ភ្នំពេញ៖ ក្រុមគោព្រៃកម្ពុជានឹងត្រូវប៉ះក្រុមជម្រើសជាតិឥណ្ឌា វេលាម៉ោង៦:៣០នាទីល្ងាចនេះ នៅពហុកីឡដ្ឋានជាតិអូឡាំពិក ប៉ុន្តែខ្សែការពារ និងបំរើស្លាបស្តាំ ដែលជាគន្លឹះសំខាន់របស់ក្រុម គឺកីឡាករ ឈិន ឈឿន មិនមានឈ្មោះនៅក្នុងបញ្ជីក្រុមនោះទេ ពោលគឺមិនបានជួយក្រុមជម្រើសជាតិល្ងាចនេះឡើយ។
បើទោះជាមិនមានឈ្មោះនៅក្នុងក្រុមជម្រើសជាតិលើកនេះក៏ដោយ ឈិន ឈឿន ដែលលេងឲ្យក្លិបក្រសួងការពារជាតិបានបង្ហោះសារជូនពរទៅកាន់គោព្រៃកម្ពុជាផងដែរថា «ថ្ងៃនេះជូនពរអោយក្រុមជម្រើសជាតិកម្ពុជាយើង ទទួលបានជ័យជម្នះអោយប្រទេសកម្ពុជារបស់យើង ទោះខ្ញុំមិនមានឈ្មោះក្នុងជម្រើសក៏ដោយ» ។
បើពឹងផ្អែកទៅលើមូលហេតុដែលធ្វើឲ្យ ឈិន ឈឿន មិនមានឈ្មោះក្នុងក្រុមជម្រើសជាតិ គឺដោយសារតែ បច្ចុប្បន្ននេះ ភរិយារបស់ខ្លួនកំពុងមានផ្ទៃពោះជិតគ្រប់ខែ ដូច្នេះកីឡាកររូបនេះត្រូវការពេលវេលានៅជិត និងមើលថែភរិយា ហើយគួបផ្សំថ្ងៃនេះក៏ជាថ្ងៃពិធីមង្គលការរបស់បងប្រុសធំរបស់កីឡាករ ឈិន ឈឿន ផងដែរ។
យ៉ាងណាមិញ បើទោះគ្មាន ឈិន ឈឿន ក៏ដោយ គ្រូបង្គោលដែលទើបឡើងកាន់តំណែងថ្មី លោក Leonardo Luis ក៏បានកោះហៅកីឡាករសំខាន់ៗ២រូបវិលចូលក្រុមជម្រើសវិញផងដែរ ក្នុងនោះមានដូចជា ធារី ចន្ថាប៊ីន និង ចាន់ វឌ្ឍនាកា ដែលប្រកបអាជីពបាល់ទាត់នៅក្លិបក្រៅប្រទេស ខណៈពួកគេទាំងពីរ និងក្រុមជម្រើសជាតិទាំងអស់កំពុងនាំគ្នាហ្វឹកហាត់យ៉ាងសស្រាក់សស្រាំ សម្រាប់ការប្រកួតល្ងាចនេះ៕
ដោយឡែករំលឹកព័ត៌មានមួយផ្សេងទៀត៖ ក្រោយផ្ទុះសង្គ្រាមសម្តីផ្អើលហ្វេសប៊ុក កីឡាករទាំង២មានដំណើរជីវិតស្រដៀងគ្នា
រាជធានីភ្នំពេញ ៖ ក្នុងពិភពកីឡា មិនមានអ្នកណាមិនដឹងនោះទេថា កីឡាករល្បីឈ្មោះ២រូប គឺសេន ប៊ុនថេន និងវ៉ន វីវ៉ា គឺជាអតីតមិត្តល្អនឹងគ្នា តែក៏បានឈ្លោះគ្នាឡើងបែកផ្សែងដោយសារតែការចំអន់ និងសើចចំអកដាក់គ្នាផងដែរ ។ មកទល់ពេលនេះ គេកត់សម្គាល់ថា កីឡាករទាំងពីរមានលំនាំជីវិតដូចគ្នា ជាពិសេសបន្ទាប់ពីបានក្លាយជាឪពុករបស់ទារិកា ។
