(ភ្នំពេញ)៖ ឃាតករ ជួប សម្លាប់ ត្រូវបានតុលាការសម្រេចកាត់ទោសដាក់គុកមួយជីវិត ពាក់ព័ន្ធករណីបាញ់សម្លាប់បណ្ឌិត កែម ឡី នេះបើយោងតាមមន្រ្តីតុលាការឲ្យដឹងមុននេះបន្តិច។
នៅព្រឹកថ្ងៃទី២៣ ខែមីនា ឆ្នាំ២០១៧ នេះ សាលាដំបូងរាជធានីភ្នំពេញ បានបើកសវនាការប្រកាសសាលក្រម នៃសំណុំរឿង លោក «ជួប សម្លាប់» ពាក់ព័ន្ធនឹងករណីបាញ់សម្លាប់ លោកបណ្ឌិត កែម ឡី។ ការប្រកាសសាលក្រមនេះ ធ្វើឡើងបន្ទាប់ពីតុលាការក្រុងភ្នំពេញ បានបើកសវនាការ កាលពីថ្ងៃទី០១ ខែមីនា ឆ្នាំ២០១៧ ជាមួយនឹងការបង្ហាញវិដេអូមួយ ស្តីអំពីឃាតកម្មនេះ។
លោក ជួប សម្លាប់ ត្រូវបានមន្ត្រីពន្ធនាគារ នាំទៅដល់សាលាដំបូងរាជធានីភ្នំពេញនៅវេលាម៉ោង៨៖០០នាទី ព្រឹកថ្ងៃព្រហស្បតិ៍នេះ ដេីម្បីស្តាប់សាលក្រម។ ចំណែកសន្តិសុខ នៅសាលាដំបូងរាជធានីភ្នំពេញ ត្រូវបានរឹតបន្តឹងខុសធម្មតា។
នៅក្នុងសវនាការជាបន្តបន្ទាប់កន្លងទៅនោះ លោក «ជួប សម្លាប់» បានសារភាពថា ខ្លួនជាអ្នកបាញ់សម្លាប់ លោកបណ្ឌិត កែម ឡី ដោយសារខឹងលោក កែម ឡី ជំពាក់ប្រាក់មិនសង ហើយអះអាងថា គ្មានអ្នកនៅពីក្រោយខ្នងនៃឃាតកម្មនេះនោះទេ។
សូមបញ្ជាក់ថា បុរសម្នាក់ ដែលមានរហ័សនាមថា «ជួប សម្លាប់» អាយុ៣៨ឆ្នាំ ត្រូវបានសមត្ថកិច្ចឃាត់ខ្លួនភ្លាមៗ ក្រោយពីបាញ់សម្លាប់លោកបណ្ឌិត កែម ឡី កាលពីវេលាម៉ោង៨៖៥០នាទី ព្រឹកថ្ងៃទី១០ ខែកក្កដា ឆ្នាំ២០១៦ នៅចំណុចក្នុងទីតាំងស្តារម៉ាត នៃស្ថានីយប្រេងឥន្ធនៈកាល់តិច បូកគោ ស្ថិតនៅកាច់ជ្រុងមហាវិថីព្រះមុនីវង្ស និងមហាវិថីម៉ៅសេទុង ក្នុងសង្កាត់ទន្លេបាសាក់ ខណ្ឌចំការមន។
ក្រោយការចាប់ខ្លួននេះ តំណាងអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់ «ជួប សម្លាប់» ចំនួន២ករណី ក្នុងនោះរួមមានបទឃាតកម្មគិតទុកជាមុន និង បទកាន់កាប់អាវុធគ្មានការអនុញ្ញាត៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ «កុំទុកចិត្តមេឃ កុំទុកចិត្តផ្កាយ» ចុងក្រោយអស់សង្ឃឹម !!!
រាជធានីភ្នំពេញ ៖ បុរសខិលខូចម្នាក់បានធ្វើសកម្មភាពឆបោកយកម៉ូតូរបស់យុវជនម្នាក់ដែលជាអ្នកស្គាល់គ្នា ដោយបុរសនោះបានប្រើល្បិចខ្ចីជិះ ដោយប្រាប់ថា ជិះទៅយកម្ហូបតែមួយភ្លែតប៉ុណ្ណោះ ខណៈនោះព្រោះតែមនុស្ស រាប់អានគ្នា ទើបយុវជនរងគ្រោះព្រមឲ្យខ្ចី ហើយបុរសកំហូចនោះក៏បានយកម៉ូតូជិះទៅបាត់រហូត បន្ទាប់មកជនរងគ្រោះបានតាមរកគ្រប់កន្លែង នៅតែមិនបានឃើញនោះឡើយ លុះ១អាទិត្យក្រោយមក ទើបមានអ្នកប្រទះឃើញបុរសនោះ ក៏បានខលប្រាប់ឲ្យយុវជនម្ចាស់ម៉ូតូទៅឃាត់ខ្លួនប្រគល់ឲ្យនគរបាលប៉ុស្ដិ៍ចោមចៅតែម្ដង។
