ខេត្តកំពង់ឆ្នាំង ៖ ឯកឧត្តម ឈួរ ចន្ទ័ឌឿន អភិបាលខេត្តកំពង់ឆ្នាំងបានលើកឡើងថា បញ្ហាផ្ទះបណ្តែតទឹកធ្វើឲ្យប៉ះពាល់ យ៉ាងធ្ងន់ធ្ងរដល់បរិស្ថាន និងដល់សុខភាពប្រជាពលរដ្ឋទូទាំងក្រុងកំពង់ឆ្នាំង ដែលបានទទួលទានទឹក ទោះស្ថិតក្នុងកាលៈទេសណាក៏ដោយ។ ដោយហេតុនេះ តាមគម្រោងរបស់អាជ្ញាធរខេត្ត នឹងត្រូវជម្លៀសអ្នករស់នៅលើផ្ទះបណ្តែតទឹក ក្នុងពេលឆាប់ខាងមុខនេះ។ មានប្រសាសន៍បែបនេះនៅក្នុងពិធី ប្រជុំផ្សព្វផ្សាយស្តីពីបដិសណ្ឋារកិច្ចល្អ ក្នុងសេវាសាធារណៈ របស់ការិយាល័យច្រកចេញចូលតែមួយ សាលាក្រុងកំពង់ឆ្នាំង ព្រឹកថ្ងៃទី២២ ខែមីនា ឆ្នាំ២០១៧ នៅសាលានយោបាយខេត្ត។
ឯកឧត្តម អភិបាលខេត្តកំពង់ឆ្នាំងបានបន្តថា អ្នករស់នៅលើផ្ទះបណ្តែតទឹកសព្វថ្ងៃមានប្រមាណ៥ពាន់នាក់ ចុះបើមួយថ្ងៃម្នាក់ទម្លាក់កាកសំណល់ចាស់តែមួយគីឡូមួយថ្ងៃមិនឡើង៥តោន ចុះបើមួយខែវាឡើងប៉ុន្មាន។ សព្វថ្ងៃនេះប្រជាពលរដ្ឋក្នុងកំពង់ឆ្នាំង បានប្រើប្រាស់ទឹកដែលបូមពីទន្លេទោះថា យកមកចម្រោះដាក់ថ្នាំយ៉ាងណាក៏ដោយ ក៏ពិបាកទុកចិត្តដែរ។ ហេតុនេះហើយអ្នករស់នៅលើទឹកមិនអាចរស់នៅបានទៀតទេ ត្រូវឡើងលើគោក។
មានអ្នកទូរសព្ទ័មកសួរ តែឯកឧត្តមថា អត់បានទេបញ្ហាធំគឺទឹក ហើយបើមានបញ្ហាគ្រោះថ្នាក់មិនមែនអ្នករស់នៅលើទឹកនោះទេ គឺយើង និងកូនចៅយើង ទាំងអស់គ្នាដែលប្រើប្រាស់ទឹកបូមពីទន្លេមកប្រើ។ ហេតុនេះអាជ្ញាធរខេត្តត្រូវតែរៀបចំឲ្យអ្នករស់នៅលើកទឹកឡើងគោក។ យោងតាមផែនការអភិវឌ្ឍន៍ រយៈពេល៥ឆ្នាំ របស់សាលាខេត្តកំពង់ឆ្នាំង ដែលមានជាជំហានៗ គឺចាប់ផ្តើមជាដំបូង ធ្វើការបន្លាស់ទី ផ្ទះប្រជាពលរដ្ឋរស់នៅលើផ្ទះបណ្តែតទឹកនៅចំណុចមុខផ្សារក្រោម ទាំងអស់ឲ្យទៅនៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ចម្ងាយប្រមាណជាង២គីឡូម៉ែត្រពីមុខផ្សារក្រោម។
