រាជធានីភ្នំពេញ ៖ បុរសម្នាក់ដោយសារតែមិត្តភក្កិខ្ចីម៉ូតូយកទៅបញ្ចាំ ពិបាកចិត្តមិនហ៊ានចូលផ្ទះ រួចក៏ទិញគ្រឿងញៀនប្រើប្រាស់ ហើយព្យាយាមរត់ចូលរថយន្តប៉ុនប៉ងសម្លាប់ខ្លួន តែមិនបានសម្រេច ត្រូវប្រជាការពារសង្កាត់ឬស្សីកែវ ឃាត់ទាន់។
ហេតុការណ៍ នេះបង្កឲ្យមានការភ្ញាក់ផ្អើល កាលពីវេលាម៉ោង ៩និង១៥នាទីព្រឹក ថ្ងៃទី១៥ ខែមីនា ឆ្នាំ២០១៧ នៅតាមបណ្តោយផ្លូវជាតិលេខ៥ ត្រង់ចំណុចមុខផ្ទះលេខ៩៣០ ក្នុងភូមិត្តភាព សង្កាត់ឫស្សីកែវ ខណ្ឌឫស្សីកែវ។
បុរសដែលមានវិបត្តិរូបនោះឈ្មោះ ពៅ សាភឿន អាយុ៣៦ឆ្នាំ មានមុខរបរជាសន្តិសុខនៅអាកាសយានដ្ឋានអន្តរជាតិ ភ្នំពេញ មានទីលំនៅផ្ទះជួល ក្នុងសង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅភូមិតាខិន ឃុំចន្ទ្រា ស្រុករមាសហែក ខេត្តស្វាយរៀង។
ចំណែកម៉ូតូដែលមិត្តភក្តិខ្ចីយកទៅបញ្ចាំនោះម៉ាកឌុក ពណ៌ស លាយខ្មៅ ដែលមានស្លាកលេខ ភ្នំពេញ 1FS-8344។ តាមប្រភពព័ត៌មានឲ្យដឹងថា នៅព្រឹកនោះគេឃើញបុរសរូបនោះអង្គុយយំ នៅលើសួនច្បារ និងដើរចុះដើរឡើងមួយសន្ទុះក៏បានរត់ចូលរថយន្តប៉ុនប៉ងសម្លាប់ខ្លួន បង្កឲ្យមានការភ្ញាក់ផ្អើល ហើយប្រជាការពារ ក៏បានទៅអន្តរាគមន៍ឃាត់នាំមកប៉ុស្តិ៍។ តាមបុរសរូបនោះបានឱ្យដឹងថា នៅល្ងាចថ្ងៃទី១៤ ខែមីនា ខ្លួនបានជួបជុំមិត្តភក្តិប្រមាណ៤ទៅ៥នាក់ផឹកស៊ីនៅក្នុងសង្កាត់ឫស្សីកែវ។
បន្ទាប់ពីផឹកស៊ីស្រវឹងមិត្តភក្តិម្នាក់ឈ្មោះ តូរ៉ា បានខ្លីម៉ូតូទៅទិញសាច់ក្លែម ហើយក៏បានជិះម៉ូតូយកទៅបញ្ចាំបានប្រាក់ចំនួន ៩២០ដុល្លារ ដើរស៊ីចាយអស់ហើយគេចខ្លួនបាត់។ បន្ទាប់បាត់ម៉ូតូខ្លួនបានដាក់ពាក្យបណ្តឹង នៅប៉ុស្តិ៍ដើម្បីឲ្យសមត្ថកិច្ចជួយរកម៉ូតូ។
