ខេត្តស្ទឹងត្រែង ៖ បុរសម្នាក់ត្រូវបាន កម្លាំងនគរបាលចាប់ខ្លួន ក្រោយប្រើប្រាស់កាំបិតចុងស្រួចចាក់ទៅប្រពន្ធរបស់ខ្លួន កាលពីវេលាម៉ោង២២និង៣០នាទីយប់ ថ្ងៃទី១៩ ខែមីនា ឆ្នាំ២០១៧ ស្ថិតក្នុងភូមិវាលពោធិ៍ ឃុំអន្លង់ភេ ស្រុកថាឡាបរិវ៉ាត់ ។ មូលហេតុដោយសារខ្មាស់អ្នកភូមិដៀលត្មះថា ចេះអំពើធ្មប់បង្កការភ័យខ្លាច។
មន្ត្រីនគរបាលប៉ុស្តិ៍រដ្ឋបាលឃុំអន្លង់ភេ បានប្រាប់ឱ្យដឹងថា ជនសង្ស័យ និងជនរងគ្រោះត្រូវជាប្តីប្រពន្ធនឹងគ្នា រស់នៅភូមិ-ឃុំកើតហេតុខាងលើ ជាជនជាតិភាគតិចគួយ ដោយប្រកបរបរធ្វើស្រែចំការ។ មន្ត្រីដដែលបន្តថា ជនសង្ស័យជាប្តីបានប្រើកាំបិតចុងស្រួចចាក់ទៅលើស្ត្រីជាប្រពន្ធរបស់ខ្លួនមួយកាំបិត លើចុងដោះខាងស្តាំ បណ្តាលឱ្យស្លាប់នៅលើផ្ទះរបស់ខ្លួន។
ប្រភពបានឱ្យដឹងទៀតថា ពលរដ្ឋក្នុងភូមិជាមួយគ្នានោះ តែងដៀលត្មះលើគ្រួសារនោះថា ចេះអំពើអាប ធ្មប់ងាយបង្កគ្រោះថា្នក់ដល់មនុស្សក្នុងភូមិណាស់ ហើយគ្រួសារមួយនេះតែងខ្មាសអៀនជាខ្លាំង ស្ទើរមិនចង់ឃើញមុខអ្នកក្នុងភូមិនោះផងដែរ។
ប្រភពបន្តទៀតថា មុនពេលកើតហេតុបុរសជាប្តីបានផឹកស្រាស្រវឹងជោកជាំ តាំងពីថ្ងៃរហូតដល់យប់ហើយជជែកជាមួយប្រពន្ធថា នឹងសម្លាប់ខ្លួនទាំងអស់គ្នា ព្រោះមិនអាចរស់នៅក្នុងភូមិនេះទៀតបានទេ ដោយសព្វថ្ងៃរងការដៀលត្មះពីអ្នកភូមិជាច្រើននិយាយចោទប្រកាន់ថា គ្រួសារយើងចេះអាប ចេះធ្មប់ ប្រសិនជារស់តទៀត ពិតជាខ្មាសគេ និងមិនចង់រស់នៅក្នុងភូមិឡើយ ។
ភ្លាមនោះលុះបុរសជាប្តីក៏បានយកកាំបិតចុងស្រួចចាក់លើប្រពន្ធចំដើមទ្រូងដេកស្លាប់នៅលើគ្រែក្នុងមុងលើផ្ទះ។ ក្រោយពីយកកាំបិតចាក់ប្រពន្ធរួចហើយ ខ្លួនក៏ងងឹតមុខឈឹងមិនដឹងថា ខ្លួនបានធ្វើអ្វីសោះ ក្រោយមកទៀតពេលដឹងខ្លួនឡើង ក៏ស្រាប់តែត្រូវប្អូនថ្លៃចាប់ចង រួចប្រគល់ឱ្យសមត្ថកិច្ចតែម្តង។
តែប្រភពមួយទៀតបាននិយាយថា ក្រោយបុរសជាប្តីចាក់សម្លាប់ប្រពន្ធបានចុះពីលើផ្ទះយកកាំទៅឱ្យគេ រួចប្រាប់គេថា ខ្លួនចាក់សម្លាប់ប្រពន្ធហើយ ភ្លាមនោះទើបមានការចាប់ខ្លួនប្រគល់ឱ្យសមត្ថកិច្ចតែម្តង។
ជាការប៉ាន់ស្មានរបស់នគរបាលព្រហ្មទណ្ឌកម្រិតធ្ងន់ថា ពិតជាមានរឿងការចោទប្រកាន់ពីអ្នកភូមិថា គ្រួសារនោះចេះអំពើអាបធ្មប់មែន តែពុំមានអ្នកណាម្នាក់ឃើញជាក់ស្តែងថា គ្រួសារនោះធ្វើឱ្យអ្នកភូមិស្លាប់ដោយភស្តុតាងអ្វីមួយឡើយ ហើយស្ថិតក្រោយហេតុការណ៍នោះសមត្ថកិច្ចប៉ាន់ស្មានថា ជនសង្ស័យជាប្តីចាក់សម្លាប់ប្រពន្ធ រួចនឹងត្រូវចាក់សម្លាប់ខ្លួនជាក្រោយ តែទំនងមិនដាច់ចិត្តចាក់សម្លាប់ខ្លួន ទើបយកកាំបិតទៅប្រគល់ឱ្យគេ រួចត្រូវគេចាប់ខ្លួនប្រគល់ឱ្យសមត្ថកិច្ចជាក្រោយ។
