រាជធានីភ្នំពេញ ៖ បុរសខិលខូចម្នាក់បានធ្វើសកម្មភាពឆបោកយកម៉ូតូរបស់យុវជនម្នាក់ដែលជាអ្នកស្គាល់គ្នា ដោយបុរសនោះបានប្រើល្បិចខ្ចីជិះ ដោយប្រាប់ថា ជិះទៅយកម្ហូបតែមួយភ្លែតប៉ុណ្ណោះ ខណៈនោះព្រោះតែមនុស្ស រាប់អានគ្នា ទើបយុវជនរងគ្រោះព្រមឲ្យខ្ចី ហើយបុរសកំហូចនោះក៏បានយកម៉ូតូជិះទៅបាត់រហូត បន្ទាប់មកជនរងគ្រោះបានតាមរកគ្រប់កន្លែង នៅតែមិនបានឃើញនោះឡើយ លុះ១អាទិត្យក្រោយមក ទើបមានអ្នកប្រទះឃើញបុរសនោះ ក៏បានខលប្រាប់ឲ្យយុវជនម្ចាស់ម៉ូតូទៅឃាត់ខ្លួនប្រគល់ឲ្យនគរបាលប៉ុស្ដិ៍ចោមចៅតែម្ដង។
ហេតុការណ៏នោះបានកើតឡើងតាំងពីថ្ងៃទី១៥ ខែមីនា ឆ្នាំ២០១៧ មកម្ល៉េះ នៅជិតផ្សារត្រពាំងក្រឡឹង ស្រុកភ្នំស្រួច ខេត្តកំពង់ស្ពឺ។ ប៉ុន្តែជនរងគ្រោះបានតាមឃាត់ខ្លួនបាន កាលពីវេលាម៉ោង៧និង៣០នាទីព្រឹក ថ្ងៃទី២២ ខែមីនា ឆ្នាំ២០១៧ នៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យខាងលើនោះឈ្មោះ នឹម វ៉ាន់ថា អាយុ៤០ឆ្នាំ មុខរបរកម្មករសំណង់ មានទីលំនៅក្នុងភូមិព្រែកជ្រៅ ឃុំព្រែកដំបង ស្រុកមុខកំពូល ខេត្តកណ្ដាល។ ជននោះបានធ្វើសកម្មភាពបោកយកម៉ូតូ១គ្រឿងម៉ាកហុងដា ឌ្រីមសេ១២៥ ពណ៌ខ្មៅ ស៊េរីឆ្នាំ២០១៥ ដែលជាកម្មសិទ្ធិរបស់យុវជនម្នាក់ វ៉ាន់ ណារ៉ា អាយុ២១ឆ្នាំ មុខរបរកម្មករសំណង់ មានទីលំនៅក្នុងភូមិត្រពាំងពោធិ៍ ឃុំត្រពាំងល្វា ស្រុកឧដុង្គ ខេត្តកំពង់ស្ពឺ។
យុវជនម្ចាស់ម៉ូតូបាននិយាយថា មុនពេលកើតហេតុ ខណៈខ្លួនទៅធ្វើការងារសំណង់នៅឯនៅជិតផ្សារត្រពាំងក្រឡឹង ស្រុកភ្នំស្រួច ខេត្តកំពង់ស្ពឺ ស្រាប់តែជនសង្ស័យខាងលើទៅប្រាប់ថា ថ្ងៃនេះក្មួយរបស់គាត់ភ្ជាប់ពាក្យ លុះដល់ពេលហូបបាយថ្ងៃត្រង់ ក៏បានហូបបាយជុំគ្នា ហើយជននោះបានខ្ចីម៉ូតូខ្លួនជិះដោយប្រាប់ថា ម្ហូបយើងតិចពេក គាត់ខ្ចីម៉ូតូជិះទៅយកម្ហូបនៅផ្ទះក្មួយដែលភ្ជាប់ពាក្យនោះមកហូបជុំគ្នា។
ខណៈនោះដោយសារតែជាមនុស្សស្គាល់គ្នា ទើបខ្លួនឲ្យខ្ចី ហើយបុរសនោះក៏បានយកទៅបាត់រហូតតែម្ដង បន្ទាប់ពីដឹងថា ចាញ់បោកជននោះ ខ្លួនបានតាមរកគ្រប់កន្លែង ប៉ុន្តែមិនឃើញឡើយ រហូតដល់វេលាម៉ោង៧និង៣០នាទីព្រឹក ថ្ងៃទី ២២ មីនា ស្រាប់តែមានអ្នកប្រទះឃើញជននោះកំពុងស្ថិតនៅក្នុងភូមិត្រពាំងថ្លឹង សង្កាត់ចោមចៅ ហើយបានខលប្រាប់ ទើបខ្លួននាំបងប្អូនចុះទៅធ្វើការចាប់ខ្លួនប្រគល់ឲ្យនគរបាលប៉ុស្ដិ៍ចោមចៅ។
