ភ្នំពេញ៖ តារាសម្តែងស្រី និងពិធីការិនីទូរទស្សន៍ PNN ស្រស់សោភាមានរាងស្តើងតូចច្រឡឹង កញ្ញា ព្រះកាយច័ន្ទ សន្សំចិត្តបង្កើតក្រុមចម្រៀងផ្ទាល់ខ្លួនឈ្មោះ Pravo Girls រួចរាល់ និងបានត្រៀមអាល់ប៊ុម បទអូរីជីណល់ចំនួន ៤ បទដើម្បីបំពេរអារម្មណ៍អ្នកស្តាប់នៅ មុនចូលឆ្នាំខ្មែរខាងមុខនេះ ទោះជាដឹងថាលទ្ធផលមិនល្អក្តី ។
ពិធីការិនីរូបស្រស់ កញ្ញា ព្រះកាយច័ន្ទ ឲ្យដឹងថា ពួកយើងនឹកគ្រោងបង្កើតក្រុម Pravo Girls នេះយូរហើយ តែសមាជិកពួកយើងសុទ្ធតែជាអ្នកសិល្បៈដោយមានជាតារាបង្ហាញម៉ូដ ជាតារាចម្រៀង និងតារាសម្តែង មមាញឹកជាប់ការងាររវល់រៀងៗខ្លួននោះ ទើបបន្លាយពេលនៃការបង្កើតក្រុម និងប្រកាសក្រុមយើងរហូតដល់ខែមីនាទៅ យើងបានត្រៀមចេញបួនបទ ខណៈមានញាក់ ៣ បទ និង ១ ជាបទមនោសញ្ចេតនា។ យើងច្រៀងជាក្រុមនៅឡើយ សម្រាប់អាល់ប៊ុមបទដំបូងពួកយើង ដោយមានរូបនាងខ្ញុំផ្ទាល់ជាប្រធានក្រុម ហើយក៏មានកញ្ញា ពៅ ដាណេ ជាតារាចម្រៀង កញ្ញា ទេពី និងកញ្ញា នី យ៉ានុត ជាតារាសម្តែង និងបង្ហាញម៉ូដផង ។
តារាសម្តែងស្រីចង់ក្លាយជាអ្នកចម្រៀង បានបន្តថា ពួកយើង បានជួបជុំគ្នាហាត់សម្តែងរាំ និងច្រៀងច្រើនតែនៅពេលចុងសប្តាហ៍ព្រោះថា នាងខ្ញុំទំនេរក្នុងពេលនោះ ហើយថ្ងៃចន្ទដល់សុក្រ ខ្ញុំជាប់រវល់ថតកុនដែលមិនទាន់ ចប់គឺរឿងច័ន្ទវង្វេងមេឃនោះឯង។ ខុសប្លែកពីពិភពតន្ត្រី K-Pop កូរ៉េខាងត្បូងដែល សម្បូរក្រុមចម្រៀងគរជើងគ្នា ការច្រៀងលក្ខណៈជាក្រុមក្នុង ពិភពសិល្បៈខ្មែរកន្លងមក ហាក់មិនសូវស្ទួយប្រជាប្រិយភាពឡើយ ដោយក្រុមចម្រៀងជាច្រើន ត្រូវរំលាយដោយឯកឯង។
ប្រធានក្រុមចម្រៀងស្រី Pravo Girls កញ្ញា ព្រះកាយច័ន្ទ បញ្ជាក់ថា ទោះការច្រៀងជាក្រុមមិនសូវមាន ឥទ្ធិពលអាចទាញយក ប្រជាប្រិយភាពពីមហាជនក្តី តែយើងនៅតែបន្តការខំប្រឹង និងជម្នះធ្វើឲ្យបាន។ យើងមានសង្ឃឹមខ្លះថា អាចទទួលបានការគាំទ្រពី បងប្អូនទស្សនិកជនដោយ សំអាងលើការចេញ Trailer MV របស់យើងតាមបណ្តាញសង្គមភ្លាម ក៏មានអ្នកចូល Likes និង comments ល្អៗច្រើនផងដែរពីក្រុមយើង ។
សូមជម្រាបថា តារាសម្តែងស្រី និងពិធីការិនីទូរទស្សន៍ កំពុងតែក្តាប់បានឱកាស សម្តែងជាតួនាងផ្កាយព្រឹកក្នុងរឿង «ច័ន្ទវង្វេងមេឃ» របស់ទូរទស្សន៍ប៉ុស្តិ៍លេខ ៥ ថតមិនទាន់ចប់នៅឡើយផងនោះ ក៏ឆ្លៀតបង្កើតក្រុមចម្រៀង មានសមាជិកស្រីបួនរូប ដើម្បីសាងប្រជាប្រិយភាព លើវិថីសិល្បៈមួយកម្រិតទៀត ដោយមិនរារែកចំពោះឧបសគ្គ និងខ្លាចពាក្យរិះគន់ពេបជ្រាយ របស់មហាជនឡើយ៕
ប្រភព៖ LookingToday
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]