បន្ទាប់មកផ្ទះជាប់ដី នៅតាមមាត់ទន្លេក្នុងភូមិចុងកោះ ត្រូវរុះរើចេញទៅនៅលើដីចាក់ថ្មី ដែលកំពុងអភិវឌ្ឍន៍ ហើយយកដីមាត់ទន្លេកសាងផ្លូវ កសាងសួនច្បារតាមមាត់ទន្លេ ក្នុងនោះដែរផ្ទះបណ្តែតទឹកដែលបានបន្លាស់ទីទៅកន្លែងថ្មីនោះ ក៏ត្រូវរុះរើឲ្យឡើងគោកដែរ នេះជាការអភិវឌ្ឍន៍តាមតំណាក់កាល ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយវិញទៀត៖
(សៀមរាប)៖ នៅវេលារំលងអាធ្រាត្រឈានចូលថ្ងៃទី២២ ខែមីនា ឆ្នាំ២០១៧ មានជនទមិឡវាយបំផ្លាញរូបចម្លាក់ហង្ស នៅខាងមុខរូបសំណាក់យាយទេព មានទីតាំងនៅភូមិមណ្ឌល២ សង្កាត់ស្វាយដង្គំ ក្រុងសៀមរាប បណ្តាលឲ្យបាក់ក្បាល និងបាក់កន្ទុយ តែកម្លាំងល្បាតបានឃាត់ខ្លួនជនសង្ស័យម្នាក់ នាំទៅសាកសួរចម្លើយ នៅប៉ុស្តិ៍នគរបាលស្វាយដង្គំតែម្ដង។
មន្រ្តីសមត្ថកិច្ចបានឲ្យដឹងថា ខណៈដែលកម្លាំងនគរបាលការិយាល័យអន្តរាគមន៍ ខេត្តសៀមរាប កំពុងចុះល្បាតទៅដល់បរិវេណកើតហេតុ ក៏បានប្រទះឃើញជនសង្ស័យម្នាក់ និងបានឃាត់ខ្លួនភ្លាមៗ ដើម្បីយកមកសាកសួរនៅប៉ុស្តិ៍នគរបាលសង្កាត់ស្វាយដង្គំ។
ជនសង្ស័យមានឈ្មោះ ឈឿន ឆើត អាយុ៣៤ឆ្នាំ មានទីលំនៅភូមិថ្លាត ឃុំខ្ចាស់ ស្រុកសូទ្រនិគម ខេត្តសៀមរាប។ អំឡុងពេលសមត្ថកិច្ចសួរនាំ ជនសង្ស័យបានឆ្លើយថា ខ្លួនមិនបានវាយរូបហង្សនោះទេ គឺមានមនុស្សប្រុស២នាក់ផ្សេងទៀត បានជិះម៉ូតូ១គ្រឿងមកវាយរូបនោះ ហើយរួចគេចខ្លួនបាត់ទៅ រូបខ្លួនគ្រាន់តែជាអ្នកដើរកាត់ទេ។
លោកវរសេនីយ៍ឯក ភឹង ចិន្តារ៉េត ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តសៀមរាប និងលោកវរសេនីយ៍ឯក ទិត្យ ណារ៉ុង អធិការនគរបាលក្រុងសៀមរាប បានចាត់ឲ្យលោកវរសេនីយ៍ត្រី នួន ស័ក្តិចំរើនរិទ្ធ អធិការងទទួលបន្ទុកព្រហ្មទណ្ឌក្រុងសៀមរាប ដឹកនាំកម្លាំងជំនាញធ្វើការស៊ើបអង្កេត ករណីនេះបន្តទៀត។
ពាក់ព័ន្ធនឹងករណីនេះ ក៏មានរឿងរ៉ាវអាក្រក់មួយកើតឡើងម្ដងរួចហើយ ដោយរូបសំណាក់លោកយាយទេព កាលពីយប់រំលងអាធ្រាត្រឈានចូលថ្ងៃទី២៤ ខែមករា ឆ្នាំ២០១៧ កន្លងទៅ ក៏ធ្លាប់ត្រូវបានជនមិនស្គាល់មុខ លួចវាយបាក់ក និងឆែបច្រមុះផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]