(ភ្នំពេញ)៖ ផលិតកម្មរស្មីហង្សមាស បានបំបែកឯតទគ្គកម្មថ្មីមួយទៀតហើយ នៅក្នុងឆ្នាំនេះ តាមរយៈបទចម្រៀងនិពន្ធថ្មី របស់ខ្លួនដែលមានអ្នក ចូលទស្សនារាប់សែននាក់ ពេលបង្ហោះចេញភ្លាម។ ជាក់ស្ដែងដូចជាបទ «រាំកូរណាស់ចែ» ដែលជាចង្វាក់ញាក់ ច្រៀងដោយកំពូលតារាចម្រៀង ព្រាប សុវត្ថិ គ្រាន់តែចេញ teaser MV បានតែ៤ថ្ងៃប៉ុណ្ណោះ មានអ្នកចូលមើល រហូតដល់១លាននាក់ឯណោះ ពិតជាមិនគួរឲ្យជឿមែន។
បទ «រាំកូរណាស់ចែ» ច្រៀងដោយលោក ព្រាប សុវត្ថិ និងមានការចូលរួមសម្ដែង ដោយអ្នកនាង ពេជ្រ សោភា, នាយក្រឹម និងតារាល្បីៗ ជាច្រើនទៀតនោះ បានអង្រួនអារម្មណ៍អ្នកទស្សនាឲ្យបាត់អត់ភាពហ្មងសៅ បាត់អស់ក្ដីកង្វល់ នាំមកវិញ នូវភាពសប្បាយរីករាយ និងសំណើច ក្អាកក្អាយ ពេលបានទស្សនា និងស្ដាប់បទនេះ។ អ្នកគាំទ្រមួយរូបបាននិយាយថា «ថា កូរ កូរមែន ! ចែភាយើងហ្នឹង កូរតាំងពីឆ្នាំមុនមកដល់ឆ្នាំនេះ កូរឥតល្ហែរ ហាហា ! ត្រូវជាមួយនឹងបងសុវត្ថិ ពូកែកូរដែរ ត្រូវគ្នាហ្មងហើយនៀក! តោះចូលរួមកូរទាំងអស់គ្នា!»
បទ«រាំកូរណាស់ចែ» ដែលជាអាល់ប៊ុមថ្មី ត្រៀមសម្រាប់រាំលេងកម្សាន្ត ក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរខាងមុខនេះ មានការនិពន្ធទំនុកច្រៀងដោយ អ៊ីនុ, និពន្ធបទភ្លេង មាស សុគន្ធ, ដឹកនាំសម្តែង ដោយកែ វិបុល និងសុខ ឃឿន, រៀបចំការផលិត គង់ ផល្លី, ថតដោយ កែ វិបុល និងកាត់តដោយ អេង ផល្លា។ ជាការកត់សម្គាល់ ក្រៅពីបទ «រាំកូរណាស់ចែ» មានអ្នកទស្សនាច្រើន ស្ទើរមិនគួរឲ្យជឿ ក្នុងនោះក៏មានបទ ថ្មីមួយទៀត មានចំណងជើងថា «រាំអញ្ចេក!» ដែលជាការបកស្រាយរួមគ្នា រវាងលោក ព្រាប សុវត្ថិ និងកញ្ញា ឱក សុគន្ធកញ្ញា ក៏កំពុងតែពេញ និយមខ្លាំង កក្រើកប្រិយមិត្តអ្នកស្ដាប់ ខណៈដែលនេះជាភាពល្បីល្បាញថ្មីមួយទៀត របស់ផលិតកម្ម ហង្សមាស នៅដើមឆ្នាំ២០១៧នេះ ក្នុងសមរភូមិផលិតបទចម្រៀង ប្រកួតប្រជែងលើទីផ្សារសិល្បៈ៕
ប្រភព៖ Fresh News
ដោយឡែករំលឹកព័ត៌មានមួយផ្សេងទៀត៖ ងួន ចាន់ដេវីត នៅតែនិពន្ធបទភ្លេងឱ្យ ពេជ្រ សោភា ច្រៀង ក្នុងឱកាសបុណ្យចូលឆ្នាំដដែល!
ភ្នំពេញ៖ រឿងរ៉ាវអាស្រូវដែលល្បីថា តារាចម្រៀង ពេជ្រ សោភា និង លោក ងួន ចាន់ដេវីត មានបញ្ហាជាមួយគ្នា បានធ្វើឱ្យមហាជនមានការចាប់អារម្មណ៍យ៉ាងខ្លាំង ដោយក្រោយពីផ្ទុះរឿងនេះ ក៏បានធ្វើឱ្យមនុស្សជាច្រើនបានដៀលកប់ៗមាត់ថា លោក ងួន ចាន់ដេវីត ថាជាពស់ ជាក្រពើ ភ្លេចគុណ ពេជ្រ សោភា ដែលខំជួយជ្រោមជ្រែងរហូតដល់មានកេរ្តិ៍ឈ្មោះ ល្បីរន្ទឺរហូតមកដល់សព្វថ្ងៃនេះ។
ប៉ុន្តែតាមការបកស្រាយរបស់អ្នកនាងពេជ្រ សោភា ក៏បានបង្ហាញថា អ្នកនាង និងដេវីត មិនបានមានទំនាស់អ្វីជាមួយគ្នាដូចពាក្យចចាមអារ៉ាម ដែលបានលេចឮកន្លងមកនោះទេ។
ពោលគឺអ្នកនាងពេជ្រ សោភា អះអាងថា គ្មានរឿងអ្វីដែលនាងត្រូវឈ្លោះជាមួយនឹងលោកដេវីតឡើយ គ្រាន់តែមួយរយៈក្រោយនេះ ម្នាក់ៗមានភាពល្បីល្បាញរៀងៗខ្លួន និងណាមួយជាប់ផលិតបទថ្មីផង ទើបរវល់មិនបានចាប់ដៃគូច្រៀងរួមគ្នាប៉ុណ្ណោះ។
ប៉ុន្តែទោះបីជាយ៉ាងនេះក្តី ជាក់ស្តែងកាលពីយប់មិញ បទចម្រៀងថ្មីរបស់អ្នកនាងពេជ្រ សោភា ដែលត្រៀមនឹងចេញលក់ក្នុងឱកាសបុណ្យចូលឆ្នាំខ្មែរខាងមុខនេះ ក៏ត្រូវបានលោក ងួន ចាន់ដេវីត គឺជាអ្នកនិពន្ធបទភ្លេងឱ្យច្រៀងផងដែរ និងមានការសម្រួលតន្រ្តីដោយលោក មាស សុគន្ធ។
បទនោះមានចំណងជើងថា «ទូងឈីង» ជាបទស្នាដៃនិពន្ធទំនុកច្រៀងដោយ អ្នកនាង ពេជ្រ សោភា ដោយខ្លួនឯងផ្ទាល់៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
