ខេត្តបន្ទាយមានជ័យ ៖ នៅវេលាម៉ោង១និង២០នាទី ថ្ងៃទី១៧ មីនា ប៉ុស្តិ៍នគរបាលរដ្ឋបាលតាគង់បាន ទទួលព័ត៌មានពីលោក ឈឿន ថាន មេភូមិប្រាសាទរាំង ឃុំតាគង់ ស្រុកម៉ាឡៃបានរាយការណ៍ថា នៅភូមិប្រសាទរាំងមានករណីឃាតកម្មក្រោយទទួលបានព័ត៌មានកម្លាំងនគរបាលប៉ុស្តិ៍រដ្ដបាលតាគង់សហការជាមួយកម្លាំងអធិការដ្ឋាននគរបាលស្រុកម៉ាឡៃ ចុះដល់កន្លែងកើតហេតុ ហើយធ្វើការស្រាវជ្រាវជាលទ្ធផលទទួលបានគឺ ៖ ជនរងគ្រោះឈ្មោះ សុខ មុំ ភេទស្រី អាយុ៤៤ឆ្នាំ រស់នៅភូមិកើតហេតុខាងលើត្រូវបានជនសង្ស័យឈ្មោះ កន គិន ភេទប្រុស អាយុ៤៤ឆ្នាំ រស់នៅភូមិកើតហេតុប្រើកាំបិតកៃចាក់ទម្លុះ ផ្តាច់បំពង់កបណ្តាលឱ្យស្លាប់ នៅចម្ងាយប្រមាណ៣ម៉ែត្រពីផ្ទះជនរងគ្រោះ ដោយឡែកជនសង្ស័យ ក្រោយសម្លាប់ជនរងគ្រោះហើយ ក៏បានទៅចង.ក សម្លាប់ខ្លួននៅលើដើមម្កាក់ព្រៃ ដែលមានចម្ងាយប្រមាណ ៣០០ម៉ែត្រពីផ្ទះជនរងគ្រោះ ។
តាមការសាកសួរបឋម ពីលោកមេភូមិក៏ដូចជា អ្នកជិតខាងបានឱ្យដឹងថា មុនករណីឃាតកម្ម និងអត្តឃាតកើតឡើងអ្នកទាំង២ រស់នៅជាមួយគ្នាប៉ុន្តែតែងមានរឿងរកាំរកូសជាមួយគ្នា ដោយសារឈ្មោះ កន គិន មានប្រពន្ធដើម ហើយម្តងរស់នៅជាមួយប្រពន្ធដើម ម្តងរស់នៅជាមួយឈ្មោះ សុខ មុំ ទើបបណ្តាលឱ្យមានទំនាស់រហូតឈានដល់ការសម្លាប់ ហើយធ្វើអត្តឃាតខ្លួនឯង ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
ឃាត់ខ្លួនជនជាតិវៀតណាមខុសច្បាប់ចំនួន១០នាក់ ក្នុងភូមិសាស្ត្រខណ្ឌចំការមន
រាជធានីភ្នំពេញ ៖ កម្លាំងនគរបាលនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ដែលដឹកនាំដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនិតិវិធី សហការជាមួយនឹងកម្លាំងនគរបាល ការិយាល័យអន្តោប្រវេសន៍រាជធានីភ្នំពេញ ដោយមានការសម្របសម្រួលពីលោក សៀង សុខ ព្រះរាជអាជ្ញារងអម សាលាដំរាជធានីភ្នំពេញ បានចុះត្រួតពិនិត្យការស្នាក់នៅ និងបំពេញការងាររបស់ជនបរទេសនៅតាមរោងសិប្បកម្ម កែច្នៃឈើមួយចំនួន និងធ្វើការឃាត់ខ្លួនជនបរទេសចំនួន១០នាក់ (ស្រី០១នាក់) នៅទឹកដីខណ្ឌចំការមន។