ក្រោយពេលចាប់ខ្លួនបានជននោះបានសារភាពថា ខ្លួនពិតជាបានធ្វើសកម្មភាពឆបោកយកម៉ូតូ១គ្រឿងនោះមែន ប៉ុន្តែមិនបានលក់នោះឡើយ ក្រោយពេលបោកបានពីយុវជនខាងលើ ខ្លួនបានជិះទៅជួបជាមួយមិត្តភក្ដិម្នាក់ទៀត ហើយក៏ត្រូវបានមិត្តភក្ដិនោះខ្ចីជិះទៅទិញថ្នាំពេទ្យ រួចក៏បានបោកយកបន្តទៅបាត់តែម្ដង ។ ខ្លួនកំពុងតាមរកមិត្តភក្ដិដែលបោកយកម៉ូតូនោះមិនទាន់ឃើញផង ក៏ត្រូវបានមកម្ចាស់ម៉ូតូតាមរកឃើញ និងបានចាប់ខ្លួនប្រគល់ឲ្យនគរបាលបែបនេះ។
នគរបាលប៉ុស្ដិ៍ចោមចៅបាននិយាយថា ក្រោយពេលឃាត់ខ្លួនជនសង្ស័យបាន ម្ចាស់ម៉ូតូបានទាមទារ សំណងចំនួន១.៥០០ដុល្លារ ប៉ុន្តែជនសង្ស័យបានអង្វរសុំម្ចាស់ម៉ូតូឲ្យទទួលយកត្រឹម៨០០ដុល្លារបាន ហើយ ព្រោះខ្លួនមានលទ្ធភាពត្រឹមតែប៉ុណ្ណឹងទេ ប៉ុន្តែយុវជនម្ចាស់ម៉ូតូមិនព្រមយកឡើយ ហើយដោយសារតែទីតាំងកើតហេតុ ស្ថិតនៅជិតផ្សារត្រពាំងក្រឡឹង ស្រុកភ្នំស្រួច ខេត្តកំពង់ស្ពឺ។ ទើបបញ្ជូនទាំងសំណុំរឿង និងជនសង្ស័យត្រឡប់ទៅប្រគល់ឲ្យនគរបាលមូលដ្ឋាននោះជាអ្នកចាត់ការតាមច្បាប់វិញ៕
ប្រភព៖ កោះសន្តិភាព
ដោយឡែកព័ត៌មានចាប់អារម្មណ៍មួយផ្សេងទៀត៖ញាក់សាច់! ឡានក្រុង«រិទ្ធិមុន្នី» បើកចូលខ្យូសមានមនុស្សកំពុងអង្គុយញ៉ាំ (មានវីដេអូ)
ខេត្តបាត់ដំបង ៖ សេចក្តីរាយការណ៍បានឱ្យដឹងថា មានករណីគ្រោះថ្នាក់ចរាចរណ៍ដ៏រន្ធត់មួយ ដោយរថយន្តក្រុងដឹកអ្នកដំណើររបស់ក្រុមហ៊ុន «រិទ្ធិមុន្នី» បានជ្រុលទៅបុកកន្លែង«ខ្យូស» លក់សាច់កណ្តុរតាមផ្លូវប្រហែល៥-៦តូបខ្ទេចខ្ទី និងកំពុងសង្ស័យមនុស្សដែលអង្គុយក្នុងខ្យូសធ្លាក់ចូលទឹកទៀត ។ រថយន្តបង្កនៅមិនទាន់អស់ចិត្ត បានបន្តបុករថយន្តកាមរីកំពុងចតស្ងៀមមួយគ្រឿង និងថែមទាំងបុកម៉ូតូ៤គ្រឿងទៀត (សុទ្ធសឹងតែរបស់ភ្ញៀវក្នុងខ្យូស) ទើបរថយន្តបង្កនោះ ស្ងប់ចិត្តធ្លាក់ចូលទឹកអូរតាគីតែម្តង ។
ហេតុការណ៍នេះ កើតឡើងកាលពីវេលាម៉ោង០៣ និង១៥នាទីរសៀលថ្ងៃទី២២ មីនា ស្ថិតតាមបណ្តោយផ្លូជាតិលេខ៥ (ក្បែរស្ពានអូរតាគី) ក្នុងភូមិអូរតាគី ឃុំអូរតាគី ក្រុងបាត់ដំបង ។
ប្រភពឱ្យដឹងថា រថយន្តក្រុងបង្កខាងលើ មានពាក់ស្លាកលេខភ្នំពេញ 3B-4085 (ធ្វើដំណើរពីភ្នំពេញ ទៅខេត្តបន្ទាយមានជ័យ) ។ រីឯរថយន្តកាមរីដែលចតស្ងៀម មានពាក់ស្លាកលេខភ្នំពេញ2A-5220 និងម៉ូតូ៤គ្រឿងទៀតមិនទាន់ស្គាល់ស្លាកលេខ តែបានរងការខូចខាតយ៉ាងដំណំ ។
ក្នុងហេតុការណ៍ខាងលើ គេមិនទាន់ដឹងពីមូលហេតុនោះទេ ហើយចំពោះមនុស្សដែលរងគ្រោះថ្នាក់ ក៏មិនទាន់ដឹងថា មានប៉ុន្មាននាក់នោះដែរ តែត្រូវគេសង្ស័យថា អាចមានមនុស្សធ្លាក់ចូលទឹកអូរតាគីយ៉ាងតិច២នាក់ដែរ ។ ពេលនេះ សមត្ថកិច្ចកំពុងចុះពិនិត្យ និងរកវិធី ដើម្បីលើករថយន្តក្រុងបង្កនេះ ឡើងមកគោកវិញ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
