(ភ្នំពេញ)៖ ស្ត្រីចំណាស់ម្នាក់ បានធ្វើដំណើរមកពីទិញថ្នាំពេទ្យនៅមន្ទីពេទ្យកាល់ម៉ែត តាមបណ្តោយផ្លូវសហព័ន្ធរុស្ស៊ី ក៏ត្រូវចោរ២នាក់ជិះម៉ូតូ មួយគ្រឿងមិនចាំស្លាក់លេខ បានធ្វើសកម្មភាពឆក់កាបូបបានសម្រេច បណ្តាលឲ្យស្រ្តីរងគ្រោះ ដួលរងរបួសយ៉ាងដំណំ ភ្លាមៗនោះជនសង្ស័យបានជិះម៉ូតូរត់គេចខ្លួនបាត់ស្រមោល។
ហេតុការណ៍មួយនេះបានកើតឡើងនៅព្រឹកថ្ងៃទី២៤ ខែមីនា ឆ្នាំ២០១៧នេះ ស្ថិតនៅលើផ្លូវមហាវិថីសហព័ន្ធរុស្ស៊ី មុខព្រលានយន្តហោះអន្តរជាតិភ្នំពេញក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ។
សមត្ថកិច្ចបានឲ្យដឹងថា ស្រ្តីរងគ្រោះដែលត្រូវចោរឆក់កាបូបនោះ ឈ្មោះ ខៀវ សង អាយុ៥៥ ឆ្នាំមុខរបរនៅផ្ទះរស់នៅ ភូមិកំរៀង សង្កាត់ចោមចៅ ខណ្ឌដង្កោ រាជធានីភ្នំពេញ ជិះម៉ូតូម៉ាក «SUZUKI NEX» ពណ៌សលាយក្រហម ពាក់ស្លាក់លេខភ្នំពេញ 1DH-6148។
ស្ត្រីរងគ្រោះបានឲ្យដឹងថា នៅមុនកើតហេតុ គាត់បានធ្វើដំណើរចេញពីផ្ទះ ដើម្បីទៅទិញថ្នាំពេទ្យដើម្បីព្យាបាលជំងឺ នៅឯមន្ទីពេទ្យកាលម៉ែត ដោយគាត់ទិញថ្នាំរួចហើយ ក៏បានធ្វើដំណើរ ជិះតែម្នាកឯង ត្រឡប់មកផ្ទះវិញតាមបណ្តោយផ្លូវមហាវិថីសហព័ន្ធរុស្ស៊ី ស្រាប់តែមកដល់ចំណុចកើតហេតុខាងលើ ក៏លេចមុខជនសង្ស័យមានគ្នា២នាក់ ពាក់អាវធំពណ៌ខ្មៅ បានជិះធ្វើសកម្មភាពដោយម៉ូតូសង់ឌ្រីម ពណ៌ខ្មៅមិនចាំស្លាកលេខ បានឆក់កាបូបស្ពាយពីគាត់បានសម្រេច ហើយរួចជិះរត់គេចខ្លួនបាត់ស្រមោល តែម្តងបណ្តាលឲ្យរូបគាត់ ដួលរងរបួសយ៉ាងដំណំ។
ស្រ្តីរងគ្រោះខាងលើបានបន្តថា នៅក្នុងកាបូបនោះមាន លុយខ្មែរជាង៣០ម៉ឺនរៀល ទូរស័ព្ទ២គ្រឿង អត្តសញ្ញាណប័ណ្ណ១សន្លឹកនិងវត្ថុមានតំលៃមួយចំនួនទៀតផងដែរ។
ក្រោយកើតហេតុ ស្រ្តីរងគ្រោះបានធ្វើដំណើរ មកកាន់ប៉ុស្តិ៍នគរបាលរដ្ឋបាលចោមចៅ ដាក់ពាក្យបណ្តឹង ដើម្បីឲ្យសមត្ថកិច្ចស្រាវជ្រាវ តាមចាប់ជនសង្ស័យមកផ្តន់ទាទោសតាមច្បាប់៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ សមត្ថកិច្ចចាប់ខ្លួនគ្រូបោករឿងរៀបចំអាសនៈតាមផ្ទះលើករាសី ប្រគល់ជូនតុលាការ
រាជធានីភ្នំពេញ ៖ ស្ត្រីម្នាក់ដែលតាំងខ្លួនជាគ្រូទាយ និងចេះរៀបចំអាសនៈ តាមផ្ទះលើករាសី កាលពីថ្ងៃទី២០ មីនា ២០១៧ ត្រូវបានសមត្ថកិច្ចនគរបាលខណ្ឌ៧មករា ចាប់ឃាត់ខ្លួនបញ្ជូនទៅកាន់ សាលាដំបូងរាជធានីភ្នំពេញ ដើម្បីចាត់ការតាផ្លូវច្បាប់ពីបទឆបោកប្រាក់អ្នកដទៃ ចំនួន១.២០០ដុល្លារអាមេរិក។
