ក្រោយពិនិត្យទឹកនោម! នគរបាលស័ក្តិ៣ ស្វាយ ពិសិដ្ឋ ដែលបាញ់រះជិត១០គ្រាប់ នៅបុរីសម្បត្តិមានហេង មានសារធាតុញៀនក្នុងខ្លួន

(ភ្នំពេញ)៖ មន្រ្តីនគរបាលពាក់ស័ក្តិ៣ នៅនាយកដ្ឋានស្ថិតិប្រជាពលរដ្ឋ នៃអគ្គនាយកដ្ឋានអត្តសញ្ញាណកម្ម ស្វាយ ពិសិដ្ឋ ដែលត្រូវចាប់ខ្លួនរឿងបាញ់រះជិត១០គ្រាប់ ដោយសារខឹងប្រពន្ធ នៅក្នុងបុរីសម្បត្តិមានហេងនោះ ត្រូវបានសមត្ថកិច្ចខណ្ឌច្បារអំពៅអះអាងថា មានសារធាតុញៀនក្នុងខ្លួនផងដែរ បន្ទាប់ពីយកទឹកនោមទៅធ្វើតេស្ត។

នៅចំពោះមុខសមត្ថកិច្ច មន្រ្តីនគរបាលដែលប្រព្រឹត្តបទល្មើសរូបនេះ ក៏បានសារភាពថា ខ្លួនពិតជាបាន និងកំពុងប្រើប្រាស់គ្រឿងញៀនផងដែរ។

តាមគម្រោងនគរបាល ស្វាយ ពិសិដ្ឋ នឹងត្រូវបញ្ជូនទៅតុលាការនៅថ្ងៃទី២២ ខែមីនា ឆ្នាំ២០១៧ដើម្បីចាត់ការបន្តទៀត តែរហូតមកដល់វេលាម៉ោង ប្រមាណ១០ព្រឹកនេះ សមត្ថកិច្ចនគរបាលខណ្ឌច្បារអំពៅ មិនទាន់បានបញ្ជូនទៅតុលាការនៅឡើយ។

សូមបញ្ជាក់ថា ករណីនេះកើតឡើងនៅ​វេលាម៉ោង៥៖៤០​នាទី ល្ងាចថ្ងៃទី១៩ ខែមីនា ឆ្នាំ២០១៧ បង្កឡើងដោយមន្រ្តីនគរបាល នាយកដ្ឋានស្ថិតិប្រជាពលរដ្ឋ នៃអគ្គនាយកដ្ឋាន​អត្តសញ្ញាណកម្ម ក្រសួងមហាផ្ទៃ លោក ស្វាយ ពិសិដ្ឋ អាយុ៣៤ឆ្នាំ។

បើតាមរបាយការណ៍របស់សមត្ថកិច្ច មុនពេលកើតហេតុជនសង្ស័យ និងមិត្តភក្តិ២នាក់ទៀត បាននាំគ្នាផឹកស្រាបៀរ នៅផ្ទះជនសង្ស័យ​អស់មួយកេស រួចក៏នាំគ្នាជិះរថយន្តម៉ាក Toyota HighLander ពណ៌ស ពាក់ស្លាកលេខនគរបាល (មិនចាំស្លាកលេខ) ចេញទៅក្រៅបាត់។

លុះដល់ម៉ោង១៧និង៤០នាទី ថ្ងៃដដែលជនសង្ស័យ ក៏ជិះរថយន្តត្រឡប់មកផ្ទះវិញម្នាក់ឯង ពេលនោះប្រពន្ធរបស់ជនសង្ស័យ ក៏ហៅជនសង្ស័យទៅផឹកស្រា និងច្រៀងខារ៉ាអូខេ ជាមួយអ្នកជិតខាង រួចក៏មានទំនាស់ពាក្យសម្តីគ្នា ហើយជនសង្ស័យក៏​យកអាវុធវែងម៉ាក AK-៤៧(មិនដឹងលេខ)បាញ់ឡើងលើជាច្រើនគ្រាប់ រួចក៏យកអាវុធដាក់ក្នុងរថយន្ត ជិះគេចខ្លួនបាត់។

ក្រោយកើតហេតុសមត្ថកិច្ចយើង បានចុះទៅត្រួតពិនិត្យកន្លែងកើតហេតុ រកឃើញសំបកគ្រាប់អាវុធវែង (AK) ០៥សំបក ទុកធ្វើជាវត្ថុតាង។ យ៉ាងណាក៏ដោយសម្រាប់ហេតុការណ៍បាញ់បោះនេះ មិនបណ្តាលឲ្យរងគ្រោះដល់ប្រជាពលរដ្ឋ ណាម្នាក់នោះទេ។

