ។ ដោយដឹងច្បាស់ថា ប្រពន្ធត្រូវធ្លាក់ក្នុងអន្ទាក់ក្រុមជនចាប់ជំរិតភ្លាម បុរសជាប្តីបានធ្វើដំណើរមកស្រុកខ្មែរ ហើយក៏បានទាក់ទងតាមលំដាប់លំដោយពីស្ថានទូតចិនប្រចាំនៅកម្ពុជា និងបានប្តឹងទៅសមត្តកិច្ចឲ្យជួយអន្តរាគមក្នុងរឿងនេះ។
ប្រភពបន្តថា បន្ទាប់ពីមានពាក្យបណ្តឹង បុរសជាប្តីជនរងគ្រោះ លោកនាយឧត្តមសេនីយ៍អគ្គស្នងការនគរបាលជាតិ បានដាក់បទបញ្ជាទៅអគ្គស្នងការរងទទួលការងារព្រហ្មទណ្ឌ ប្រធាននាយកដ្ឋានកណ្តាល នគរបាលយុត្តិធម៌ និងទៅលោកឧត្តមសេនីយ៍ឯក សុខ ខេមរិន ប្រធាននាយកដ្ឋាននគរបាលព្រហ្មទណ្ឌ ឲ្យប្រើប្រាស់កម្លាំងជំនាញចុះទៅជាបន្ទាន់ដើម្បីក្រសោបជនសង្ស័យ និងរំដោះជនរងគ្រោះ។
ពេលនោះលោកឧត្តមសេនីយ៍ទោ ង៉េង ជួរ អនុប្រធាននាយកដ្ឋានដឹកនាំកម្លាំង ជាមួយលោកវរៈសេនីយ៍ឯក ជាវ វិបុល ប្រធានការិយាល័យនគរបាលព្រហ្មទណ្ឌកម្រិតធ្ងន់ ចេញទៅសហការជាមួយ ស្ថាប័នពាក់ព័ន្ធដូច បានរៀបរាប់ខាងលើ ពិសេសកម្លាំងនគរបាល វរៈការពារព្រំដែន៩១១ ដែលមានលោកវរៈសេនីយ៍ឯក សូ ចាន់ណារី ជាប្រធានអង្គភាព បានជួយសម្រួល និងការពារក្នុងរង្វង់កិច្ចសហប្រតិបត្តការចាប់ជនសង្ស័យ រួមទាំងរំដោះជនរងគ្រោះនោះ។ ក្រោយពីចាប់ឃាត់ខ្លួននៅរសៀលម៉ោង៣រសៀល ថ្ងៃទី២៤ នេះ សមត្ថកិច្ចបាននាំខ្លួនជនសង្ស័យទាំង៤នាក់មកកាន់នាយកដ្ឋាននគរបាល ព្រហ្មទណ្ឌក្រសួងមហាផ្ទៃ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួួយផ្សេងទៀត៖
អស្ចារ្យ... រៀនពេទ្យចប់ភ្លាម បើកផ្ទះព្យាបាលជំងឺភ្លាម
ខេត្តកំពង់ស្ពឺ ៖ កាលពីរសៀលថ្ងៃទី២៣ ខែមីនា ឆ្នាំ២០១៧ សមត្ថកិច្ចចម្រុះមួយក្រុមដឹកនាំដោយលោកវេជ្ជបណ្ឌិត ជិន កែវសុវណ្ណ អនុប្រធានមន្ទីរសុខាភិបាលខេត្តកំពង់ស្ពឺ និងជាប្រធានក្រុមការងារថ្នាក់ខេត្ត បានចុះពិនិត្យកន្លែងព្យាបាលជំងឺទូទៅរបស់និស្សិតពេទ្យម្នាក់ ដែលទើបនឹងបញ្ចប់ការសិក្សាបានយកសញ្ញាប័ត្ររបស់ខ្លួនមកដាក់តាំង ហើយបើកបន្ទប់ពិគ្រោះព្យាបាលជំងឺ ព្រមទាំងចេញលិខិតផ្សេងៗដល់អ្នកជំងឺទៀតផង។
