ចោរមួយក្រុមចូលទៅគាស់ផ្ទះ អាជីវករលក់គ្រឿង​អលង្ការនៅសង្កាត់ទឹកថ្លា យកអស់ជិត៤ម៉ឺនដុល្លារ, បើកចូលផ្លូវទ័ល ក្រុមចោរទុក​រថយន្ត​រត់គេចខ្លួនអស់ (មានវីដេអូ)

(ភ្នំពេញ)៖ ស្រ្តីដែលជាអាជីវករលក់គ្រឿងអលង្ការម្នាក់ នៅផ្សារតនាផ្លាហ្សា ស្ថិតនៅភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ បាននិយាយថា មានចោរមួយក្រុម មិនដឹងប៉ុន្មានបានចូលគាស់ផ្ទះរបស់ខ្លួន ហើយប្រមូលយកលុយ និងគ្រឿងអលង្ការអស់ជិត៤ម៉ឺនដុល្លារ នាថ្ងៃទី២១ ខែមីនា ឆ្នាំ២០១៧នេះ។

ក្រុមចោរបានបើករថយន្តមួយគ្រឿងម៉ាក Camery ឆ្លាមពណ៌ខ្មៅ ពាក់ស្លាកលេខ ភ្នំពេញ2P-1129 យកទៅប្លុងចោលតាមផ្លូវដឿងហែម នៅក្បែរផ្សារទឹកថ្លា ​ដោយសារបើកទៅមុខមិនរួចពោលប៉ះចំផ្លូវទ័ល។ ភ្នាក់ងារ Fresh News បានរាយការណ៍ថា នៅរសៀលថ្ងៃទី២១ ខែមីនា ឆ្នាំ២០១៧នេះ កម្លាំងសមត្ថកិច្ចទាំងនគរបាល និងអាវុធហត្ថ បានចុះទៅកាន់ទីតាំងដែលក្រុមចោរបានយករថយន្តរបស់ខ្លួន ប្លុងចោលនៅទីនោះ​ ដើម្បីពិនិត្យរកវត្ថុតាងបន្ថែមទៀត។

ស្រ្តីរងគ្រោះ ម៉េង វ៉ាន់លី អាយុ៣៥ឆ្នាំ បាននិយាយថា លុយបាត់បង់ប្រហែល៣០០ទៅ៤០០ដុល្លារ ប៉ុន្តែគ្រឿងអលង្ការវិញ បាត់បង់រហូតដល់ជិត៤ម៉ឺនដុល្លារ។

ស្រ្តីរងគ្រោះបានបន្តថា មុនពេលកើតហេតុ គាត់បានចេញពីផ្ទះយកឯកសារទៅដាក់នៅសាលាខណ្ឌទួលគោក ក្រោយមកបានជិះម៉ូតូកង់បីត្រឡប់មកផ្ទះវិញ ខណៈមកដល់មុខផ្ទះអោនចាក់សោរបងស្រាប់តែឃើញជនសង្ស័យ២នាក់ លោតផ្លោះរបងចេញពីផ្ទះគាត់ទៅផ្ទះម្ខាងទៀត។

ពេលនោះគាត់ស្មានតែសមត្ថកិច្ចដេញ ចាប់ពួកជនជាតិក៏ចូលដល់ក្នុងផ្ទះឃើញចំរឹងបង្អួចរបើកគាត់ ក៏ចេញមកវិញស្រែកចោរៗ ហើយជនសង្ស័យក៏រត់ឡើងរថយន្តបក្ខពួក ដែលបញ្ឆេះចាំស្រាប់។ ភ្លាមៗនោះសន្តិសុខឯកជនបានឃើញ និងបានវាយរថយន្តខាងលើមួយដៃបែកកញ្ចក់ទ្វារមុខ ហើយបោះដៃតៗគ្នាឲ្យបិតប៉ារ៉ាស់ខាងមុខ តែរថយន្តខាងលើបើកបុកប៉ារ៉ាស់ហើយគេចខ្លួនដោយសុវត្ថិភាព។

សម្រាប់រថយន្តខាងលើនេះ​ នឹងត្រូវយកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីចាត់ការបន្តទៀត៕

ប្រភព៖ fresh news

ដោយឡែកពត៌មានគួរឲ្យចាប់អារម្មណ៍មួយផ្សេងទៀត៖

ទុករថយន្តចោលត្រូវចោរចូលលួច យកគ្រឿងអលង្ការ និងលុយ១៣០០០ដុល្លារ, កម្លាំងនគរបាលព្រហ្មទណ្ឌកម្រិតស្រាល តាមបង្ក្រាបបានវិញ

(ភ្នំពេញ)៖ កម្លាំងការិយាល័យនគរបាល​ព្រហ្មទណ្ឌកម្រិត​ស្រាល នៃស្នងការដ្ឋាននគរបាលរាជធានី​ភ្នំពេញ បានឃាត់ខ្លួនជនសង្ស័យម្នាក់ ក្រោយពីបានធ្វើសកម្មភាពលួចបើកទ្វារ​ យកគ្រឿងអលង្ការ និងលុយនៅក្នុងរថយន្ត ជាប់របងវត្តព្រែកប្រា សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ និងបានបញ្ជូនទៅតុលាការនៅថ្ងៃទី២១ ខែមីនា ឆ្នាំ២០១៧​នេះ។

មន្ត្រីនគរបាលព្រហ្មទណ្ឌកម្រិតស្រាល រាជធានី​ភ្នំពេញបានឲ្យដឹងថា ជនសង្ស័យខាងលើនេះ ឈ្មោះ នី ម៉ូនីន អាយុ១៧​ឆ្នាំ ស្នាក់នៅភូមិជំពុះក្អែក សង្កាត់​ព្រែកថ្មី ខណ្ឌច្បារអំពៅ រាជធានីភ្នំពេញ បានធ្វើសកម្មភាពលួចបើកទ្វាររថយន្តយកសម្ភារមួយចំនួនរួមមាន៖ ខ្សែកផ្លាក​ទីន​បន្តោងពេជ្រ,​ ក្រវិលពេជ្រ, ​ចិញ្ចៀន, ប្រាក់ដុល្លារ១៣,០០០ដុល្លារ, ប្រាក់រៀលចំនួន២,០០០,០០០រៀល និងឯកសារមួយចំនួន)​ នៅ​ចំណុចទល់មុខ​កន្លែងលក់​ផ្កា ផ្លូវឧកញ៉ាម៉ុងឬទ្ធី សង្កាត់ភ្នំពេញ្មថ្មី ខណ្ឌសែនសុខ រាជធានី​ភ្នំពេញ។

មន្ត្រីនគរបាលបានបន្ថែមទៀតថា ចំណែកឯជនរងគ្រោះ ឈ្មោះ ប៉ែន សុភាព ភេទស្រី អាយុ៤៩​ឆ្នាំ ជនជាតិខ្មែរ ​ស្នាក់នៅផ្ទះលេខ៤៩ ​ផ្លូវ​លេខ១​ បុរីពិភពថ្មី សង្កាត់ភ្នំពេញ្មថ្មី ខណ្ឌសែនសុខ រាជធានី​ភ្នំពេញ មុខរបរលក់ដូរ៕