បុរសរូបនោះបានឲ្យដឹងទៀតថា នៅពេលបាត់ម៉ូតូ ខ្លួនពិបាកចិត្តមិនហ៊ានចូលផ្ទះ ព្រោះខ្លាចម្តាយឪពុក ហើយនិងប្រពន្ធស្តីបន្ទោស ក៏បានសម្រេចចិត្តទៅទិញថ្នាំញៀនមកប្រើប្រាស់ជាមួយមិត្តភក្តិពេញមួយយប់ហើយព្រឹកឡើង ក៏បានរត់ចូលរថយន្តប៉ុនប៉ងសម្លាប់ខ្លួន តែត្រូវប្រជាការពារឃាត់ទាន់។ បន្ទាប់ពីនាំទៅប៉ុស្តិ៍ នគរបាលក៏បានទាក់ទងខាងមន្ទីរសង្គមកិច្ចនាំយកទៅមណ្ឌលដើម្បីបន្សាបគ្រឿងញៀន៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
រាជធានីភ្នំពេញ ៖ តំណាងអយ្យការសាលាដំបូងរាជធានីភ្នំពេញ កាលពីរសៀលថ្ងៃទី១៦ កុម្ភ: ២០១៧ បានសម្រេចធ្វើការចោទប្រកាន់នាយិកាក្រុមហ៊ុន ស្រីរ័ត្នទេសចរណ៍អន្តរជាតិ ជាផ្លូវការក្រោមបទ រំលោភលើទំនុកចិត្ត។ ក្រោយពេលតំណាងអយ្យការចោទប្រកាន់ជាផ្លូវការហើយ សំណុំរឿងនេះត្រូវបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន ។
នៅសាលាដំបូងរាជធានីភ្នំពេញ ត្រូវបានគេបង្ហើបឲ្យដឹងថា ពាក់ពន្ធទៅនឹង សំណុំរឿងចោទប្រកាន់អ្នកស្រី រស់ សុធីរ័ត្ន នាយិកាក្រុមហ៊ុន ស្រីរ័ត្នទេសចរណ៍អន្តរជាតិ គឺជាបឋមមានដើមបណ្តឹងចំនួន៩២នាក់ និងមានទឹកប្រាក់ជាង២៧ម៉ឺនដុល្លារអាមេរិក។
ប្រភពព័ត៌មានបានឲ្យដឹងទៀតថា ដើមបណ្តឹងមានចំនួន៩២នាក់នោះ គឺបានដាក់ចូលដល់ដៃតំណាងអយ្យកាហើយ តែនៅមានបណ្តឹងដាក់ចូលបន្តបន្ទាប់ទៀត រីឯទឹកប្រាក់ក៏មិននៅក្រោម២៧ម៉ឺនដុល្លារនោះដែរ។ ទោះជាយ៉ាងនេះក្តីអ្នកស្រី រស់ សុធីរ័ត្ន បានជម្រាបជូនតុលាការថា ទឹកប្រាក់មួយចំនួនត្រូវបានអ្នកដទៃបោកពីនាងដែរ បានជានាងវ័ណ្ឌកដូច្នេះ។
គួរបញ្ជាក់ថា កម្លាំងសមត្ថកិច្ចកងរាជអាវុធហត្ថរាជធានីភ្នំពេញ សហការជាមួយកម្លាំងអាវុធហត្ថខណ្ឌ៧មករា កាលពីម៉ោង៨ និង៣០នាទីយប់ថ្ងៃទី១៣ កុម្ភៈ ២០១៧ បានធ្វើការឃាត់ខ្លួននាយិកាក្រុមហ៊ុនស្រីរ័ត្នទេសចរណ៍អន្តរជាតិ នៅចំណុចផ្ទះលេខ១៧E០ ផ្លូវលេខ១២៨ សង្កាត់មិត្តភាព ខណ្ឌ៧មករា។
ការឃាត់ខ្លួននាយិកាក្រុមហ៊ុននោះ ត្រូវបានសមត្ថកិច្ចអះអាងថា គឺជាការធ្វើឡើងតាមពាក្យបណ្តឹងរបស់អតិថិជនប្រមាណ៤០នាក់ បានទៅតវ៉ានៅមុខក្រុមហ៊ុន ដោយចោទប្រកាន់ថា ក្រុមហ៊ុនបោកប្រាស់លក់សំបុត្រយន្តហោះអត់មានកៅអីអង្គុយ និងមិនមានជើងយន្តហោះ ហោះហើរ។
