ភ្នំពេញ៖ កីឡាករ ច្រឹង ពលរដ្ឋ ខ្សែបម្រើកណ្ដាលឆ្នើមរបស់ក្លឹប ក្រសួងការពារជាតិ ទើបទទួលបានការងារថ្មីបន្ថែមមួយទៀត កាលពីព្រឹកថ្ងៃទី ០៨ មីនា ជាទូតសុឆន្ទៈឲ្យម៉ាកនាឡិកាដៃ Ice Watch ខាងផ្នែកកីឡា រយៈពេល ១ ឆ្នាំក្នុងលក្ខខណ្ឌមិនបញ្ចេញពីតម្លៃនៃកិច្ចព្រមព្រៀង។
ការងារថ្មីជាទូតសុឆន្ទៈប្រចាំម៉ាកនាឡិកាដៃ ពេញនិយមសម្រាប់យុវវ័យនេះ ច្រឹង ពលរដ្ឋ នឹងត្រូវចូលរួមផ្សព្វផ្សាយផលិតផលថ្មីម៉ាកនាឡិកាដៃ Ice Watch, សកម្មភាពកីឡាផ្សេងៗសហការរៀបចំដោយ Ice Watch និងសកម្មភាពសប្បុរសធម៌ផ្សេងៗទៀតរបស់ Ice Watch។
ទាក់ទិននឹងកិច្ចព្រមព្រៀងថ្មីបន្ថែមអាជីពជាកីឡាករ ខ្សែបម្រើជម្រើសជាតិរូបនេះ បានប្រាប់ Sabay ឲ្យដឹងថា លោកមានមោទនភាពដែល Ice Watch ជ្រើសលោកជាតំណាងម៉ាកនាឡិកាដៃ ហើយលោកនឹងចូលរួមចំណែកលើក កម្ពស់វិស័យកីឡាតាមរយៈសកម្មភាពផ្សេងៗរបស់ Ice Watch។
ខ្សែបម្រើដែលរកបាន ៣ គ្រាប់ក្នុង ៣ ប្រកួតក្នុងរដូវកាលថ្មីនេះ និងល្បីខ្លាំងក្រោយស៊ុតមួយគ្រាប់ជាប់ជាគ្រាប់បាល់ល្អជាងគេបំផុតប្រចាំកម្មវិធី AFF Suzuki Cup 2016 បានបន្ថែមថា៖ "ខ្ញុំមានគម្រោង...បើបានថវិកាហ្នឹង ខ្ញុំយកឲ្យម៉ាក់តិចតួច និងទុកខ្លួនឯងសម្រាប់ឆ្នាំក្រោយហ្នឹង មានពិធីការ"។
ទោះបីមានការងារថ្មីនេះក៏ដោយ ក៏ខ្សែបម្រើជំនាញជើងស្ដាំរូបនេះ នៅតែផ្ដល់អាទិភាពលើអាជីពជាកីឡាករដដែល។
លោក មុត បញ្ញា ប្រធានផ្នែកទីផ្សារ Ice Watch ប្រចាំកម្ពុជា ថ្លែងថា៖ "នៅខ្មែរ យើងបានធ្វើ Event ច្រើនខ្នាតតូចធំក៏ដោយ និងចូលរួមកម្មវិធីសប្បុរសធម៌ជាច្រើន។ ឥឡូវ យើងបោះជំហានមួយទៀតក្នុងវិស័យកីឡា ដោយជ្រើសកីឡាករ ច្រឹង ពលរដ្ឋ ជាទូតសុឆន្ទៈ គឺដើម្បីគាំទ្រវិស័យកីឡាឲ្យមានការគាំទ្រទៅថ្ងៃមុខបន្ថែម...សង្ឃឹមថាក្រុមហ៊ុនដទៃទៀត សម្លឹងឃើញកីឡាករដទៃទៀត ដើម្បីជាការលើកកម្ពស់ និងឲ្យតម្លៃពួកគាត់ [កីឡាករ] ម្នាក់ៗ"៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