ហេតុការណ៏នោះបានកើតឡើងតាំងពីថ្ងៃទី១៥ ខែមីនា ឆ្នាំ២០១៧ មកម្ល៉េះ នៅជិតផ្សារត្រពាំងក្រឡឹង ស្រុកភ្នំស្រួច ខេត្តកំពង់ស្ពឺ។ ប៉ុន្តែជនរងគ្រោះបានតាមឃាត់ខ្លួនបាន កាលពីវេលាម៉ោង៧និង៣០នាទីព្រឹក ថ្ងៃទី២២ ខែមីនា ឆ្នាំ២០១៧ នៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យខាងលើនោះឈ្មោះ នឹម វ៉ាន់ថា អាយុ៤០ឆ្នាំ មុខរបរកម្មករសំណង់ មានទីលំនៅក្នុងភូមិព្រែកជ្រៅ ឃុំព្រែកដំបង ស្រុកមុខកំពូល ខេត្តកណ្ដាល។ ជននោះបានធ្វើសកម្មភាពបោកយកម៉ូតូ១គ្រឿងម៉ាកហុងដា ឌ្រីមសេ១២៥ ពណ៌ខ្មៅ ស៊េរីឆ្នាំ២០១៥ ដែលជាកម្មសិទ្ធិរបស់យុវជនម្នាក់ វ៉ាន់ ណារ៉ា អាយុ២១ឆ្នាំ មុខរបរកម្មករសំណង់ មានទីលំនៅក្នុងភូមិត្រពាំងពោធិ៍ ឃុំត្រពាំងល្វា ស្រុកឧដុង្គ ខេត្តកំពង់ស្ពឺ។
យុវជនម្ចាស់ម៉ូតូបាននិយាយថា មុនពេលកើតហេតុ ខណៈខ្លួនទៅធ្វើការងារសំណង់នៅឯនៅជិតផ្សារត្រពាំងក្រឡឹង ស្រុកភ្នំស្រួច ខេត្តកំពង់ស្ពឺ ស្រាប់តែជនសង្ស័យខាងលើទៅប្រាប់ថា ថ្ងៃនេះក្មួយរបស់គាត់ភ្ជាប់ពាក្យ លុះដល់ពេលហូបបាយថ្ងៃត្រង់ ក៏បានហូបបាយជុំគ្នា ហើយជននោះបានខ្ចីម៉ូតូខ្លួនជិះដោយប្រាប់ថា ម្ហូបយើងតិចពេក គាត់ខ្ចីម៉ូតូជិះទៅយកម្ហូបនៅផ្ទះក្មួយដែលភ្ជាប់ពាក្យនោះមកហូបជុំគ្នា។
ខណៈនោះដោយសារតែជាមនុស្សស្គាល់គ្នា ទើបខ្លួនឲ្យខ្ចី ហើយបុរសនោះក៏បានយកទៅបាត់រហូតតែម្ដង បន្ទាប់ពីដឹងថា ចាញ់បោកជននោះ ខ្លួនបានតាមរកគ្រប់កន្លែង ប៉ុន្តែមិនឃើញឡើយ រហូតដល់វេលាម៉ោង៧និង៣០នាទីព្រឹក ថ្ងៃទី ២២ មីនា ស្រាប់តែមានអ្នកប្រទះឃើញជននោះកំពុងស្ថិតនៅក្នុងភូមិត្រពាំងថ្លឹង សង្កាត់ចោមចៅ ហើយបានខលប្រាប់ ទើបខ្លួននាំបងប្អូនចុះទៅធ្វើការចាប់ខ្លួនប្រគល់ឲ្យនគរបាលប៉ុស្ដិ៍ចោមចៅ។
ក្រោយពេលចាប់ខ្លួនបានជននោះបានសារភាពថា ខ្លួនពិតជាបានធ្វើសកម្មភាពឆបោកយកម៉ូតូ១គ្រឿងនោះមែន ប៉ុន្តែមិនបានលក់នោះឡើយ ក្រោយពេលបោកបានពីយុវជនខាងលើ ខ្លួនបានជិះទៅជួបជាមួយមិត្តភក្ដិម្នាក់ទៀត ហើយក៏ត្រូវបានមិត្តភក្ដិនោះខ្ចីជិះទៅទិញថ្នាំពេទ្យ រួចក៏បានបោកយកបន្តទៅបាត់តែម្ដង ។ ខ្លួនកំពុងតាមរកមិត្តភក្ដិដែលបោកយកម៉ូតូនោះមិនទាន់ឃើញផង ក៏ត្រូវបានមកម្ចាស់ម៉ូតូតាមរកឃើញ និងបានចាប់ខ្លួនប្រគល់ឲ្យនគរបាលបែបនេះ។
នគរបាលប៉ុស្ដិ៍ចោមចៅបាននិយាយថា ក្រោយពេលឃាត់ខ្លួនជនសង្ស័យបាន ម្ចាស់ម៉ូតូបានទាមទារ សំណងចំនួន១.៥០០ដុល្លារ ប៉ុន្តែជនសង្ស័យបានអង្វរសុំម្ចាស់ម៉ូតូឲ្យទទួលយកត្រឹម៨០០ដុល្លារបាន ហើយ ព្រោះខ្លួនមានលទ្ធភាពត្រឹមតែប៉ុណ្ណឹងទេ ប៉ុន្តែយុវជនម្ចាស់ម៉ូតូមិនព្រមយកឡើយ ហើយដោយសារតែទីតាំងកើតហេតុ ស្ថិតនៅជិតផ្សារត្រពាំងក្រឡឹង ស្រុកភ្នំស្រួច ខេត្តកំពង់ស្ពឺ។ ទើបបញ្ជូនទាំងសំណុំរឿង និងជនសង្ស័យត្រឡប់ទៅប្រគល់ឲ្យនគរបាលមូលដ្ឋាននោះជាអ្នកចាត់ការតាមច្បាប់វិញ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