ប្រតិបត្តិការនេះបានធ្វើឡើងកាលពីវេលាម៉ោង៣និង០០នាទីរសៀល ថ្ងៃទី១៦ ខែមីនា ឆ្នាំ២០១៧ នៅតាមរោង សិប្បកម្មកែច្នៃឈើមួយចំនួន ដែលមានទីតាំងនៅតាមបណ្តោយផ្លូវលេខ១០៣ ក្នុងភូមិ៥ សង្កាត់ផ្សារដើមថ្កូវ ខណ្ឌចំការមន។ លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធីបានប្រាប់ឱ្យដឹងថា ដោយទទួលបាននូវបទបញ្ជាដោយផ្ទាល់ពីលោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ដើម្បីធ្វើយ៉ាងណាធ្វើការអនុវត្តច្បាប់អន្តោប្រវេសន៍ឲ្យមានប្រសិទ្ធភាពខ្ពស់នោះ។
កម្លាំងរបស់លោកតែងតែបានចុះធ្វើការត្រួតពិនិត្យការស្នាក់នៅ និងបំពេញការងាររបស់ជនបរទេសនៅគ្រប់ទូទាំង២៥ ខេត្តក្រុង ក្នុងព្រះរាជាណាចក្រកម្ពុជារបស់យើង និងធ្វើឡើង ទៅលើគ្រប់ជនជាតិទាំងអស់។
លោកឧត្តមសេនីយ៍ ក៏បានប្រាប់បន្តទៀតថា ក្នុងពេលនេះដែរកម្លាំងរបស់ លោកក៏បានចុះប្រតិបត្តិការត្រួតពិនិត្យ ការស្នាក់នៅ និងបំពេញ ការងាររបស់ជនបរទេសដែលជាជនជាតិវៀតណាមនៅតាមរោងសិប្បកម្មកែច្នៃឈើ ជាច្រើនទីតាំងដែលស្ថិតនៅ ក្នុងភូមិសាស្ត្រសង្កាត់ផ្សារដើមថ្កូវ ខណ្ឌចំការមននេះ។
ដោយក្នុងប្រតិប្រតិបត្តិការនេះដែរ កម្លាំងរបស់លោកបានរក ឃើញ ជនជាតិវៀតណាមដែលកំពុងតែលួចស្នាក់នៅ និងបំពេញការងារដោយខុសច្បាប់សរុបចំនួន១០នាក់ ក្នុងនោះ មានជាស្ត្រីចំនួន០១នាក់)ផងដែរ។
នាពេលកន្លងមក កម្លាំងរបស់លោកតែងតែបានចុះអនុវត្តន៍ច្បាប់អន្តោប្រវេសន៍ ដោយបានរកឃើញជនបរទេសជាច្រើននាក់ដែលកំពុងតែស្នាក់នៅ និងបំពេញការងារដោយខុសច្បាប់ ហើយក៏បាន ធ្វើការបណ្តេញចេញទៅកាន់ប្រទេសកំណើតរបស់ពួកគេវិញជាបន្តបន្ទាប់។
ក្រោយពីការធ្វើប្រតិបត្តិការចុះត្រួតពិនិត្យ ការស្នាក់នៅ និងបំពេញការងាររបស់ជនបរទេសនារសៀលនេះដែរកម្លាំងនគរបាលអន្តោប្រវេសន៍បានធ្វើការ ឃាត់ខ្លួន ជនអន្តោប្រវេសន៍ខុសច្បាប់ជនជាតិវៀតណាមចំនួន១០នាក់ (ស្រី០១នាក់) ដែលកំពុងតែស្នាក់នៅ និងបំពេញការងារ ដោយគ្មានលិខិតស្នាមអ្វីទាំងអស់នោះបញ្ជូនទៅកាន់នាយកដ្ឋានស៊ើបអង្កេត និងអនុវត្តនីតិវិធី ដើម្បីរង់ចាំធ្វើការ បណ្តេញចេញទៅតាមច្បាប់ជាបន្តទៅទៀត៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]