រាជធានីភ្នំពេញ ៖ សេចក្តីរាយការណ៍បានបន្តឱ្យដឹងថា ពាក់ព័ន្ធករណីមន្ត្រីប៉ូលិសម្នាក់ បានដកកាំភ្លើង(អាកា) បាញ់រះឡើងលើចំនួន៥គ្រាប់ បន្ទាប់ពីខឹងប្រពន្ធបានទៅផ្ទះអ្នកជិតខាងផឹកស្រាបន្តិចបន្តួច គឺគិតត្រឹមរសៀលថ្ងៃទី២០ មីនា នេះ ត្រូវបានកម្លាំងសមត្ថកិច្ចចម្រុះចុះទៅឃាត់ខ្លួនបាន នៅក្នុងនាយកដ្ឋានអត្តសញ្ញាណកម្មតែម្តង ក្រោយពីលោកនាយឧត្តមសេនីយ៍នេត សាវឿន អគ្គស្នងការនគរបាលជាតិ ចេញបញ្ជា ។
មន្ត្រីប៉ូលិសជាប់ចោទខាងលើ ឈ្មោះស្វាយ ពិសិដ្ឋ អាយុ៣៤ឆ្នាំ បម្រើការនៅនាយកដ្ឋានសិ្ថតិនៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃ ។
ប្រភពបន្តថា នៅក្នុងសកម្មភាពបាញ់រះនោះ ក៏ត្រូវបានកាមេរ៉ាសុវត្ថិភាពក្នុងបុរីសម្បត្តិមានហេងច្បារអំពៅ (ដែលជាទីតាំងកើតហេតុ) ថតបានយ៉ាងជាក់ស្តែង ។ ក្នុងនោះ គេឃើញជននេះបានដើរចេញពីក្នុងផ្ទះ រួចដកកាំភ្លើងបាញ់មេឃមួយសារ ខណៈដែលមានមនុស្សច្រើននៅជុំវិញនោះ ។ ក្រោយមក ជននេះរត់ចូលបើករថយន្តរ៉ឺយ៉ែចេញ ហើយក៏ដកកាំភ្លើងបាញ់ឡើងលើបន្តទៀត ទើបបើករថយន្តគេចតែម្តង ។
គួររំលឹកថា ស្នូរផ្ទុះអាវុធចំនួន៥គ្រាប់បានបន្លឺឡើងយ៉ាងរន្ទឺពេញមេឃ បន្ទាប់ពីបុរសម្នាក់ខឹងប្រពន្ធរបស់ខ្លួនទៅផឹកស៊ីនៅផ្ទះអ្នកជិតខាង ស្រាប់តែយកកាំភ្លើង AK ចេញពីក្នុងរថយន្តបាញ់រះឡើងលើតែម្តង ដែលហេតុការណ៍នេះ បង្កការភ្ញាក់ផ្អើលនៅវេលាម៉ោង០៥ និង៤០នាទីល្ងាចថ្ងៃទី១៩ មីនា ស្ថិតនៅចំណុចផ្ទះលេខ២៦៤ ក្នុងបុរីសម្បត្តិមានហេង ក្រុមទី១ ភូមិតាង៉ៅ សង្កាត់និរោធ ខណ្ឌច្បារអំពៅ ។
ប្រភពបន្តថា មុនពេលកើតហេតុ ស្ត្រីជាប្រពន្ធ (ពុំទាន់ស្គាល់ឈ្មោះ) ត្រូវអ្នកជិតខាងហៅទៅហូបចុកបន្តិចបន្តួច ។ ស្របពេលនោះ បុរសជាប្តីបានជិះរថយន្តមួយគ្រឿងម៉ាក High Lander ពណ៌.ស មិនចាំស្លាកលេខមកដល់ផ្ទះ (ប្រពន្ធពេលឃើញប្តីមកដល់ ទើបរត់មកផ្ទះវិញ) ។ ភ្លាមៗនោះ ប្តីបានសួរទៅប្រពន្ធថា «មានបានផឹកស្រាឬអត់0x017d7» ។ ប្រពន្ធតបទៅប្តីថា «ផឹកតែបន្តិចបន្តួចប៉ុណ្ណោះ» ។ ក្រោយមក ប្តីបានរត់ទៅបើកទ្វាររថយន្តទាញកាំភ្លើង AK មួយដើមមកបាញ់រះ នៅមុខផ្ទះរបស់ខ្លួន៥គ្រាប់ ទៅលើវេហា ដើម្បីបញ្ចេញកំហឹង។ ក្រោយការបាញ់រះ ជនបង្កបានបើករថយន្តចេញទៅបាត់ស្រមោលតែម្តង ។
ស្ត្រីជាប្រពន្ធរៀបរាប់ថា ខ្លួនពិតជាត្រូវបានអ្នកជិតខាងបបួលទៅញ៉ាំនៅផ្ទះពួកគេពិតប្រាកដមែន ប៉ុន្តែខ្លួនមិនបានផឹកច្រើននោះទេ គឺផឹកស្រាតែបន្តិចបន្តួចប៉ុណ្ណោះ ។ នាងបន្តថា នាងមិនសូវចេះផឹកឡើយ ពេលអ្នកជិតខាងហៅ នាងក៏មិនចង់ចូលរួមដែរ ប៉ុន្តែដោយនឹកឃើញថា ជាអ្នកជិតខាងគ្នាទើបទៅចូលរួមញ៉ាំបន្តិចទៅ ប៉ុន្តែចង្រៃអ្វីស្របពេលនោះ បុរសជាប្តីបានមកដល់ ស្របពេលដែលនាងកំពុងផឹកជជែកលេងនៅផ្ទះរបស់គេ ក៏កើតចិត្តខឹងសម្បារ ហើយស្ទុះទាញ AK បាញ់រះ បង្កឱ្យមានការភ្ញាក់ផ្អើលឡើងតែម្តង ។
