ដួលសន្លប់ទៀតហើយ! កម្មការិនីរោងចក្រកាត់ដេរ «ធៀន ស៊ុង» នៅខណ្ឌពោធិ៍សែនជ័យ ជាង៤០នាក់បន្តដួលសន្លប់

(ភ្នំពេញ)៖ កម្មការិនីរោងចក្រ «ធៀន ស៊ុង» ស្ថិតនៅភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បានដួលសន្លប់ជាបន្តបន្ទាប់ទៀតហើយជាង៤០នាក់ នៅវេលាម៉ោងជិត១១ ព្រឹកថ្ងៃទី២០ ខែមីនា ឆ្នាំ២០១៧នេះ។

ភ្នាក់ងារ Fresh News បានរាយការណ៍ថា ជនរងគ្រោះទាំងអស់ត្រូវបានដឹកបញ្ជូនទៅកាន់មន្ទីរពេទ្យភ្លាមៗ បន្ទា​ប់ពីកើតហេតុ។ បើតាមសេចក្តីរាយការណ៍ថា មូលហេតុដែលនាំឲ្យដួលសន្លប់នេះអាចបណ្តាលមកពី ក្រុមកម្មករមានសុខភាពខ្សោយ បូករួមទាំងបរិស្ថាន និងក្លិនមិនល្អនៅកន្លែងធ្វើការផងដែរ។

សូមបញ្ជាក់ថា នៅព្រឹកថ្ងៃទី១៨ ខែមីនា ឆ្នាំ២០១៧ ក៏មានកម្មការិនីជាង៧០នាក់ បានដួលសន្លប់ផងដែរ។ នៅក្នុងរោងចក្រមួយនេះមានកម្មករធ្វើការជាង១ពាន់នាក់៕

ប្រភព៖ Fresh News

ដោយឡែក ព័ត៌មានចាប់អារម្មណ៍មួយផ្សេងទៀត៖

ព័ត៌មានលម្អិត៖​ មន្រ្តីនគរបាលនាយកដ្ឋានស្ថិតិប្រជាពលរដ្ឋ ដោយខឹងប្រពន្ធពេលច្រៀងខារ៉ាអូខេ ទាញកាំភ្លើង AK-47 បាញ់រះជិត១០គ្រាប់ នៅបុរីសម្បត្តិមានហេង មិនទាន់ត្រូវបានចាប់ខ្លួនច័ន្ទ ២០ មីនា, ២០១៧ ១៣:១៦

(ភ្នំពេញ)៖ មន្រ្តីនគរបាលម្នាក់បម្រើការងារ នៅនាយកដ្ឋានស្ថិតិប្រជាពលរដ្ឋ នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ដោយសារតែមានជម្លោះជាមួយ ប្រពន្ធរបស់ខ្លួនពេលកំពុងច្រៀងខារ៉ាអូខេ ក៏បានទាញកាំភ្លើង AK-47 បាញ់រះជិត១០គ្រាប់នៅក្នុងបុរី «សម្បត្តិមានហេង» មុខផ្ទះលេខ២៦៤ ផ្លូវលេខ៣ ភូមិតាងៅក្រោម សង្កាត់និរោធ ខណ្ឌច្បារអំពៅ រហូតមកដល់ថ្ងៃទី២០ ខែមីនា ឆ្នាំ២០១៧នេះ មិនទាន់ត្រូវបានសមត្ថកិច្ចចាប់ខ្លួននៅឡើយទេ។

យោងតាមរបាយការណ៍របស់អធិការដ្ឋាននគរបាលខណ្ឌច្បារអំពៅ បានឲ្យដឹងថា ករណីនេះកើតឡើងនៅវេលាម៉ោង៥៖៤០នាទី ល្ងាចថ្ងៃទី១៩ ខែមីនា ឆ្នាំ២០១៧ បង្កឡើងដោយមន្រ្តីនគរបាលនាយកដ្ឋានស្ថិតិប្រជាពលរដ្ឋ នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ លោក ស្វាយ ពិសិដ្ឋ អាយុ៣៤ឆ្នាំ។

បើតាមរបាយការណ៍ មុនពេលកើតហេតុជនសង្ស័យ និងមិត្តភក្តិ២នាក់ទៀត បាននាំគ្នាផឹកស្រាបៀរ នៅផ្ទះជនសង្ស័យអស់មួយកេះ រួចក៏នាំគ្នាជិះរថយន្តម៉ាក Toyota HighLander ពណ៌ស ពាក់ស្លាកលេខនគរបាល (មិនចាំស្លាកលេខ) ចេញទៅក្រៅបាត់។

លុះដល់ម៉ោង១៧និង៤០នាទី ថ្ងៃដដែលជនសង្ស័យ ក៏ជិះរថយន្តត្រឡប់មកផ្ទះវិញម្នាក់ឯង ពេលនោះប្រពន្ធរបស់ជនសង្ស័យ ក៏ហៅជនសង្ស័យទៅផឹកស្រា និងច្រៀងខារ៉ាអូខេ ជាមួយអ្នកជិតខាង រួចក៏មានទំនាស់ពាក្យសម្តីគ្នា ហើយជនសង្ស័យក៏យកអាវុធវែងម៉ាក AK-៤៧(មិនដឹងលេខ)បាញ់ឡើងលើជាច្រើនគ្រាប់ រួចក៏យកអាវុធដាក់ក្នុងរថយន្ត ជិះគេចខ្លួនបាត់។

ក្រោយកើតហេតុសមត្ថកិច្ចយើង បានចុះទៅត្រួតពិនិត្យកន្លែងកើតហេតុ រកឃើញសំបកគ្រាប់អាវុធវែង (AK) ០៥សំបក ទុកធ្វើជាវត្ថុតាង។ យ៉ាងណាក៏ដោយសម្រាប់ហេតុការណ៍បាញ់បោះនេះ មិនបណ្តាលឲ្យរងគ្រោះដល់ប្រជាពលរដ្ឋ ណាម្នាក់នោះទេ។

បើតាមប្រជាពលរដ្ឋ នៅក្បែរជនសង្ស័យបានឲ្យដឹងថា ជននេះធ្លាប់បាញ់បោះផងដែរ ប៉ុន្តែមិនឃើញមានចំណាត់ការ របស់សមត្ថកិច្ចនោះឡើយ។ ចំពោះករណីនេះ កម្លាំងនគរបាលជំនាញ នៃស្នងការដ្ឋាននគរបាលរាជធានីភ្នំពេញ កំពុងសហការជាមួយកម្លាំងនគរបាល មូលដ្ឋានធ្វើការស្រាវជ្រាវបន្ត ដើម្បីចាត់ការបន្តទៀត៕