គ្រូពេទ្យរូបនេះឈ្មោះ ញ៉ែម សុខម៉េង ភេទប្រុស អាយុ២៨ឆ្នាំ ស្នាក់នៅ និងបើកកន្លែងព្យាបាលជំងឺ ស្ថិតនៅភូមិរំដួល៨៨ ហៅផ្សារតាឡាត់ ឃុំអូរ ស្រុកភ្នំស្រួច ខេត្តកំពង់ស្ពឺ។
អ្វីដែលជាការកត់សម្គាល់ របស់សមត្ថកិច្ចចម្រុះនោះត្រង់ថា លោកគ្រូពេទ្យរូបនេះ បានបោះពុម្ពក្រដាសវេជ្ជបញ្ជា ដោយយកឈ្មោះមន្ទីរសុខាភិបាលខេត្តកំពង់ស្ពឺ មកដាក់ទៀតផង ដែលការដាក់ដូច្នេះត្រូវបានចាត់ទុកថា ខុសច្បាប់ ព្រោះតែរូបគាត់មិនមែនជាមន្ត្រីរាជការ ដែលបម្រើការក្នុងអង្គភាពរដ្ឋ ។ ការបើកអាជីវកម្មរកស៊ីបែបនេះ ត្រូវបានមន្ត្រីប្រាប់ថា វាជារឿងមិនត្រឹមត្រូវឡើយ ករណីនេះអាចហៅបានថា រកស៊ីបន្លំមហាជន ជាពិសេសប្រជាពលរដ្ឋ ដែលរស់នៅតំបន់ខាងលើតែម្តង។
ក្នុងការពិនិត្យនេះដែរ ក្រុមចម្រុះរកឃើញថា កន្លែងព្យាលជំងឺរបស់លោក ញ៉ែម សុខម៉េង បើកមិនត្រឹមត្រូវតាមស្តង់ដា និងខ្វះអនាម័យ ជាពិសេស គឺទូដាក់ថ្នាំតែម្តង។ ក្នុងការត្រួតពិនិត្យគណៈកម្មការចម្រុះបានណែនាំដល់គ្រូពេទ្យរូបនេះ ព្រមទាំងឱ្យធ្វើកិច្ចសន្យា៣ចំណុច ៖
ទី១-ឱ្យកាត់បន្ថយចំនួនគ្រែពីច្រើនមកតិច អាចនៅត្រឹម២គ្រែ កាត់បន្ថយមុខឱសថ ព្រមទាំងអនាម័យក្នុង និងក្រៅបរិវេណ ព្រមទាំងត្រួតពិនិត្យទុយោទីបអុកស៊ីហ្សែនផងដែរ
ទី២-ឈប់យកវេជ្ជបញ្ជាជ្រកក្រោមស្លាកមន្ទីរសុខាភិបាលមកប្រើប្រាស់ចាប់ពីថ្ងៃធ្វើកិច្ចសន្យានេះតទៅ
ទី៣-បើសិនជាថ្ងៃក្រោយលោក ញ៉ែម សុខម៉េង មិនគោរពតាមកិច្ចសន្យានេះទេ លោកសូមទទួលខុសត្រូវចំពោះមុខច្បាប់ទាំងស្រុង។
បើតាមគ្រូពេទ្យមួយរូបលើកឡើងថា តាមពិតនិស្សិតពេទ្យដែលទើបបញ្ចប់ការសិក្សាសាលារដ្ឋក្តី ឯកជនក្តី ត្រូវចុះធ្វើកម្មសិក្សារយៈពេល៣ឆ្នាំយ៉ាងតិច ទើបអាចសុំច្បាប់បើកអាជីកម្មបាន មិនមែនរៀនចប់ភ្លាមមកបើកភ្លាមនោះទេ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
