រាជធានីភ្នំពេញ ៖ បុរសស្ត្រី២នាក់ប្តីប្រពន្ធ បានប្ដឹងសុំឲ្យនគរបាលប៉ុស្ដិ៍កាកាប ជួយអន្តរាគមន៍ដោយពួកគាត់ បានរៀបរាប់ទាំងការហួសចិត្តប្រាប់នគរបាលថា ពួកគាត់មានមុខរបរទទួលម៉ៅការសំណង់ ហើយបានទទួលការងារពីបុរសម្នាក់ ដែលបានទទួលម៉ៅការបន្តពីអ្នកទទួល ការងារដោយផ្ទាល់ពីក្រុមហ៊ុន សំណង់បុរីផ្ទះល្វែង។
ខណៈនោះបន្ទាប់ពីទទួលការងារពីបុរសដែលជាអ្នកទម្លាក់ការងារឲ្យពួកគាត់ធ្វើនោះ ពួកគាត់បានរកកម្មករបានចំនួន២២នាក់ទៅធ្វើការងារ ហើយបុរសដែលជាអ្នកទទួលការងារ ដោយផ្ទាល់ពីក្រុមហ៊ុននោះក៏បានឲ្យពួកគាត់រកកម្មករដាក់ឲ្យបានឆាប់ និងប្រាប់ថាលុយកុំភ័យ ចាំការងាររួចរាល់ចាំបើកលុយពីខ្លួនថែមទៀតផង។
លុះក្រោយពេលធ្វើការងាររួចរាល់ជាស្ថាពរ ស្រាប់តែអ្នកទទួលការងារដោយផ្ទាល់ពីក្រុមហ៊ុននោះ មិនបានប្រាប់សូម្បីតែមួយម៉ាត់ឡើយ ហើយបានបើកលុយទៅឲ្យអ្នកម៉ៅការបន្តពីខ្លួននោះ និងត្រូវជននោះវេចលុយចំនួនជាង១៤លានរៀលទៅបាត់ចោលពួកគាត់ និងកម្មករទាំង២២នាក់។ បុរសស្ត្រីទាំងពីរនាក់ប្ដីប្រពន្ធនោះ បានធ្វើដំណើរទៅដាក់ពាក្យបណ្ដឹងនៅសាលាសង្កាត់កាកាប ខណ្ឌពោធិសែនជ័យ រាជធានីភ្នំពេញ កាលពីវេលាម៉ោង៣រសៀល ថ្ងៃទី២១ ខែមីនា ឆ្នាំ២០១៧។
ហើយត្រូវបានគេស្គាល់ស្ត្រីជាប្រពន្ធឈ្មោះ ឡន សុខន អាយុ៤៧ឆ្នាំ ជាអ្នកម៉ៅការសំណង់ស្នាក់នៅក្នុងភូមិប៉ាយ៉ាប សង្កាត់ឃ្មួញ ខណ្ឌសែនសុខ ចំណែកបុរសជាប្តីឈ្មោះ កែវ រីន អាយុ៥១ឆ្នាំ ជាមេការសំណង់ផងជាអ្នកម៉ៅការសំណង់ផង និងមានស្រុកកំណើតនៅភូមិឈូក ឃុំប្រឡាយ ស្រុកស្ទោង ខេត្តកំពង់ធំ ចាញ់បោកគេអស់លុយចំនួន១៤,២៣០,០០០រៀល(ដប់បួនលានពីរសែនបីម៉ឺនរៀល)។
ចំណែកអ្នកទី២ ដែលបានវេចលុយរត់គេចខ្លួនបាត់នោះឈ្មោះ វី និងអ្នកទី១ដែលជាអ្នកទទួលការងារដោយផ្ទាល់ពីក្រុមហ៊ុនសំណង់ មកទម្លាក់ឲ្យឈ្មោះ វី នោះត្រូវបានគេស្គាល់ឈ្មោះ ឆាត ។
ស្ត្រីខាងលើបាននិយាយថា កាលពីអំឡុងខែតុលា ឆ្នាំ២០១៦ កន្លងមកគាត់បានទទួលម៉ៅការងារពីបុរសឈ្មោះ វី នោះដោយព្រមព្រៀងគ្នាក្នុងតម្លៃសរុបចំនួន ១៨,២៣០,០០០រៀល(ដប់ប្រាំបីលានពីរសែនបីម៉ឺនរៀល) ហើយខណៈនោះក៏មានឈ្មោះ ឆាត ជាអ្នកដឹងឮ និងជម្រុញឲ្យគាត់រកកម្មករឲ្យបានច្រើនដើម្បីធ្វើការងារឆាប់ហើយ។
មិនតែប៉ុណ្ណោះឈ្មោះ ឆាត នោះក៏បានប្រាប់គាត់ថា រកកម្មករមកកុំភ័យធ្វើការឲ្យតែហើយទៅ ចាំបើកលុយពីខ្ញុំ ដោយសារតែមើលទៅគួរឲ្យទុកចិត្ត ទើបគាត់ស្វះស្វែងរកកម្មករទៅធ្វើការនៅទីនោះបានចំនួន២២នាក់។
លុះពេលធ្វើការហើយរួចរាល់ គាត់បានទៅបើកលុយ ត្រូវឈ្មោះ ឆាត ប្រាប់ថា បានបើកទៅឲ្យឈ្មោះ វី អស់ចំនួន ១៤,២៣០,០០០រៀលហើយ នៅសល់តែ៤លានរៀលប៉ុណ្ណោះ ពេលនោះគាត់បានទៅរកឈ្មោះ វី ដើម្បីបើកលុយឲ្យកម្មករ ប៉ុន្តែឮដំណឹងថាឈ្មោះ វីនោះបានរត់គេចខ្លួនបាត់ហើយ។