លោក សេន ប៊ុនថេន និងវ៉ន វីវ៉ា ត្រូវគេកត់សម្គាល់ថា សឹងនឹងមានដំណើរជីវិតដូចគ្នាទៅហើយ បន្ទាប់ពីអ្នកទាំងពីរចាប់ផ្ដើមនឿយណាយពីការប្រដាល់ដូចគ្នា ។ បើទោះជាសេន ប៊ុនថេន នៅលឹបលម្ដងម្កាលជាមួយការប្រដាល់ ដោយសារតែលោកនៅបន្តជីវិតជាគ្រូបង្វឹក តែគេកត់សម្គាល់ថា ស្ថានភាពលាចេញពីការប្រដាល់របស់លោកនឹងត្រូវកើតឡើងមិនខុសគ្នា ។
កីឡាករ សេន ប៊ុនថេន មិនដែលប្រកាសថា បោះបង់ការប្រដាល់នោះទេ ដោយភាពជាក់ស្ដែងលោកក៏បានបង្ហាញខ្លួនឡើងរេញកាលពីចុងឆ្នាំ២០១៦ ធ្វើឱ្យមានរបួសជាប់ខ្លួននោះផង ។
យ៉ាងណាមិញ លោកប្រហែលជាបាត់ឱកាសឡើងរេញទៀតហើយ ដោយសារតែភរិយារបស់លោកក៏ចង់ឱ្យឈប់ប្រដាល់ ស្របគ្នាដែលលោកក៏ទើបតែមានកូនស្រីម្នាក់ជាទីស្រឡាញ់ ដែលត្រូវស្វែងរកការងារផ្សេងជំនួសឱ្យការប្រដាល់ ។ លោកបានប្រកាសប្រាប់មិត្ដភក្ដិឈប់ឡើងប្រដាល់ ហើយកុំឱ្យចាញ់ខ្មាសគេ និងដើម្បីមានពេលបានមើលខុសត្រូវចំពោះកូនស្រីខ្លួនឱ្យបានល្អផង ។
លោកបានបង្ហោះ ពីក្ដីស្រឡាញ់ចំពោះកូនស្រី របស់ខ្លួនយ៉ាងខ្លាំង បើទោះជាមុនពេលភរិយាពពោះ លោករមែងប្រកាសថា មិនទាន់ចង់បានកូនដោយសារតែជីវភាពមិនទាន់ប្រសើរ ។
លោកថា កូនស្រីរបស់លោកទើបនឹងប្រសូតឡើងកាលពីថ្ងៃទី១៧ មីនា ដោយលោកបានដាក់ឈ្មោះថា Bella និងបានចាត់ទុកថា ជាកូនស្រីសំណព្វចិត្តរបស់លោកនោះផង ។ លោកថា ខ្លួនមិនទាន់ចង់បានកូននៅឡើយទេ ប៉ុន្តែក្រោយពេលភរិយាពពោះ និងបង្កើតបានកូនស្រីគឺលោករំភើប និងស្រឡាញ់គ្មានពីរ បន្ទាប់ពីបានក្លាយខ្លួនជាឪពុករបស់ក្មេង ។
លោកថា ខ្លួននៅតែបន្តដំណើរជាមួយការប្រដាល់ ប៉ុន្តែបើឱ្យឡើងប្រដាល់ដូចមុន គឺលោកអាចនឹងអត់ដោយសារតែលោកក៏លែងចង់ល្បីដោយសារឡើងវ៉ៃបន្តទៀត ។ លោកថា កម្លាំងចុះខ្សោយហើយស្ថានភាពរបួសក្នុងការប្រកួតលើកចុងក្រោយក៏ធ្វើឱ្យលោកលែងចង់ឡើងរេញផងដែរ ដោយលោកនៅទទួលតែការបង្វឹកសិស្សប៉ុណ្ណោះ ដើម្បីប្រាក់ចំណូលផង និងដើម្បីឱ្យរាងកាយមានសុខភាពល្អមិនខុសពីនៅប្រកួតប្រដាល់ផង ។ ទោះបីយ៉ាងណា លោកអាចទទួលយកការប្រដាល់ម្ដងម្កាល បើសុខភាពអំណោយផលហើយការប្រដាល់ត្រូវធ្វើឡើងសមនឹងលោកទទួលយក ។
