(មណ្ឌលគិរី)៖ ក្មេងប្រុសតូចៗ២នាក់បងប្អូន បានស្លាប់យ៉ាងវេទនា នៅក្នុងអណ្តាតភ្លើង គ្រាដែលផ្ទះរបស់ពួកគេ ត្រូវបានអគ្គិភ័យឆាបឆេះ នាយប់ថ្ងៃទី២៣ ខែមីនា ឆ្នាំ២០១៧ ស្ថិតនៅភូមិខ្ញែង ឃុំចុងផ្លាស់ ស្រុកកែវសីមា ខេត្តមណ្ឌលគិរី។ សម្រាប់គ្រោះថ្នាក់សង្គមមួយនេះ ត្រូវបានអភិបាលខេត្តមណ្ឌលគិរី លោក ស្វាយ សំអ៊ាង ស្តីបន្ទោសខ្លាំងៗចំពោះអាជ្ញាធរ និងសមត្ថកិច្ចដែលមានភាពយឺតយ៉ាវក្នុងការជួយអន្តរាគមន៍។
រហូតមកដល់ព្រឹកថ្ងៃទី២៤ ខែមីនា ឆ្នាំ២០១៧នេះ ក្រុមគ្រួសារ និងសមត្ថកិច្ចកំពុងកកាយរកឆ្អឹងសាកសពនៅក្នុងគំនរផេះ តែពុំទាន់រកឃើញនៅឡើយទេ។ នាយនគរបាលប៉ុស្តិ៍ឃុំចុងផ្លាស់ លោក ឡេវ វិបុល បានប្រាប់ភ្នាក់ងារ Fresh Newsថា ករណីភ្លើងឆេះផ្ទះខាងលើ សង្ស័យបណ្តាលមកពីការដុតភ្លើងទៀន។ សម្រាប់ហេតុការណ៍នេះ ឪពុកម្តាយបានរួចពីសេចក្តីស្លាប់ ដោយសារតែរត់រួច ហើយម្នាក់ៗនឹកស្មានថា យកកូនចេញហើយ។
អភិបាលខេត្តមណ្ឌលគិរី លោក ស្វាយ សំអ៊ាង បានស្តីបន្ទោសដល់អាជ្ញាធរ និងសមត្ថកិច្ចមូលដ្ឋានទីនោះថា មានការយឺតយ៉ាវក្នុងការជួយពន្លត់នៃករណីនេះ។ ទោះបីយ៉ាងណាលោកអភិបាលខេត្ត បាននិងកំពុងចាត់ចែងផ្តល់ជំនួយបឋម ជូនក្រុមគ្រួសាររងគ្រោះក្នុងហេតុការណ៍នេះដើម្បីជួយសម្រួលតាមតម្រូវការ។
បើតាមសមត្ថកិច្ច ផ្ទះមួយខ្នងសង់ពីឈើប្រកស័ង្កសី ទទឹង៦ម៉ែត្រ និងបណ្តោយ៧ម៉ែត្រនៅភូមិខ្ញែង (ហៅត្រពាំងឈូក)ឃុំចុងផ្លាស់ ស្រុកកែវសីមា ខេត្តមណ្ឌលគិរី ត្រូវបានភ្លើងឆេះខ្ទេច កាលពីវេលាម៉ោង១០និង១០នាទីយប់ថ្ងៃទី២៣ ខែមីនា ឆ្នាំ២០១៧ បណ្តាលឲ្យជីវិតក្មេងចំនួន២នាក់បង
ប្អូនស្លាប់យ៉ាងវេទនា។ ក្មេងប្រុសរងគ្រោះបងមានអាយុ៤ ឆ្នាំ និងប្អូនស្រីម្នាក់ទៀតអាយុ២ឆ្នាំ ត្រូវភ្លើងឆេះក្នុងគំនរផេះផង់ និងខូចខាតអស់ទ្រព្យសម្បត្តិជាច្រើនទៀតផង។
ទោះបីផ្លូវទៅកាន់ទីនោះ មានសភាពលំបាកយ៉ាងណាក៏ដោយ លោក ស្វាយ សំអ៊ាង កំពុងចាត់ចែងឲ្យកាកបាទក្រហមសាខា ខេត្តមណ្ឌលគិរី ចុះទៅកាន់ទីកន្លែងកើតហេតុដើម្បីយកជំនួយទៅផ្តល់ជូនក្រុមគ្រួសាររងគ្រោះ។ លោក ស្វាយ សំអ៊ាង បានថ្លែងប្រាប់ភ្នាក់ងារ Fresh News ថា «ក្នុងនាមរដ្ឋបាលសាលាខេត្តមណ្ឌលគិរី ខ្ញុំកំពុងចាត់ចែងឲ្យមន្រ្តីសាលាខេត្ត ធ្វើការពិនិត្យទំហំ នៃការខូចខាតនេះហើយបន្ទាប់មកខេត្ត នឹងធ្វើការសាងសង់ផ្ទះជូនគ្រួសាររងគ្រោះខាងលើនេះ ឲ្យមានផ្ទះសម្បែងសម្រាប់ជ្រោកកោនឡើងវិញផងដែរ»៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ បុរសជាប្ដីចោទថាគ្រូពេទ្យធ្វេសប្រហែស ទើបប្រពន្ធគាត់ស្លាប់ក្រោយសម្រាលកូន
