(ភ្នំពេញ)៖ ភ្នាក់ងារ Fresh News បានរាយការណ៍ឲ្យដឹងថា នៅម៉ោងប្រមាណ៦៖០០នាទីនេះ សពរបស់សម្តេចវិបុលបញ្ញា សុខ អាន ឧបនាយករដ្ឋមន្រ្តី រដ្ឋមន្រ្តីទីស្តីការគណៈរដ្ឋមន្រ្តី បានដឹកតាមរថយន្តពេទ្យទៅដល់គេហដ្ឋានរបស់សម្តេចវិបុលបញ្ញា សុខ អាន ស្ថិតនៅផ្ទះលេខ៧០ ផ្លូវ២១៤ សង្កាត់បឹងរាំង ខណ្ឌដូនពេញ។
សពសម្តេចវិបុលបញ្ញា សុខ អាន បានដឹកតាមយន្តហោះមកដល់កម្ពុជានៅម៉ោងប្រមាណ៥៖០៤នាទីព្រឹកថ្ងៃទី១៦ ខែមីនា ឆ្នាំ២០១៧នេះ។ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងគណៈប្រតិភូមួយចំនួនក៏បានអញ្ជើញមកជាមួយផងដែរ។
សម្តេចវិបុលបញ្ញា សុខ អាន ឧបនាយករដ្ឋមន្រ្តី និងជារដ្ឋមន្រ្តីទទួលបន្ទុក ទីស្តីការគណៈរដ្ឋមន្រ្តី បានទទួលមរណភាពនៅវេលាម៉ោង ៦៖៣២នាទីល្ងាច នាថ្ងៃទី១៥ ខែមីនា ឆ្នាំ២០១៧នេះ ក្នុងជន្មាយុ៦៦ឆ្នាំ ដោយរោគាពាធ។ សម្តេចគឺជាអ្នកមានគុណបំណាច់ដ៏ធំធេងមួយ ក្នុងការបំពេញការងារ និងពលីគ្រប់យ៉ាង ដើម្បីបុព្វហេតុជាតិ។
ក្រោយទទួលដំណឹងមរណភាពនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចេញសេចក្តីសម្រេចមួយ ដោយបង្កើតគណៈកម្មការ ដើម្បីរៀបចំបុណ្យសព សម្តេចវិបុលបញ្ញា សុខ អាន រដ្ឋមន្រ្តីទីស្តីការគណៈរដ្ឋមន្រ្តី។ គណៈកម្មការរៀបចំបុណ្យសពនេះដឹកនាំដោយ ឧបនាយករដ្ឋមន្រ្តី ប៊ិន ឈន ជាប្រធាន និង សម្តេចព្រះពោធិវង្ស អំ លឹមហេង ព្រះសង្ឃនាយករងទី២ នៃព្រះរាជាណាកចក្រកម្ពុជា ជាអនុប្រធាន រួមទាំងសមាជិកជាច្រើនទៀត៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ តុលាការសម្រេចឃុំខ្លួននាយិកាក្រុមហ៊ុន ស្រីរ័ត្នទេសចរណ៍អន្តរជាតិ ដាក់ពន្ធនាគារជាបណ្តោះអាសន្ន
រាជធានីភ្នំពេញ ៖ តំណាងអយ្យការសាលាដំបូងរាជធានីភ្នំពេញ កាលពីរសៀលថ្ងៃទី១៦ កុម្ភ: ២០១៧ បានសម្រេចធ្វើការចោទប្រកាន់នាយិកាក្រុមហ៊ុន ស្រីរ័ត្នទេសចរណ៍អន្តរជាតិ ជាផ្លូវការក្រោមបទ រំលោភលើទំនុកចិត្ត។ ក្រោយពេលតំណាងអយ្យការចោទប្រកាន់ជាផ្លូវការហើយ សំណុំរឿងនេះត្រូវបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ។ នៅសាលាដំបូងរាជធានីភ្នំពេញ ត្រូវបានគេបង្ហើបឲ្យដឹងថា ពាក់ពន្ធទៅនឹង សំណុំរឿងចោទប្រកាន់អ្នកស្រី រស់ សុធីរ័ត្ន នាយិកាក្រុមហ៊ុន ស្រីរ័ត្នទេសចរណ៍អន្តរជាតិ គឺជាបឋមមានដើមបណ្តឹងចំនួន៩២នាក់ និងមានទឹកប្រាក់ជាង២៧ម៉ឺនដុល្លារអាមេរិក។
