ឥណ្ឌា៖ ស្រ្តីជាម្តាយកូនមួយវ័យ ២២ឆ្នាំម្នាក់ ត្រូវបានរងរបួសដោយស្នាមរលាកលើដងខ្លួន និងផ្ទៃមុខយ៉ាងដំណំ បន្ទាប់ពីត្រូវបានស្វាមី និងឪពុកក្មេករបស់នាង ព្រួតដៃគ្នាយកដែកដង្កៀបក្តៅ ទៅដុតលើនាង ដោយសារតែមូលហេតុមួយ ដែលមិននឹកស្មានដល់។ នេះបើយោងតាមប្រភព ដកស្រង់ពីទីភ្នាក់ងារសារព័ត៌មាន ដេលីម៉ែល បានចុះផ្សាយ។

នារីរងគ្រោះឈ្មោះ Jhamku ជាអ្នកស្រុករស់នៅក្នុងទីក្រុង Udaipur រដ្ឋ Rajasthan ភាគខាងជើងប្រទេសឥណ្ឌា ត្រូវបានស្វាមីឈ្មោះ Bhagga Gameti និងឪពុកក្មេករបស់នាងឈ្មោះ Lehri Lal ប្រើធម៌ក្តៅលើរូបនាង ដោយសារតែប្រតិកម្មខឹង ចោទប្រកាន់ថានារីរងគ្រោះ កំពុងតែលួចលាក់មានសាហាយថ្មី ខណៈដែរប្តីនិងឪពុកក្មេក បានតាមទាន់ចំពេលដែលនាង កំពុងនិយាយទូរស័ព្ទ ជាមួយនឹងជនច្រឡំលេខមិនស្គាល់មុខម្នាក់។

បើតាមប្រភសារព័ត៌មាន បានឲ្យដឹងថា ដំបូងឡើយ នារីរងគ្រោះត្រូវបានប្តីនិងឪពុកក្មេក វាយតប់នាងយ៉ាងធ្ងន់ដៃដោយប្រើព្រនង់ មុនពេលដែលពួកគេយកដែកដង្កៀបក្តៅ មកដុតលើជើង មុខ ទ្រូង និងដុតទៅលើប្រដាប់ភេទរបស់នាងថែមទាំងផង។

ជាហេតុធ្វើឲ្យនារីរងគ្រោះទ្រាំទ្រមិនបាន ហើយបានស្រែកយំដោយក្តីឈឺចាប់ អង្វរសុំលើកលែងទោស តែផ្ទុយទៅវិញប្តីរបស់នាងហើយនឹងឪពុកក្មេក នៅតែមិនបញ្ឈប់ការធ្វើទារុណកម្មលើរូបនាងឡើយ។ ជាហេតុធ្វើឲ្យផ្អើលអស់អ្នកភូមិ នាំគ្នាមកចោមរោមមើល នៅបរិវេណខាងក្រៅផ្ទះរបស់នាងតែម្តង។

នារីរងគ្រោះ នាង Jhamku បានរៀបរាប់ប្រាប់ ខាងអ្នកយកព័ត៌មានឲ្យដឹងថា «ពួកគាត់ (ប្តីនិងឪពុកក្មេក) បានយកដែកក្តៅមកដុតនៅលើខ្លួនប្រាណខ្ញុំ រួមទាំងប្រដាប់ភេទ រួចហើយពួកគាត់ទាំងពីរក៏បាននាំគ្នា រត់ចេញពីផ្ទះ នៅពេលដែលអ្នកស្រុកជាច្រើនឈូឆររត់មកមើល ពេលដែលពួកគេបានលឺសម្រែកខ្ញុំ ស្រែកយំហៅរកជំនួយ» ។

ក្រោយកើតហេតុ បុរសជាប្តីត្រូវបានចាប់ខ្លួន ខណៈឯបុរសជាឪពុកក្មេក របស់នាងរងគ្រោះវិញ កំពុងតែរត់គេចខ្លួន។ ដោយឡែកនារីរងគ្រោះ ក៏បានគេបញ្ជូនឲ្យទៅស្នាក់នៅផ្ទះ ឪពុកម្តាយរបស់នាងវិញ ដើម្បីសម្រាកព្យាបាលជំងឺនៅទីនោះផងដែរ។