ខេត្តបន្ទាយមានជ័យ ៖ ស្ត្រីម្នាក់បានដាច់ខ្យល់ស្លាប់ ក្នុងពេលបញ្ជូនតាមរថយន្តសង្គ្រោះទៅកាន់មន្ទីរពេទ្យ មិត្តភាពកម្ពុជាជប៉ុនមង្គលបូរី កាលពីរសៀលថ្ងៃទី២២ មីនា ២០១៧ ក្រោយសម្រាល បានកូនប្រុសម្នាក់ តែឈាមធ្លាក់ច្រើនពេក ខណៈបុរសជាប្តីទ្រហោយំ ដង្ហើយរកយុត្តិធម៌ចោទថា ដោយសារគ្រូពេទ្យមានការធ្វេសប្រហែសទើបប្រពន្ធគាត់ស្លាប់។ ជនរងគ្រោះឈ្មោះ ហៀត ចាន់នី អាយុ២៩ឆ្នាំ ជាកម្មករអូសរទេះនៅច្រកទ្វារ អន្តរជាតិប៉ោយប៉ែត និងមានទីលំនៅភូមិក្បាលស្ពាន សង្កាត់និងក្រុងប៉ោយប៉ែត។
ស្ត្រីរងគ្រោះមានកូន ក្នុងបន្ទុក៤នាក់ រួមទាំងកូនប្រុសដែលទើបសម្រាលគ្រាន់តែឃើញពន្លឺថ្ងៃត្រូវម្តាយស្លាប់ចោល។ តាមបុរសជាប្តីស្ត្រីរងគ្រោះឈ្មោះ សុខ ភីរម្យ អាយុ៤៨ឆ្នាំ មុខរបរជាកម្មករអូសរទេះដែរនោះ បានប្រាប់កោះសន្តិភាពតាមទូរស័ព្ទទាំងទ្រហោយំថា ការពិតប្រពន្ធរបស់គាត់មិនគួរស្លាប់ទេ ព្រោះជាកូនទី៤ទៅហើយៗគាត់បានចោទប្រកាន់ថាករណីខាងលើ អាចបណ្តាលមកពីគ្រូពេទ្យមានការធ្វេសប្រហែសធ្វើឲ្យដាច់កន្ទុយលិន ក្នុងពេលសម្រាល ទើបប្រពន្ធគាត់ស្លាប់។
បុរសខាងលើបន្តថា ប្រពន្ធគាត់បានស្លាប់ ក្រោយបញ្ជូនចេញពីមន្ទីរពេទ្យមួយភ្លែតពោលគឺ ស្លាប់ម្តុំវត្តថ្មី ភូមិបាលិលេយ្យ សង្កាត់ប៉ោយប៉ែត ចម្ងាយពីមន្ទីរពេទ្យមិនបាន៥គីឡូម៉ែត្រផង។ បុរសខាងលើបញ្ជាក់ថា ក្រោយពិធីបុណ្យសពប្រពន្ធរួចនឹងដាក់ពាក្យបណ្តឹងពីក្រុមគ្រូពេទ្យ ដើម្បីទាមទាររកយុត្តិធម៌ហើយ ថាប្រសិនបើមិនទទួលបានភាពយុត្តិធម៌ទេ គាត់នឹងបីកូនប្រុស ដែលទើបស្គាល់ពន្លឺថ្ងៃនោះ ទៅកាន់ស្ថានីយ៍ទូរទស្សដើម្បីឲ្យគេឃើញជាសាធារណៈ ព្រោះជីវភាពក្រីក្រ ពុំមានលទ្ធភាពចិញ្ចឹមកូនប្រុសស្រីទាំង៤នោះទេ។
ជុំវិញបញ្ហាខាងលើ លោកវេជ្ជបណ្ឌិត ហ៊ុល សុផល្លី ប្រធានមន្ទីរពេទ្យបង្អែកក្រុងប៉ោយប៉ែត ប្រាប់កោះសន្តិភាពតាមទូរស័ព្ទ នៅព្រឹកថ្ងៃទី២៣ មីនា ដោយច្រានចោលការចោទប្រកាន់ពីគ្រួសាររងគ្រោះ ហើយថា ការពិតគ្រូពេទ្យរបស់គាត់បានខំប្រឹងប្រែងអស់ពីសមត្ថភាព ដើម្បីជួយស្ត្រីរងគ្រោះ។
លោកបន្តថា ករណីខាងលើ ដោយសារក្រោយសម្រាលឈាម មិនកកគឺហូរច្រើនខាងមន្ទីរពេទ្យលោក បានចាត់បញ្ជូនទៅសង្គ្រោះបន្ទាន់ នៅមន្ទីរពេទ្យមិត្តភាពកម្ពុជាជប៉ុនមង្គលបូរី តែជនរងគ្រោះបានដាច់ខ្យល់ ស្លាប់តាមដងផ្លូវ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