ប្រភពព័ត៌មានបានឲ្យដឹងទៀតថា ដើមបណ្តឹងមានចំនួន៩២នាក់នោះ គឺបានដាក់ចូលដល់ដៃតំណាងអយ្យកាហើយ តែនៅមានបណ្តឹងដាក់ចូលបន្តបន្ទាប់ទៀត រីឯទឹកប្រាក់ក៏មិននៅក្រោម២៧ម៉ឺនដុល្លារនោះដែរ។ ទោះជាយ៉ាងនេះក្តីអ្នកស្រី រស់ សុធីរ័ត្ន បានជម្រាបជូនតុលាការថា ទឹកប្រាក់មួយចំនួនត្រូវបានអ្នកដទៃបោកពីនាងដែរ បានជានាងវ័ណ្ឌកដូច្នេះ។ គួរបញ្ជាក់ថា កម្លាំងសមត្ថកិច្ចកងរាជអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌ៧មករា កាលពីម៉ោង៨ និង៣០នាទីយប់ថ្ងៃទី១៣ កុម្ភៈ ២០១៧ បានធ្វើការឃាត់ខ្លួននាយិកាក្រុមហ៊ុនស្រីរ័ត្នទេសចរណ៍អន្តរជាតិ នៅចំណុចផ្ទះលេខ១៧E០ ផ្លូវលេខ១២៨ សង្កាត់មិត្តភាព ខណ្ឌ៧មករា។
ការឃាត់ខ្លួននាយិកាក្រុមហ៊ុននោះ ត្រូវបានសមត្ថកិច្ចអះអាងថា គឺជាការធ្វើឡើងតាមពាក្យបណ្តឹងរបស់អតិថិជនប្រមាណ៤០នាក់ បានទៅតវ៉ានៅមុខក្រុមហ៊ុន ដោយចោទប្រកាន់ថា ក្រុមហ៊ុនបោកប្រាស់លក់សំបុត្រយន្តហោះអត់មានកៅអីអង្គុយ និងមិនមានជើងយន្តហោះ ហោះហើរ។ នាយិការូបនោះឈ្មោះ រស់ សុធីរ័ត្ន អាយុ៣៥ឆ្នាំ ស្នាក់នៅអាសយដ្ឋានឃាត់ខ្លួនខាងលើ។ ដើមចមនៃការឃាត់ខ្លួននាយិកាក្រុមហ៊ុននោះ ត្រូវបានមន្ត្រីកងរាជអាវុធហត្ថឲ្យដឹងថា កន្លងទៅមានអតិថិជនច្រើននាក់បានយកប្រាក់ទៅកក់ក្រុមហ៊ុនទេសចរណ៍អន្តរជាតិ ដើម្បីទិញសំបុត្រយន្តហោះទៅដើរលេងក្រៅប្រទេស។ ខាងក្រុមហ៊ុនបានសន្យាជាមួយអតិថិជនថា នឹងប្រគល់សំបុត្រយន្តហោះ ឲ្យទៅអតិថិជនតាមថ្ងៃកំណត់ លុះដល់ថ្ងៃកំណត់ត្រូវធ្វើដំណើរទៅដើរស្រាប់តែក្រុមហ៊ុន មិនបានប្រគល់សំបុត្រយន្តហោះឲ្យអតិថិជននោះទេ។
មន្ត្រីកងរាជអាវុធហត្ថបន្តថា មានអតិថិជនខ្លះត្រូវក្រុមហ៊ុនប្រគល់សំបុត្រយន្តឲ្យដល់ដៃហើយ ប៉ុន្តែនៅពេលដល់ម៉ោងត្រូវឡើងយន្តហោះ ស្រាប់តែមន្ត្រីអាកាសយានបញ្ជាក់ថា សំបុត្រនោះមិនមានកន្លែងអង្គុយទេ ពោលគឺមានគេទិញបាត់ហើយ ដូច្នេះអតិថិជននោះបង្ខំចិត្ត ត្រូវទិញសំបុត្រថ្មីនៅព្រលានយន្តហោះក្នុងតម្លៃខ្ពស់ ធ្វើយ៉ាងណាឲ្យខាងតែបាន ព្រោះដល់ពេលវេលាត្រូវចេញដំណើរ ។ ដោយសារតែមានរឿងកើតឡើងញឹកញាប់យ៉ាងដូច្នេះ អតិថិជនបានទៅទាមទារយកប្រាក់កក់ពីក្រុមហ៊ុននោះវិញ។
តែម្តងហើយម្តងទៀត នាយិកាមានសម្ដីត្រជាក់ បានគេចវេស មិនព្រមសងប្រាក់កក់ឲ្យទៅ អតិថិជនវិញទេ បានជានៅថ្ងៃទី១៣ កុម្ភៈ ២០១៧ អតិថិជនប្រមាណ៤០នាក់នាំគ្នាប្រមូលផ្តុំ នៅមុខទីស្នាក់ការក្រុមហ៊ុន ដើម្បីតវ៉ាយកប្រាក់ ដោយភ្ជាក់នូវពាក្យបណ្តឹងរៀងៗខ្លួន ទៅជាមួយផងដែរ ជាហេតុធ្វើឲ្យសមត្ថកិច្ចសម្រេចឃាត់ខ្លួននាយិកាឈ្មោះ រស់ សុធីរ័ត្ន ទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីធ្វើការសាកសួរ និងដោះស្រាយ លើពាក្យបណ្តឹងរបស់ជនរងគ្រោះ ដែលជាអតិថិជនត្រូវក្រុមហ៊ុន(ស្រីរ័ត្នទេសចរណ៍អន្តរជាតិ)ពាក់ព័ន្ធថា បានរំលោភលើទំនុកចិត្ត៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