លោក Om Kumar ជាមន្រ្តីប៉ូលិសម្នាក់ ជួយអន្តរាគមន៍លើរឿងក្តីនេះ បានមានប្រសាសន៍ឲ្យដឹងថា «ពួកយើងបានចាប់ខ្លួន បុរសជាប្តីរបស់នារីរងគ្រោះបានហើយ ហើយក៏នឹងបន្តធ្វើការចោទប្រកាន់បន្តទៀត ប្រសិនបើរកឃើញថាប្តីរបស់នាង បានប្រព្រឹត្តនូវទោសកំហុសផ្សេងទៀតផងដែរ» ៕

តើសម្រាប់ប្រិយមិត្តយល់យ៉ាងណាដែរ?

ទស្សនាវីដេអូ៖  

ប្រភព៖ ដេលីម៉ែល

ដោយឡែក ព័ត៌មានចាប់អារម្មណ៍មួយផ្សេងទៀត៖

ពិតជាគួរឲ្យសរសើរមែន! កុមារាអភ័ព្វពិការដៃ ទាំងសងខាងពីកំណើត ខំប្រឹងរៀនសូត្រប្រើជើងសរសេរអក្សរ រហូតធ្វើតេស្តប្រលង ទទួលបានលទ្ធផលដ៏ល្អ

ចិន៖ កាលពីថ្មីៗនេះ កុមារាជនជាតិចិនម្នាក់បានធ្វើឲ្យគ្រប់គ្នា មានការកោតសរសើរយ៉ាងខ្លាំង ចំពោះទឹកចិត្តនៃការខិតខំតស៊ូរៀនសូត្ររបស់គេ រហូតទទួលបានលទ្ធផលប្រលងដ៏ល្អមួយ ថ្វីបើរូបគេត្រឹមតែជាមនុស្សពិការដៃទាំងសងខាងក្តី។ នេះបើយោងតាមប្រភពសារព័ត៌មាន សៀងហៃ បានចុះផ្សាយ។

កុមារា Jiang Tianjin មានអាយុ៨ឆ្នាំ ជាកូនសិស្សម្នាក់ សិក្សានៅសាលាបឋមសិក្សាមួយកន្លែង ក្នុងស្រុក Shehong ខេត្ត Sichuan ប្រទេសចិន។ Jiang ជាកូនសិស្សម្នាក់ ដែលមានសភាពខុសប្លែក ពីមិត្តរួមថ្នាក់របស់គេដទៃទៀតផងដែរ។ នោះក៏ដោយសារតែ Jiang គេគឺជាកុមារាអភ័ព្វ ពិការដៃទាំងសងខាងពីកំណើត ជាហេតុធ្វើឲ្យរូបគេប្រើជើងខាងស្តាំជំនួស ដើម្បីសរសេរអក្សរផងដែរ។

បើតាមប្រភពបានឲ្យដឹងថា Jiang ជាក្មេងម្នាក់ ដែលតែងតែចូលចិត្តអង្គុយ នៅតុមុខគេក្នុងថ្នាក់រៀន ហើយព្យាយាមសម្របខ្លួនឯង ដោយផ្តោតទៅលើការសិក្សារៀនសូត្រយ៉ាងខ្លាំង រហូតក្លាយខ្លួនជាសិស្សពូកែម្នាក់ នៅក្នុងថ្នាក់ថែមទៀតផង។ អ្វីដែលពិបាកចិត្តបន្ថិចនោះ នៅពេលដែលគ្រូបង្រៀនរបស់គេ មានសំណួរដើម្បីចោទសួរឲ្យសិស្សឡើងឆ្លើយ មិត្តរួមថ្នាក់របស់ Jiang តែងនាំគ្នាលើកដៃដើម្បីជាសញ្ញា។ ប៉ុន្តែផ្ទុយស្រលះពី Jiang បានត្រឹមតែអង្គុយនៅថ្នាក់ យ៉ាងស្ងៀមស្ងាត់ម៉ង់ៗតែម្នាក់ឯង ដោយសុខចិត្តរង់ចាំឲ្យគ្រូរបស់គេ ចុចឈ្មោះហៅគេតែប៉ុណ្ណោះ។

