កោះម៉ាឌីវ៖ កាលពីម្សិលមិញនេះ ពោលគឺនៅថ្ងៃទី ២០ ខែមីនា ឆ្នាំ២០១៧ គឺជាថ្ងៃគម្រប់ខួបអាពាហ៍ពិពាហ៍២ឆ្នាំ របស់លោកឧកញ៉ា គិត ម៉េង ជាមួយនឹង លោកជំទាវ ម៉ៅ ចំណាន។
ជាការពិតណាស់ ក្នុងឱកាសគម្រប់ខួបអាពាហ៍ពិពាហ៍ រយៈពេល២ឆ្នាំនេះផងដែរ លោកឧកញ៉ា គិត ម៉េង និងលោកជំទាវ រួមជាមួយទាំងអ្នកកំដរទាំង៣គូ ដែលសុទ្ធសឹងតែជា អ្នកមានទ្រព្យធនលំដាប់ឧកញ៉ា បាននាំគ្នាទៅកម្សាន្តលំហែកាយលក្ខណៈវីអាយភី យ៉ាងមានសេចក្តីសុខ ជាមួយនឹងទេសភាពកោះម៉ាឌីវ ដ៏សែនស្រស់ស្អាតរ៉ូមែនទិក និងជាកន្លែងដែលគូស្នេហ៍ជាច្រើនប្រាថ្នាចង់ទៅផងដែរ៕
ដូចនេះ ចង់ដឹងថារ៉ូមែនទិកយ៉ាងណា ទស្សនារូបភាពខាងក្រោមទាំងអស់គ្នា៖
ដោយឡែក គួររំលឹកផងដែរថាទាក់ទងទៅនឹង អាថ៌កំបាំង នាំឲ្យអ្នកឧកញ៉ា គិត ម៉េង និងស្រីតូច ចំណាន ឈានចូលដល់ អាពាហ៍ពិពាហ៍ ។
គួរឲ្យដឹងថា នៅក្នុងពិធីរៀបអាពាហ៍ពិពាហ៍ របស់មហាសេដ្ឋីស្រុកខ្មែរ អ្នកឧកញ៉ា គិត ម៉េង និងស្រីតូច ចំណាន ដ៏មហាអធិកអធមជាទីបំផុត នារាត្រីថ្ងៃទី២០ ខែមីនា ឆ្នាំ២០១៥ នៅទីក្រុងកោះពេជ្រ ដោយមានការចូលរួមពីមន្រ្តីថ្នាក់ដឹកនាំប្រទេសកំពូលៗនោះ ត្រូវបានលោក ហ៊ុយ វណ្ណៈ ជាមនុស្សជំនិត របស់អ្នកឧកញ៉ា គិត ម៉េង និងជានាយកគ្រប់គ្រងព័ត៌មានរបស់ស្ថានីយទូរទស្សន៍ CNC ដ៏ល្បីនៅកម្ពុជា បានទម្លាយ នៅរសៀលថ្ងៃទី២១ ខែមីនា ឆ្នាំ២០១៥ ក្រោយពីបញ្ចប់កម្មវិធីមង្គលការរបស់អ្នកឧកញ៉ា គិត ម៉េង និងរៀបប្រាប់ យ៉ាងដូច្នេះថា៖
ប្រវត្តិដើមហេតុនៃការឈានចូល រៀបចំពិធីមង្គលការរបស់អ្នកឧកញ៉ា គិត ម៉េង និងស្រីតូច ចំណាន គឺផ្តើមចេញពីលើកឡើងកូនស្រីទី២ របស់អ្នកឧកញ៉ា គិត ម៉េង មានឈ្មោះ គិត ស៊ូរៀ អាយុ ៨ឆ្នាំ បានសួរទៅម្តាយរបស់នាង (ស្រីតូច ចំណាន) ថា «ម៉ាក់ៗ ឃើញតែទៅញុំាការគេ ទើបពេលណា បានម៉ាក់រៀបការ» ។
លុះនៅថ្ងៃមួយ ក្នុងដំណើរទស្សនកិច្ចជាលក្ខណៈឯកជន ជាមួយសម្តេចតេជោ ហ៊ុន សែន នាយករដ្ឋ មន្រ្តីនៃកម្ពុជា និងសម្តេចកិតិ្ត ព្រឹទ្ធបណ្ឌិត រួមនឹងមន្រ្តីជាន់ខ្ពស់មួយចំនួន នៅប្រទេសសិង្ហបុរី ក្នុងអំឡុង ខែ១១ ឆ្នាំ២០១៣ ដោយនៅពេលនោះ កូនស្រីទី២ អាយុ ៨ឆ្នាំ (គិត ស៊ូរៀ ) បានលើកជា សំណួរទៅកាន់ សម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ក្នុងនាមជាចៅ នៅក្នុងឱកាសទទួលទាន អាហារជួបជុំគ្នា ដោយ បានលើកឡើងយ៉ាងដូច្នេះថា «តា តា ខ្ញុំចង់ឃើញ ម៉ាក់រៀបការដូចគេ សូមតាជួយផង!»
ដោយខណៈពេលនោះ សម្តេចតេជោ ហ៊ុន សែន បានឆ្លើយតបវិញថា «តើ! ចង់ឲ្យតាធ្វើដូចម្តេច» នៅពេលនោះកូនស្រីទី២ របស់អ្នកឧកញ៉ា គិត ម៉េង បានឆ្លើយតបទៅកាន់សម្តេចតេជោ វិញថា «សូមឲ្យតាចេញបញ្ជាទៅ ទើបបាន!» ។ ហើយគំនិតរបស់កូនស្រី ស៊ូរៀ ចង់ឃើញឪពុកម្តាយ រៀបការនោះ ត្រូវបានសម្តេចទាំងពីរជំរុញ និងជួយជ្រោមជ្រែងទៅអ្នកឧកញ៉ា គិត ម៉េង និងស្រីតូច ចំណាន ឲ្យឈានជើងចូលរោងការតែម្តង។
លោក ហ៊ុយ វណ្ណៈ បានបន្តរៀបរាប់ថា ថ្ងៃកំណត់អាពាហ៍ពិពាហ៍របស់អ្នកឧកញ៉ា គិត ម៉េង ត្រូវបានជ្រើសរើស យ៉ាងសម្រិតសម្រាំង ដោយកំណត់យកថ្ងៃមួយក្នុងខែមីនា ដែលជាថ្ងៃគម្រប់ ខួបមួយឆ្នាំនៃការផ្តាច់បារី ដើម្បីសុខភាពរបស់សម្តេចតេជា ហ៊ុន សែន នោះគឺថ្ងៃទី២០ ខែមីនា ឆ្នាំ២០១៥ នេះឯង។
មនុស្សជំនិតអ្នកឧកញ៉ា គិត ម៉េង រូបនោះបានបញ្ជាក់ថា នៅរសៀលថ្ងៃសៅរ៍ ទី២១ ខែមីនានេះ អ្នកឧកញ៉ា គិត ម៉េង បានរៀបចំ ជប់លៀងមួយជូន បុគ្គលិក និងអ្នកជួយរៀបចំកិច្ចការក្នុងពិធីមង្គលការ ដែលបាននឿយហត់រយៈពេលប៉ុន្មានថ្ងៃមកនេះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