ប្រភព៖ កោះសន្តិភាព
ដោយឡែករំលឹកព័ត៌មានផ្សេងមួយទៀត៖ សរសៃគុយទាវមានសារធាតុបូរ៉ាក់ ទឹកកក្រូច ចាហួយដូង និងទឹកដោះគោខាប់ដែលខូចគុណភាព មានលក់ក្នុងផ្សារព្រៃវែង, មន្រ្តីកាំកុងត្រូលដកហូតយកទៅកម្ទេចចោល
(ព្រៃវែង)៖ មន្រ្តីកាំកុងត្រូលសាខាខេត្តព្រៃវែង សហការជាមួយមន្ទីរពាណិជ្ជកម្មខេត្ត នគរបាលប្រឆាំងបទល្មើសសេដ្ឋកិច្ចខេត្ត រួមជាមួយអាជ្ញាធរមូលដ្ឋាន នៅព្រឹកថ្ងៃទី២០ ខែមីនា ឆ្នាំ២០១៧នេះ បានបន្តចុះអង្កេតទំនិញ តាមស្តង់ និងតូបលក់ទំនិញ នៅផ្សារព្រៃវែងស្ថិតក្នុងសង្កាត់កំពង់លាវ ក្រុងព្រៃវែង ខេត្តព្រៃវែង ជាលទ្ធផលរកឃើញសរសៃគុយទាវមានសារធាតុបូរ៉ាក់ និងទឹកក្រូច ចាហួយដូង ទឹកដោះគោខាប់ដែលខូចគុណភាព។
មន្រ្តីសាខាកាំកុងត្រូលខេត្តព្រៃវែង បានឲ្យដឹងថា ការចុះអង្កេតទំនិញនៅផ្សារព្រៃវែងនេះ ក្រុមការងារបានធ្វើតេស្តបឋមទៅលើមុខម្ហូបមួយចំនួនដូចជា៖ ដូចមឹក បង្គារ ក្តាម សាច់គោ សាច់ជ្រូក តែរកមិនឃើញផលិតផលណាមួយមានជាតិគីមីនោះទេ តែបានរកឃើញសរសៃគុយទាវ មានសារធាតុបូរ៉ាក់ និងភេសជ្ជៈទឹកក្រូច ទឹកដោះគោខាប់ ចាហួយដូងខូចគុណភាព និងហួសកាលបរិច្ឆេទ ព្រមទាំងបានចូលពិនិត្យនៅកន្លែងលក់អំបិលផងដែរ។
មន្រ្តីកាំកុងត្រូលបានឲ្យដឹងថា ទំនិញខូចគុណភាពទាំងនេះ បានធ្វើកំណត់ហេតុដកហូត យកទៅរក្សាទុកដើម្បីធ្វើការកម្ទេចចោល។ឆ្លៀតឱកាសនោះដែរ ក្រុមកាងារក៏បានចែកផ្សាយនូវរូបភាព Poster និងផ្សព្វផ្សាយដល់អាជីវករអ្នកលក់ដូរ និងអ្នកប្រើប្រាស់ឲ្យបានយល់ ដឹងអំពីផលវិបាកដែលបណ្តាលមកពី ការបរិភោគអាហារហួសកាលបរិច្ឆេទ ប្រើប្រាស់ និងការដាក់លាយបន្ថែមសារធាតុគីមី ហាមឃាត់ចូលក្នុងម្ហូបអាហារ។
មន្រ្តីកាំកុងត្រូល ក៏បានអប់រំ និងអំពាវនាវដល់អាជីវករអ្នកលក់ដូរទាំងអស់ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែ ទំនិញ ផលិតផលម្ហូបអាហារណា ដែលមានគុណភាព មិនប៉ះពាល់ដល់ សុខមាលភាព អ្នកប្រើប្រាស់។
ក្រោមការណែនាំពីសំណាក់លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកជា អគ្គនាយកកាំកុងត្រូល នៃក្រសួងពាណិជ្ជកម្មសាខាកាំក្រុងត្រូល នៅទូទាំងប្រទេស បាននិងកំពុងបន្តយុទ្ធនាការចុះត្រួតពិនិត្យ មើលទំនិញ ដែលដាក់តាំងលក់តាមទីផ្សារ និងជាពិសេសទំនិញនាំចូល តាមមាត់ច្រកទ្វារព្រំដែន ដើម្បីចូលរួម ចំណែកលើការការពារ សុវត្ថិភាពចំណីអាហារដល់ប្រជាពលរដ្ឋ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]