ជាក់ស្តែង កាលពីពេលថ្មីៗកន្លងទៅនេះ គ្រូបង្រៀនរបស់ Jiang Tianjin បានបង្ហាញក្រដាសប្រលងធ្វើតេស្តមួយ ដើម្បីឲ្យគ្រប់គ្នាបានឃើញ ពីសមត្ថភាពរបស់ក្មេងប្រុសរូបនេះ ដែលជាលទ្ធផល Jiang បានទទួលពិន្ទុយ៉ាងល្អបំផុត ក្នុងការប្រលងរបស់គេ ដោយកើតចេញពីការខិតខំប្រឹងប្រែង ប្រើត្រឹមតែម្រាមជើងដើម្បីសរសេរអក្សរ និងខួរក្បាលដើម្បីគិតតែប៉ុណ្ណោះ។

ដោយឡែក បើងាកទៅមើលពីអតីតកាលរបស់កុមារ Jiang វិញ ជីវិតរបស់គេគឺពិតជាគួរឲ្យអាណិតខ្លាំងណាស់។ នៅពេលដែលម្តាយរបស់គេ ឆ្លងទន្លេបានរូបគេភ្លាម រួចបានដឹងថា Jiang ពិការដៃទាំងសងខាង បានធ្វើឲ្យម្តាយរបស់គេរន្ធត់ចិត្ត រហូតដល់ថ្នាក់សន្លប់បាត់បង់ស្មារតីតែម្តង។ នៅគ្រានោះដែរម្តាយរបស់ Jiang សន្លប់មិនដឹងខ្លួន គ្រួសារសាច់ញាតិក៏បានលួចយក Jiang ចេញទៅឆ្ងាយ ដោយបានយកគេទៅទម្លាក់ឲ្យ អ្នករត់ស៊ីក្លូម្នាក់ដើម្បីយកទៅចិញ្ចឹម។ បន្ទាប់ពីម្តាយ Jiang ភ្ញាក់ដឹងខ្លួនមិនឃើញកូនខ្លួនឯង គាត់ក៏បានស្រែកយំយ៉ាងខ្លាំង។

ចំណែកឯ អ្នករត់ស៊ីក្លូវិញ ក្រោយបានដឹងថា ក្មេងប្រុសតូច (Jiang) ដែលគេទម្លាក់យកមកឲ្យគាត់នោះ កើតមកគ្មានដៃ គាត់ក៏បានយកគេទៅទម្លាក់បន្តចោល នៅក្បែរចិញ្ចើមផ្លូវវិញផងដែរ។ ប៉ុន្តែជាសំណាងល្អហើយ ដែលត្រូវបានក្រុមមន្រ្តីប៉ូលិស ប្រទះឃើញរួចក៏ប្រកាសទាក់ទង បញ្ជូនកុមារាអភ័ព្វរូបនេះ ទៅកាន់មន្ទីរពេទ្យបានជួបមុខម្តាយរបស់គេវិញ រហូតមកដល់សព្វថ្ងៃតែម្តង។

ម្តាយរបស់ Jiang បាននិយាយថា ថ្វីត្បិតតែកូនប្រុសរបស់គាត់ កើតមកគ្មានដៃក៏ពិតមែន តែរូបគាត់សន្យាថា នឹងមើលថែទាំកូនរបស់ខ្លួនឲ្យដល់ទីបំផុត និងមិនឲ្យរូបគេរបូតចេញទៅណា ឆ្ងាយពីដៃដូចមុនទៀតឡើយ។

ដោយសារតែរឿងរ៉ាវដ៏គួរឲ្យកំសត់ បូករួមជាមួយនឹងការខិតខំ តស៊ូព្យាយាមរៀនសូត្រ យ៉ាងយកចិត្តទុកដាក់របស់ Jiang នេះហើយ ទើបធ្វើឲ្យអ្នកនិយមលេងបណ្តាញសង្គមជាច្រើន រំជួលចិត្ត និងកោតសរសើរដល់ Jiang យ៉ាងខ្លាំង មិនបាក់ទឹកចិត្តតស៊ូក្នុងជីវិត រហូតក្លាយខ្លួនជាសិស្សឆ្នើម ៕ 

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]