បើតាមប្រជាពលរដ្ឋ នៅក្បែរជនសង្ស័យបានឲ្យដឹងថា ជននេះធ្លាប់បាញ់បោះផងដែរ ប៉ុន្តែមិនឃើញមានចំណាត់ការ របស់សមត្ថកិច្ចនោះឡើយ។ ចំពោះករណីនេះ កម្លាំងនគរបាលជំនាញ នៃស្នងការដ្ឋាននគរបាលរាជធានីភ្នំពេញ កំពុងសហការជាមួយកម្លាំងនគរបាល មូលដ្ឋានធ្វើការស្រាវជ្រាវបន្ត ដើម្បីចាត់ការបន្តទៀត៕

ប្រភព៖ Fresh News

ដោយឡែករំលឹកព័ត៌មានមួយផ្សេងទៀត៖ ចោរមួយក្រុមចូលទៅគាស់ផ្ទះ អាជីវករលក់គ្រឿង​អលង្ការនៅសង្កាត់ទឹកថ្លា យកអស់ជិត៤ម៉ឺនដុល្លារ, បើកចូលផ្លូវទ័ល ក្រុមចោរទុក​រថយន្ត​រត់គេចខ្លួនអស់

(ភ្នំពេញ)៖ ស្រ្តីដែលជាអាជីវករលក់គ្រឿងអលង្ការម្នាក់ នៅផ្សារតនាផ្លាហ្សា ស្ថិតនៅភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ បាននិយាយថា មានចោរមួយក្រុម មិនដឹងប៉ុន្មានបានចូលគាស់ផ្ទះរបស់ខ្លួន ហើយប្រមូលយកលុយ និងគ្រឿងអលង្ការអស់ជិត៤ម៉ឺនដុល្លារ នាថ្ងៃទី២១ ខែមីនា ឆ្នាំ២០១៧នេះ។

ក្រុមចោរបានបើករថយន្តមួយគ្រឿងម៉ាក Camery ឆ្លាមពណ៌ខ្មៅ ពាក់ស្លាកលេខ ភ្នំពេញ2P-1129 យកទៅប្លុងចោលតាមផ្លូវដឿងហែម នៅក្បែរផ្សារទឹកថ្លា ​ដោយសារបើកទៅមុខមិនរួចពោលប៉ះចំផ្លូវទ័ល។ ភ្នាក់ងារ Fresh News បានរាយការណ៍ថា នៅរសៀលថ្ងៃទី២១ ខែមីនា ឆ្នាំ២០១៧នេះ កម្លាំងសមត្ថកិច្ចទាំងនគរបាល និងអាវុធហត្ថ បានចុះទៅកាន់ទីតាំងដែលក្រុមចោរបានយករថយន្តរបស់ខ្លួន ប្លុងចោលនៅទីនោះ​ ដើម្បីពិនិត្យរកវត្ថុតាងបន្ថែមទៀត។

ស្រ្តីរងគ្រោះ ម៉េង វ៉ាន់លី អាយុ៣៥ឆ្នាំ បាននិយាយថា លុយបាត់បង់ប្រហែល៣០០ទៅ៤០០ដុល្លារ ប៉ុន្តែគ្រឿងអលង្ការវិញ បាត់បង់រហូតដល់ជិត៤ម៉ឺនដុល្លារ។

ស្រ្តីរងគ្រោះបានបន្តថា មុនពេលកើតហេតុ គាត់បានចេញពីផ្ទះយកឯកសារទៅដាក់នៅសាលាខណ្ឌទួលគោក ក្រោយមកបានជិះម៉ូតូកង់បីត្រឡប់មកផ្ទះវិញ ខណៈមកដល់មុខផ្ទះអោនចាក់សោរបងស្រាប់តែឃើញជនសង្ស័យ២នាក់ លោតផ្លោះរបងចេញពីផ្ទះគាត់ទៅផ្ទះម្ខាងទៀត។

ពេលនោះគាត់ស្មានតែសមត្ថកិច្ចដេញ ចាប់ពួកជនជាតិក៏ចូលដល់ក្នុងផ្ទះឃើញចំរឹងបង្អួចរបើកគាត់ ក៏ចេញមកវិញស្រែកចោរៗ ហើយជនសង្ស័យក៏រត់ឡើងរថយន្តបក្ខពួក ដែលបញ្ឆេះចាំស្រាប់។ ភ្លាមៗនោះសន្តិសុខឯកជនបានឃើញ និងបានវាយរថយន្តខាងលើមួយដៃបែកកញ្ចក់ទ្វារមុខ ហើយបោះដៃតៗគ្នាឲ្យបិតប៉ារ៉ាស់ខាងមុខ តែរថយន្តខាងលើបើកបុកប៉ារ៉ាស់ហើយគេចខ្លួនដោយសុវត្ថិភាព។

សម្រាប់រថយន្តខាងលើនេះ​ នឹងត្រូវយកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីចាត់ការបន្តទៀត៕