ខេត្តកណ្ដាល ៖ កាលពីវេលាម៉ោង ១៤និង៣០នាទីថ្ងៃទី២០ ខែមីនា ឆ្នាំ២០១៧ មានករណីលង់ទឹកស្លាប់នៅចំណុចក្នុងទឹកព្រែកមុខកំពូល ក្រោយផ្ទះឈ្មោះ សៅ ណាត ភូមិឈើទាលភ្លោះ ឃុំស្វាយអំពារ ស្រុកមុខកំពូល ខេត្តកណ្ដាល ។ ដោយជនរងគ្រោះឈ្មោះ រុំ ស្រីលី ភេទស្រី អាយុ១៤ឆ្នាំ ជនជាតិខ្មែរ ជាសិស្ស នៅភូមិដើមជ្រៃ ឃុំរកាកោងទី2 ស្រុកមុខកំពូល ខេត្តកណ្តាល ។
ហេតុការណ៍នេះបានកើតឡើងនៅថ្ងៃដែលជនរងគ្រោះ និងក្មេងស្រីចំនួន៣នាក់ទៀតបាននាំគ្នាទៅងូតទឹកព្រែកចំណុចកើតហេតុដោយមានការដេញប្រលែងគ្នាលេងក្នុងនោះមានឈ្មោះ ប៉ូន សុខខន និងគូរដណ្តឹងកំពុងបោកគួកខោអាវនៅទីនោះ ហើយឈ្មោះ គីង សារឿន និងប្រពន្ធបានចុះទៅរាវលៀសនៅខាងត្បូងជនរងគ្រោះចម្ងាយប្រហែល២០ម៉ែត្រ ក្នុងពេលនោះជនរងគ្រោះបានធ្លាក់ចូលក្នុងរណ្តៅទឹកព្រែក លង់ធ្វើដៃខ្វៃៗ ហើយក្មេងទាំងនោះនឹកស្មានថា ជនរងគ្រោះធ្វើលេងរហូតជនរងគ្រោះលិចខ្លួនបាត់ទៅ ហើយបានផ្អើលឆោឡោនាំគ្នាមុជរាវរកជនរងគ្រោះ ទើបឃើញសពជនរងគ្រោះហើយនាំគ្នាលើកសពជនរងគ្រោះយកទៅផ្ទះ ។
នៅវេលាម៉ោង១៤និង៤០នាទីសមត្ថកិច្ចប៉ុស្តិ៍បានទទួលព័ត៌មានខាងលើបានសហការជាមួយកម្លាំងជំនាញស្រុកដោយមានការចូលរួមពីអាជ្ញាធរមូលដ្ឋានបានចុះធ្វើការពិនិត្យសាកសពឃើញថា ពុំមានស្លាកស្នាមអ្វីនៅលើខ្លួនសាកសពឡើយមានតែទឹកចេញតាមមាត់នៅពេលក្រឡាប់សាកសព ។ ក្រុមគ្រួសារជនរងគ្រោះបានទទួលស្គាល់ថា ជនរងគ្រោះពិតជាបានលង់ទឹកស្លាប់ដោយខ្លួនឯងពិតប្រាកដមែន ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
អាសូរខ្លាំងណាស់! ក្មេងតូចៗ៤នាក់លង់ទឹកស្រះ បណ្តាលឲ្យស្លាប់ ក្នុងស្រុកអង្គបុរី ខេត្តតាកែវ
(តាកែវ)៖ គួរឲ្យអាសូរខ្លាំងណាស់! ក្មេងតូចៗអាយុចាប់ពី៣ទៅ៤ឆ្នាំ (ប្រុស៣នាក់ ស្រីម្នាក់) បានលង់ទឹកស្រាប់យ៉ាងវេទនា នៅរសៀលថ្ងៃទី២០ ខែមីនា ឆ្នាំ២០១៧នេះ ស្ថិតនៅទីតាំងទឹកស្រះសម្រាប់ស្តុកលក់ ក្នុងភូមិតាមួង ឃុំព្រៃផ្គាំ ស្រុកអង្គបុរី ខេត្តតាកែវ។
ភ្នាក់ងារ Fresh News បានរាយការណ៍ថា ក្មេងរងគ្រោះទាំង៤នាក់ បាននាំគ្នាទៅលេងនៅទឹកស្រះនោះ ស្រាប់តែលង់ស្លាប់ទាំងអស់គ្នាតែម្តង ដោយឪពុកម្តាយមិនបានដឹងនោះទេ។
យោងតាមរបាយការណ៍របស់មន្រ្តីនគរបាលមូលដ្ឋាន បានឲ្យដឹងថា ទឹកស្រះនេះជាកម្មសិទ្ធិរបស់លោក ឈុន សារិន ហៅពៅប៉ោង ដែលជាកន្លែងស្តុកទុកសម្រាប់លក់ និងចែកចាយ។
បើតាមសមត្ថកិច្ចក្មេងរងគ្រោះទាំង៤នាក់រួមមាន៖ ទី១ឈ្មោះ សុខ សុផានិត ភេទប្រុសអាយុ៤ឆ្នាំ ទី២ឈ្មោះ សុខ សាប ភេទប្រុស អាយុ៤ឆ្នាំ ទី៣ឈ្មោះ សុខ ហេង ភេទប្រុស អាយុ៤ឆ្នាំ និងទី៤ឈ្មោះ រឿន ស្រីយ៉ា ភេទស្រី អាយុ៣ឆ្នាំ។
បន្ទាប់ពីប្រទះឃើញសព ប្រជាពលរដ្ឋ និងសមត្ថកិច្ចមូលដ្ឋាននបានទៅស្រង់ និងប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
