(ភ្នំពេញ)៖ ដើម្បីជួយលើកកម្ពស់ដល់ជីវភាព និងការរស់នៅរបស់មន្ត្រីរាជការ គ្រូបង្រៀន កម្លាំងប្រដាប់អាវុធគ្រប់ប្រភេទ រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ បានរកចិត្តទុកដាក់យ៉ាងខ្លាំង ក្នុងការដំឡើងប្រាក់បៀវត្សរ៍ ជូនដល់មន្ត្រីរាជការ កម្លាំងប្រដាប់អាវុធ ពិសេសលោកគ្រូ អ្នកគ្រូ ដែលមានចំនួនរហូតដល់ជាង១០ម៉ឺននាក់។

ចាប់ពីថ្ងៃទី១ ខែមេសា ឆ្នាំ២០១៧ ពោលគឺមុនបុណ្យចូលឆ្នាំខ្មែរមកដល់ ដើម្បីចែករំលែកភាពរីករាយ ជូនដល់មន្ត្រីរាជការ គ្រូបង្រៀន និងកម្លាំងប្រដាប់អាវុធ រាជរដ្ឋាភិបាលបានសម្រេចដំឡើងប្រាក់បំណាច់មុខងារ បន្ថែមលើប្រាក់បៀវត្សរ៍គោល។

ចំពោះគ្រូបង្រៀនបន្ទាប់ពីបន្ថែមប្រាក់បំណាច់មុខងារ លើប្រាក់បៀវត្សរ៍គោល ធ្វើឲ្យគ្រូបង្រៀនកម្រិតទាបបំផុត មានប្រាក់ខែ៩៥៣,៥០០រៀល និងខ្ពស់បំផុតចំនួន២,២៦៥,០០០រៀល ដោយប្រាក់ខែនេះមិនទាន់បូក បញ្ចូលប្រាក់វិភាជន៍គ្រួសារ (ប្រសិនបើកគ្រូបង្រៀនមានប្រពន្ធ និងកូន) និងប្រាក់តំបន់សម្រាប់វិស័យអប់រំ នៅឡើយនោះទេ។ ប្រសិនបើបូកបញ្ចូលប្រាក់ទាំង២មុខនេះទៀត ច្បាស់ណាស់គ្រូបង្រៀន នឹងអាចឡើងប្រាក់ខែ ដល់១លានរៀលហើយ។

លោក យក់ ប៊ុនណា រដ្ឋលេខាធិការ និងជាអ្នកនាំពាក្យ ក្រសួងមុខងារសាធារណៈ បានថ្លែងប្រាប់អង្គភាព Fresh News ឲ្យដឹងថា ចាប់ពីខែមេសា ឆ្នាំ២០១៧ តទៅប្រាក់ខែគ្រូបង្រៀន នឹងត្រូវឡើងដូចខាងក្រោម៖