ស្ត្រីជាគ្រូទាយម្នាក់ឈ្មោះ ជុំ ច័ន្ទសោភា អាយុ៤០ឆ្នាំ ស្នាក់នៅអគារD បន្ទប់លេខ២២ ជាន់ទី៥ ផ្លូវ២១ បុរីកីឡា សង្កាត់វាលវង់ ខណ្ឌ៧មករា រាជធានីភ្នំពេញ ។
អង្គហេតុបណ្តាលឲ្យ សមត្ថកិច្ចចាប់ខ្លួនស្ត្រី ជាគ្រូបោកម្នាក់នោះ ត្រូវបានគេដឹងថាកាលពីថ្ងៃទីទី១៧ កុម្ភៈ ២០១៧ ជនសង្ស័យឈ្មោះ ជុំ ច័ន្ទសោភា បានទាយអះអាងប្រាប់ឈ្មោះ អោម សារឿន ភេទស្រី អាយុ៤៧ឆ្នាំ ដែលជាមនុស្សធ្លាប់ស្គាល់គ្នាថា ខ្លួនជាគ្រូទាយ និងចេះរៀបចំអាសនៈ នៅក្នុងផ្ទះដើម្បីលើករាសី ឲ្យម្ចាស់រស់នៅបានសិរីសួស្តី សុខសប្បាយ និងមានលាភសក្ការៈហូរ ចូលគ្រប់បែបយ៉ាង។
ដោយសារការនិយាយស្តីបែបប៉ិនប្រសប់ ដែលធ្វើឲ្យជនរងគ្រោះអាចជឿទុកចិត្តបាន ជនរងគ្រោះក៏នាំស្រី្តជាគ្រូទាយរូបនោះឡើងទៅមើលដល់លើផ្ទះ ដើម្បីមើល និងរៀបចំអាសនៈថ្មីដូចដែលអ្វីគ្រូបោក បានបញ្ចុះបញ្ចូល។
សមត្ថកិច្ចបន្តថា ពេលគ្រូទាយបានទៅមើល កន្លែងដែលត្រូវរៀបចំអាសនៈថ្មីនោះហើយ គ្រូប៉ោកបានប្រាប់ជនរងគ្រោះថា បើចង់រៀបអាសនៈថ្មីឲ្យរកស៊ីមានបានចម្រុងចម្រើនលូតលាស់ ទាំងមុខរបរការងារជាមន្ត្រីរាជការ តម្រូវឲ្យម្ចាស់ផ្ទះចំណាយប្រាក់១.២០០ដុល្លារ ដើម្បីយកទៅទិញសម្ភារមករៀបចំ។
ជនរងគ្រោះហេតុតែមានជំនឿ ចង់បានសេចក្តីសុខគ្រប់បែបយ៉ាង និងចង់លើករាសីឲ្យរួចផុតពីប្រការទាំងឡាយ ដែលមិនល្អចូលខ្លួនចូលផ្ទះ សុខចិត្តប្រគល់ប្រាក់១.២០០ដុល្លារអាមេរិកឲ្យទៅស្ត្រី ដែលអះអាងថាជាគ្រូទាយនោះទៅ។
លុះពេលប្រគល់ប្រាក់១.២០០ដុល្លារឲ្យទៅគ្រូទាយនោះហើយ ក៏ទៅបាត់ទៅ បាត់រហូតគ្មានដំណឹង និងគ្មានការរៀបចំអាសនៈដូចកាលដែលបាននិយាយគ្នា សូម្បីទាក់ទងតាមទូរស័ព្ទក៏មិនទទួលជាច្រើនលើក ទើបជនរងគ្រោះសម្រេចិត្តប្តឹងសមត្ថកិច្ច ឲ្យជួយស្រាវជ្រាវ និងតាមចាប់ខ្លួនដើម្បីចាត់ការតាមផ្លូវច្បាប់។
ក្រោយពេលចាប់ខ្លួនស្ត្រីជាគ្រូបោក សមត្ថកិច្ចបានកសាង សំណុំរឿងបញ្ជូនទៅកាន់សាលាដំបូងរាជធានីភ្នំពេញ ដោយចោទប្រកាន់ពីបទឆបោក។ សំណុំរឿងនេះត្រូវបានតំណាងអយ្យការធ្វើការ ចោទប្រកាន់ជាផ្លូវការរួចហើយដែរ និងបានចាត់បញ្ជូនទៅខាងចៅក្រមស៊ើបសួរសម្រេចឃុំខ្លួន ដាក់ពន្ធនាគារជាបណ្តោះអាសន្ន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