នាយិការូបនោះឈ្មោះ រស់ សុធីរ័ត្ន អាយុ៣៥ឆ្នាំ ស្នាក់នៅអាសយដ្ឋានឃាត់ខ្លួនខាងលើ។ ដើមចមនៃការឃាត់ខ្លួននាយិកាក្រុមហ៊ុននោះ ត្រូវបានមន្ត្រីកងរាជអាវុធហត្ថឲ្យដឹងថា កន្លងទៅមានអតិថិជនច្រើននាក់បានយកប្រាក់ទៅកក់ក្រុមហ៊ុនទេសចរណ៍អន្តរជាតិ ដើម្បីទិញសំបុត្រយន្តហោះទៅដើរលេងក្រៅប្រទេស។ ខាងក្រុមហ៊ុនបានសន្យាជាមួយអតិថិជនថា នឹងប្រគល់សំបុត្រយន្តហោះ ឲ្យទៅអតិថិជនតាមថ្ងៃកំណត់ លុះដល់ថ្ងៃកំណត់ត្រូវធ្វើដំណើរទៅដើរស្រាប់តែក្រុមហ៊ុន មិនបានប្រគល់សំបុត្រយន្តហោះឲ្យអតិថិជននោះទេ។
មន្ត្រីកងរាជអាវុធហត្ថបន្តថា មានអតិថិជនខ្លះត្រូវក្រុមហ៊ុនប្រគល់សំបុត្រយន្តឲ្យដល់ដៃហើយ ប៉ុន្តែនៅពេលដល់ម៉ោងត្រូវឡើងយន្តហោះ ស្រាប់តែមន្ត្រីអាកាសយានបញ្ជាក់ថា សំបុត្រនោះមិនមានកន្លែងអង្គុយទេ ពោលគឺមានគេទិញបាត់ហើយ ដូច្នេះអតិថិជននោះបង្ខំចិត្ត ត្រូវទិញសំបុត្រថ្មីនៅព្រលានយន្តហោះក្នុងតម្លៃខ្ពស់ ធ្វើយ៉ាងណាឲ្យខាងតែបាន ព្រោះដល់ពេលវេលាត្រូវចេញដំណើរ ។ ដោយសារតែមានរឿងកើតឡើងញឹកញាប់យ៉ាងដូច្នេះ អតិថិជនបានទៅទាមទារយកប្រាក់កក់ពីក្រុមហ៊ុននោះវិញ។
តែម្តងហើយម្តងទៀត នាយិកាមានសម្ដីត្រជាក់ បានគេចវេស មិនព្រមសងប្រាក់កក់ឲ្យទៅ អតិថិជនវិញទេ បានជានៅថ្ងៃទី១៣ កុម្ភៈ ២០១៧ អតិថិជនប្រមាណ៤០នាក់នាំគ្នាប្រមូលផ្តុំ នៅមុខទីស្នាក់ការក្រុមហ៊ុន ដើម្បីតវ៉ាយកប្រាក់ ដោយភ្ជាក់នូវពាក្យបណ្តឹងរៀងៗខ្លួន ទៅជាមួយផងដែរ ជាហេតុធ្វើឲ្យសមត្ថកិច្ចសម្រេចឃាត់ខ្លួននាយិកាឈ្មោះ រស់ សុធីរ័ត្ន ទៅកាន់ទីបញ្ជាការកងរាជអាវុធហត្ថរាជធានីភ្នំពេញ ដើម្បីធ្វើការសាកសួរ និងដោះស្រាយ លើពាក្យបណ្តឹងរបស់ជនរងគ្រោះ ដែលជាអតិថិជនត្រូវក្រុមហ៊ុន(ស្រីរ័ត្នទេសចរណ៍អន្តរជាតិ)ពាក់ព័ន្ធថា បានរំលោភលើទំនុកចិត្ត៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