បៀវត្សខ្ពស់បំផុត សម្រាបអប់រំក្នុងមុខតំណែង៖

* នាយកវិទ្យាស្ថានជាតិ ទទួលបាន ២,២៦៥,០០០រៀល។

* គ្រូបង្រៀនកម្រិតឧត្តម បង្រៀននៅមហាវិទ្យាល័យទទួលបាន ១,៥៩៥,០០០រៀល។

* គ្រូបង្រៀនកម្រិតឧត្តមបង្រៀននៅវិទ្យាល័យទទួលបាន ១,៥១៥,០០០រៀល។

* នាយកវិទ្យាល័យ ទទួលបាន ១,៧០៥,០០០រៀល។

* គ្រូបង្រៀនកម្រិតមូលដ្ឋាន បង្រៀននៅអនុវិទ្យាល័យ ទទួលបាន ១,៣៥៣,០០០រៀល។

* នាយកអនុវិទ្យាល័យទទួលបាន ១,៥១៣,០០០រៀល។

* គ្រូបង្រៀនកម្រិតបឋមបង្រៀន នៅបឋមសិក្សា និងមត្តេយ្យសិក្សា ទទួលបាន ១,១៩១,០០០រៀល។

* នាយកបឋមសិក្សា ទទួលបាន ១,៣៣១,០០០រៀល។

* នាយកមត្តេយ្យសិក្សា ទទួលបាន ១,៣១១,០០០រៀល។

បៀវត្សទាបបំផុតរបស់គ្រូបង្រៀន ទទួលបាន ៩៥៣,៥០០រៀល។

អ្នកនាំពាក្យរូបនេះ បានបញ្ជាក់ទៀតថា ប្រាក់បៀវត្សរ៍ខាងលើនេះ គិតបញ្ចូលតែ បៀវត្សមូលដ្ឋាន និងប្រាក់បំណាច់មុខងារ នៅមិនទាន់បូកបន្ថែម អាចជាប្រាក់វិភាជន៍គ្រួសារ (ប្រពន្ធ និងកូន) ដែលប្រពន្ធទទួលបាន ១៥,០០០រៀល, កូនម្នាក់ ទទួលបាន១០,០០០រៀល និងប្រាក់តំបន់ដែលចែកចេញជា៣ប្រភេទទៅតាមជិត និងឆ្ងាយ ដែលមានចំនួន ៨០,០០០រៀល, ១០០,០០០រៀល និងខ្ពស់បំផុត ១២០,០០០រៀល។

ក្រៅតែពីការដំឡើងប្រាក់បៀវត្សរ៍ មុខចូលឆ្នាំខ្មែរហើយនោះ រាជរដ្ឋាភិបាលកម្ពុជា ថែមទាំងផ្ដល់នូវប្រាក់ឧបត្ថម្ភ ក្នុងឱកាសបុណ្យ​ចូល​ឆ្នាំ​ខែ្មរ ជូនមន្ត្រីរាជការ គ្រូបង្រៀន កម្លាំងប្រដាប់អាវុធផងដែរ ដោយក្នុងម្នាក់ៗទទួលបានថវិកា៥ម៉ឺនរៀល ដែលសរុបទាំងអស់ត្រូវចំណាយថវិកាប្រមាណ ៧​លានដុល្លាអាមេរិក។

សម្តេចតេជោ ហ៊ុន សែន នាយករដ្ឋមន្ត្រីនៅថ្ងៃទី២២ ខែមីនាម្សិញមិញ ក្នុងឱកាសអញ្ជើញជាអធិបតីភាពប្រគល់សញ្ញាបត្រជូនគរុសិស្សជិត១ពាន់នាក់ ក្នុងវិទ្យាស្ថានជាតិអប់រំ បានថ្លែងបញ្ជាក់ជូនប្រជាពលរដ្ឋ មន្ត្រីរាជការ កម្លាំងប្រដាប់អាវុធ គ្រូបង្រៀន អំពីផលប្រយោជន៍ជាច្រើនដែលពួកគាត់នឹងទទួលបាន ចាប់ពីថ្ងៃទី១ ខែមេសា ឆ្នាំ២០១៧ខាងមុខនេះ។

ផលប្រយោជន៍ដែលប្រជាពលរដ្ឋ មន្ត្រីរាជការ កម្លាំងប្រដាប់អាវុធ គ្រូបង្រៀន ដែលនឹងទទួលបានរួមមានទី១៖ ការបញ្ជុះអត្រាការប្រាក់ សម្រាប់ប្រាក់កម្ចី ដែលសម្តេចតេជោ អះអាងថា ពីចំនួនលើសពី២៥% ក្នុង១ឆ្នាំ មកនូវត្រឹម១៨%ក្នុង១ឆ្នាំ។ ទី២៖ ការបញ្ជុះតម្លៃអគ្គិសនី។ ទី៣៖ ការបញ្ជុះតម្លៃទឹក និងទី៤៖ ការដំឡើងប្រាក់បៀវត្សរ៍ជូនមន្ត្រីរាជការ កម្លាំងប្រដាប់អាវុធ។

សម្តេចតេជោ ហ៊ុន សែន បានបញ្ជាក់ទៀតថា ប្រកាប់ខែគ្រូបង្រៀន មន្ត្រីរាជការ កម្លាំងប្រដាប់អាវុធទាំងអស់នៅត្រូវបើកនៅថ្ងៃទី២៣ ខែមីនា ឆ្នាំ២០១៧នេះ៕