លោកថា ក្រោយក្លាយជាឪពុកក្មេងត្រូវគិតមុនគេពីការរកលុយ តែក៏មិនមែនជម្រើសយកការរកលុយដោយឡើងប្រដាល់មិនខ្លាចគ្រោះថ្នាក់នោះដែរ ដើម្បីកុំឱ្យឈឺទៅពិបាកប្រពន្ធកូន ។
ជំហររបស់លោកត្រូវគេឃើញដូចគ្នានឹងកីឡាករវ៉ន វីវ៉ា ដែលជាអតីតគូជម្លោះ និងជាអ្នករួមអាជីពរបស់ខ្លួន ។
វ៉ន វីវ៉ា ក្រោយពេលរៀបការលោកនៅតែបន្តអាជីពប្រដាល់នៅឡើយទេ ប៉ុន្តែដោយសារការប្រកួតលើកចុងក្រោយ បណ្ដាលឱ្យលោកបាក់ឆ្អឹងដៃ ទើបប្រកាសដកខ្លួនព្រមគ្នាជាមួយនឹងបានក្លាយជាឪពុកគេតែម្ដង ។ អ្វីដែលគេមើលឃើញដូចគ្នា គឺអ្នកទាំងពីរមានកូនស្រីដូចគ្នា និងបានប្រកាសលាឈប់ការប្រដាល់លើរេញក្រោយក្លាយជាឪពុកគេដូចគ្នា ។
មហាជនមួយចំនួនបានចាប់អារម្មណ៍ វ៉ន វីវ៉ា ក្រោយពេលល្បីឈ្មោះ ជាពិសេសគឺបន្ទាប់ពីអ្នកទាំងពីរផ្ទុះរឿងឈ្លោះគ្នាឡើងផ្អើលមហាជននាពេលមុន ។ ក្នុងនោះសូម្បីតែអ្នកនាង ស៊ន ដាវីន និង ឃឹម ខាន់សោភ័ណ្ឌ ដែលជាភរិយាអ្នកទាំងពីរក៏បញ្ចេញទស្សនៈកាច់កុងគ្នារឿងកាន់ជើងប្ដីដែរ ។ វ៉ន វីវ៉ា និយាយថា លោកឈប់ប្រដាល់ហើយ ហើយអ្វីដែលលោកសម្រេចធ្វើ គឺធ្វើដើម្បីកូនស្រី ។
យ៉ាងណាមិញ អ្វីដែលគេមើលឃើញពីភាពខុសគ្នា គឺវ៉ន វីវ៉ា សម្រេចចិត្តមិនបន្តអាជីពជាគ្រូបង្វឹកនោះទេ តែសម្រាប់កីឡាករសេន ប៊ុនថេន នៅបន្តអាជីពបង្វឹកសិស្ស បើទោះជាលោកបោះបង់ការប្រដាល់ទាំងស្រុងក្ដី។ ក្នុងនោះសូម្បីតែការទទួលថតកុន ក៏ដូចជាលែងរវល់ទៀតហើយ ដោយវ៉ន វីវ៉ា ប្រកាសថា ចង់ទុកពេលមើលកូន និងរកស៊ីមុខរបរមួយផ្សេងជាជំនួស ។
ងាកទៅកីឡាករសេន ប៊ុនថេន លោកថា នៅតែចង់បន្តអាជីពថតកុន និងបង្វឹកសិស្សរហូតដល់ចាស់ ដោយសារលោកប្រកាសថា នៅចង់បន្សល់ទុកស្នាដៃឱ្យក្មេងជំនាន់ក្រោយមុនពេលចាស់ទៅ ។ មហាជននៅតែកត់សម្គាល់ថា វ៉ន វីវ៉ា និងសេន ប៊ុនថេន មានដំណើរជីវិត និងជំហរស្រដៀងគ្នា បន្ទាប់ពីអ្នកទាំងពីរផ្ទុះសង្គ្រាមពាក្យសម្ដីឡើងផ្អើលហ្វេសប៊ុកធ្វើឱ្យមានការរិះគន់ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]