នគរបាលប៉ុស្តិ៍រដ្ឋបាលឃុំអន្លុងភេ បានបញ្ជាក់ថា ជនសង្ស័យឈ្មោះ ស៊ុត រ៉េត អាយុ៤៤ឆ្នាំ ជនជាតិភាគតិចគួយ រីឯស្ត្រីរងគ្រោះឈ្មោះ វឿន ឡី អាយុ៣៩ឆ្នាំ ជនជាតិភាគតិចគួយ រស់នៅភូមិ-ឃុំកើតហេតុខាងលើ គ្រួសារអ្នកទាំង២មានកូន៥នាក់ ប្រុស៤នាក់ និងកូនស្រីច្បងម្នាក់។ បច្ចុប្បន្នជនសង្ស័យត្រូវបានសមត្ថកិច្ចនាំខ្លួនមកសួរនាំបន្ថែមនៅស្នងការដ្ឋាននគរបាលខេត្តស្ទឹងត្រែង៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
ដល់ម្ល៉ឹង! សុំបទ«រាំអីចេះ» ចេញបទ «បុណ្យភូមិ» ស្ទុះវ៉ៃអ្នកភ្លេងប្រាវ
រាជធានីភ្នំពេញ ៖ ខណៈកម្មវិធីមង្គលការជិតចប់ ហើយខណៈមានការរាំកម្សាន្តដែរនោះ ស្រាប់តែឈ្លោះប្រកែកគ្នា រហូតបង្កហិង្សា ធ្វើឱ្យអ្នកតន្ត្រីករ២នាក់បានរងរបួស ព្រមទាំងមិនព្រមឱ្យប្រាក់ថ្លៃអកកាដង់ ដោយសារតែម្ចាស់ដើមការកុំម្មង់ឱ្យច្រៀងបទ«រាំអីចេះ» ទៅចេញបទ «បុណ្យភូមិ» ។
ហេតុការណ៍នេះ បង្កការភ្ញាក់ផ្អើលដល់សមត្ថកិច្ច កាលពីវេលាម៉ោង១១ និង៣០នាទីយប់ថ្ងៃទី១៩ មីនា ស្ថិតនៅចំណុចភូមិរំដួល សង្កាត់ស្នោ ខណ្ឌពោធិ៍សែនជ័យ ។ ជនរងគ្រោះទី១មានឈ្មោះនៅ វី ភេទប្រុស អាយុ៣៤ឆ្នាំ ជាអ្នករៀបឆាកអកកាដង់ ស្នាក់នៅភូមិអង្គ សង្កាត់ចោមចៅ ខណ្ឌពោធិ៍សែនជ័យ មានស្រុកកំនើតភូមិសង្កាត់ខាងលើ និងទី២-ឈ្មោះគឹម សី ភេទប្រុស អាយុ៣៦ឆ្នាំ ជាមេការអកកាដង់ ស្នាក់នៅភូមិអង្គសង្កាត់ចោមចៅ ខណ្ឌពោធិ៍សែនជ័យ មានស្រុកកំនើតនៅភូមិជ្រោយស្វាយ ឃុំជ្រោយស្វាយ ស្រុកស្រែអំបិល ខេត្តកោះកុង របួសស្រាល២នាក់ ។
តាមសម្តីផ្ទាល់ពីបុរសជនរងគ្រោះថា មុនពេលកើត ម្ចាស់ដើមការបានជួលក្រុមអកកាដង់គាត់មកលេង ក្នុងកម្មវិធីមង្គលការ។ខណៈពេលភ្ញៀវហូបដល់យប់ មានកម្មវិធីរាំកម្សាន្ត ក៏មានបុរសម្នាក់ទៅកុំម្មង់សុំឱ្យច្រៀងបទ «បុណ្យភូមិ» រួចហើយក៏ដើរចេញទៅបាត់ ។
ក្រុមអ្នកភ្លេងរៀបចំចេញបទ «បុណ្យភូមិ» ហើយ ស្រាប់តែមានស្ត្រីវ័យចំណាស់ម្នាក់ ដែលអះអាងថា ជាបងប្អូនម្ចាស់ការ បានមកកុំម្មង់បទឱ្យច្រៀងបទ «រាំអីចេះ» លុះពេលក្រុមតន្ត្រីបានចេញបទ «បុណ្យភូមិ»មុន ធ្វើឲ្យខាងម្ចាស់ការខឹង បាននាំគ្នាទៅវាយក្រុមតន្ត្រីករចំនួន២នាក់ បណ្តាលអោយរងរបួសស្រាលតែម្តង ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