គាត់មិនបានដឹងថាឈ្មោះ វី និងឈ្មោះ ឆាត នោះត្រូវដងត្រូវផ្លែ និងឃុបឃិតគ្នាឬបែបណានោះឡើយ ទើបពេលបើកលុយឈ្មោះ ឆាត មិនបានប្រាប់គាត់សូម្បីតែមួយម៉ាត់បែបនេះ ហើយក៏ភ្លេចអស់នៅពេលដែលប្រាប់ឲ្យគាត់រកកម្មធ្វើការ និងប្រាប់មិនឲ្យគាត់ភ័យចាំធ្វើការរួចបើកលុយពីគេនោះ ដោយគ្មានជម្រើសទើបគាត់ប្ដឹងសុំឲ្យអាជ្ញាធរជួយគាត់៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
ចៅភ្លោះបីនាក់របស់សម្តេចតេជោចាប់កំណើតនៅស្រុករមាសហែក
ខេត្តស្វាយរៀង ៖ ចៅភ្លោះប្រុស-ស្រី៣នាក់ របស់សម្តេចអគ្គមហាសេនាបតីតេជោ ហ៊ុន សែន បានប្រសូត្រទៀតហើយ ធ្វើឲ្យមានការភ្ញាក់ផ្អើល ដល់ក្រុមគ្រូពេទ្យស្រុករមាសហែក ខណៈស្ត្រីម្នាក់បានឆ្លងទន្លេ ប្រសូត្របានទារកម្នាក់ទារិការ ២នាក់កាលពីវេលាម៉ោង ១២និង១៥នាទីយប់ឈានចូលថ្ងៃទី២១ ខែមីនា ឆ្នាំ២០១៧ ហើយត្រូវបានបញ្ជូនបន្តមកកាន់មន្ទីពេទ្យ បង្អែកខេត្តស្វាយរៀងដើម្បីសង្គ្រោះ ។
បើតាមក្រុមគ្រូពេទ្យសម្ភព នៃមន្ទីរពេទ្យខេត្តបានឲ្យដឹងថា ទារកទារិកាទាំងបីនាក់ក្រុមគ្រូពេទ្យបានជួយ សង្គ្រោះទាន់ពេលវេលា រហូតមកដល់វេលាម៉ោង ១២ថ្ងៃត្រង់ថ្ងៃទី២១ ខែមីនា ឆ្នាំ២០១៧ គឺមានសុខភាពល្អប្រសើរ ហើយចំណែកស្ត្រីជាម្តាយក៏មានសុខភាពធម្មតាដែរ ។
លោកគ្រូពេទ្យបន្តទៀតថា ទារកទារិការទាំង ៣នាក់គឺមានទម្ងន់មួយគីឡូ និងមួយគីឡូ២ខាំដោយគ្រូពេទ្យ បាននឹងកំពុងដាក់កំដៅ និងដាក់សេរ៉ូមជួយសង្គ្រោះនៅឡើយ ។ បើតាមបុរសជាប្ដីឈ្មោះ លី ចិន អាយុ២៣ឆ្នាំ មុខរបរកសិករបានឱ្យដឹងថា គាត់បានរៀបការ ជាមួយប្រពន្ធឈ្មោះ ចាន់ ឡុងនី អាយុ១៨ឆ្នាំ រស់ក្នុងភូមិឈើភ្លើង ឃុំកំពង់ត្រាច ស្រុករមាសហែកបានជាងមួយឆ្នាំមកហើយ ។
ប្រភពបន្តថា មុនពេលមានផ្ទៃពោះប្រពន្ធ គាត់បានយល់សប្តិឃើញមានមនុស្សបានឱ្យចិញ្ជៀន ៣វង់ដល់ប្រពន្ធគាត់ ដោយពាក់លើម្រាមដៃ ខណៈនោះប្រពន្ធគាត់បានត្រេកអរយ៉ាងខ្លាំង ហើយក៏បានភ្ញាក់ដឹងខ្លួន ឡើងប្រាប់ដល់គាត់ជាប្ដីទាំងព្រឹក ហើយពេលមានផ្ទៃពោះ បានទៅពិនិត្យផ្ទៃពោះ គឺមានកូនភ្លោះក៏ប៉ុន្តែមិនឃើញកូនភ្លោះដល់ទៅបីនាក់ទេ គឺគ្រាន់តែដឹងថា កូនភ្លោះ ហើយនៅមុនថ្ងៃឆ្លងទន្លេមួយអាទិត្យប្រពន្ធរបស់គាត់យល់សប្តិម្តងទៀត ឃើញមនុស្សប្រុស ពាក់ជញ្ជៀន៣វង្សឲ្យប្រពន្ធគាត់ម្តងទៀត ។
ប្រភពបន្តទៀតថា ស្រាប់តែនៅយប់ថ្ងៃទី២០ ខែមីនា ឆ្នាំ២០១៧ ប្រពន្ធគាត់បានឈឺពោះហើយក៏បានឱ្យគាត់ និងក្រុមគ្រួសារប្រញាប់ដឹកមកកាន់មន្ទីពេទ្យស្រុករមាសហែកភ្លាមៗ រហូតមកដល់ម៉ោង១២និង១៥នាទីយប់ ក៏ប្រសូត្របានទារកម្នាក់ និងទារិកា២នាក់ គឺកូនភ្លោះដល់ទៅ៣នាក់ ដោយសុខភាពទារកនិងទារិកាមិនល្អក្រុមគ្រូពេទ្យបានដឹកបញ្ជូនបន្ត មកកាន់មន្ទីពេទ្យ ខេត្តស្វាយរៀងដើម្បីសង្គ្រោះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]