ប្រភព៖ Fresh News

ដោយឡែករំលឹកព័ត៌មានមួយផ្សេងទៀត៖ សត្វដំរីស្តមួយក្បាលដែលងាប់នៅជើងភ្នំគិរីរម្យ ត្រូវយកទៅកប់នៅឧទ្យានសួនសត្វភ្នំតាម៉ៅ គោលបំណងខ្លាចមានជន​ខិលខូច លួចគាស់យក​គ្រោងឆ្អឹង

(តាកែវ)៖ សត្វដំរីស្ដមួយក្បាល ដែលបានងាប់ដោយខ្សែភ្លើងបញ្ជូនតង់ស្យុងឆក់ នៅក្នុងឧទ្យានព្រះកុសមៈ គីរីរម្យភូមិសាស្ដ្រ ភូមិស្ទឹងច្រាល ឃុំអូបាត់រទេះ ស្រុកកំពង់សីលា ខេត្តព្រះសីហនុ ត្រូវបានមន្រ្តីអនុរក្សរៀបចំពិធី និងកប់ទុកនៅឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ នាព្រឹកថ្ងៃទី២៣ ខែមីនា ឆ្នាំ២០១៧។

មន្រ្តីសួនសត្វភ្នំតាម៉ៅបានឲ្យដឹងថា «គោលបំណងនៃការយកដំរីនេះ មកកប់ទុកនៅភ្នំតាម៉ៅ រួមមាន៖

ទី១- ដើម្បីរក្សាសុវត្ថិភាពចៀសវាង មានជនខិលខូចលួចគាស់យកផ្នែកផ្សេងៗ នៃគ្រោងឆ្អឹងរបស់សត្វដំរីនេះ

ទី២- ជាសារអប់រំដល់មនុស្សគ្រប់វ័យឲ្យចេះស្រឡាញ់ និងចូលរួមក្នុងការថែរក្សាការពាសត្វព្រៃ និង

ទី៣- អាចកាយគាស់យកគ្រោងឆ្ឆឹងនាពេសក្រោយ ដើម្បីរៀបចំជាសំណាកសម្រាប់ដាក់តាំងពិព័រ នៅក្រសួងបរិស្ថាន សារៈមន្ទីរ ឬមជ្ឈមណ្ឌលដ៏ទៃទៀត ដើម្បីបម្រើឲ្យការអប់រំផ្សព្វផ្សាយ និងការសិក្សាស្រាវជ្រាវវិទ្យាសាស្ដ្រនានា។

សូមបញ្ជាក់ថា ដំរីដ៏ធំមួយក្បាលទម្ងន់ប្រមាណ៥តោន ត្រូវបានប្រជាពលរដ្ឋមូលដ្ឋាន ប្រទះឃើញដេកងាប់នាព្រឹកថ្ងៃទី២២ ខែមីនា ឆ្នាំ២០១៧នេះ ស្ថិតនៅតាមជើងភ្នំតំបន់គីរីរម្យជាប់ ក្នុងទឹកដីស្រុកកំពង់សីលា ខេត្តព្រះសីហនុ ព្រំប្រទល់ស្រុកភ្នំស្រួច ខេត្តកំពង់ស្ពឺ។

បើតាមរបាយការណ៍របស់មន្ទីរព័ត៌មាន ខេត្តព្រះសីហនុ មន្ត្រីឧទ្យានុរក្ស នៃមន្ទីរបរិស្ថានខេត្ត ព្រះសីហនុ បានបញ្ជាក់ថា មូលហេតុដែលនាំឲ្យដំរីមួយក្បាលនេះ ដេកងាប់​ដោយសារត្រូវខ្សែភ្លើងឆក់។

មន្រ្តីឧទ្យានុរក្សបានបន្តថា «ហ្វូងសត្វដំរីវា បានចុះពីព្រៃមកត្រដុះនឹងបង្គោលភ្លើង ដែលកន្លងមក ហ្វូងសត្វដំរីទាំងនោះតែង

តែចុះពីភ្នំមកស៊ីដំណាំក្នុងចំាការរបស់ប្រជាពលរដ្ឋ នៅពេលយប់ និងធ្លាប់បានធ្វើឲ្យបង្គោលភ្លើងកម្លាំងខ្លាំង អូតង់ស្យុង បាក់រលំកន្លងរួចមកហើយ»៕ 

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]