សុគន្ធ និសា និងតារាជាច្រើនដួងទៀត ទទួលបានមេដាយថ្នាក់មហាសេនា!

ភ្នំពេញ៖ ព្រឹកថ្ងៃទី២៧ខែកុម្ភៈ ម្សិលមិញនេះ តារាចម្រៀងមនោសញ្ចេតនាផ្អែមស្រទន់ និងកំពុងតែទទួលបានប្រជាប្រិយភាពយ៉ាងខ្លាំង ពីសំណាក់ទស្សនិកជនទូទាំងប្រទេស កញ្ញា សុគន្ធ និសា បានទទួលមេដាយថ្នាក់មហាសេនាដ៏ខ្ពង់ខ្ពស់។

ក្នុងឱកាសដ៏មហាកិត្តិយសនេះ ក៏មានការប្រគល់មេដាយជូនដល់តារាៗល្បីឈ្មោះជាច្រើនដួងផ្សេងទៀត រួមមានដូចជា កញ្ញា ស៊ុន ស្រីពេជ្រ កញ្ញា មាស សុខ សោភា លោក ខេមរៈ សេរីមន្ត លោក ឯក ស៊ីដេ លោក សួស សងវាចា នាយក្រឹម នាយព្រហ្មម៉ាញ និងនាងគ្រតជាដើម។

ដោយនៅលើគណនីហ្វេសប៊ុករបស់កញ្ញា សុគន្ធ និសា ក៏បានប្រាប់ទាំងស្រុងថា៖

«នាងខ្ញុំពិតជាមានមហាកិត្តិយស និងអរព្រះគុណដ៏លើសលុប ចំពោះព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រមទាំងសម្តេចអគ្គមហាសេនាបតី តេជោ ហ៊ុនសែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានប្រោសព្រះរាជទាន និងប្រទាននូវមេដាយថ្នាក់មហាសេនាដល់រូបនាងខ្ញុំ ទូលបង្គំខ្ញុំម្ចាស់ ពិតជាចងចាំនូវព្រះគុណដ៏ថ្លៃថ្លានេះ ពុំអាចបំភ្លេចបានឡើយ»។ 

នេះគឺកិត្តិយសដ៏ល្អប្រសើរមួយ ដែលបានមកពីការខិតខំប្រឹងប្រែងបម្រើនៅក្នុងវិស័យសិល្បៈខ្មែរ របស់សិល្បករ-សិល្បការិនីទាំងអស់គ្នានៅក្នុងសង្គម៕ 

ទស្សនាកម្រងរូបភាពខាងក្រោមនេះទាំងអស់គ្នា៖

កំណត់ហេតុខ្មែរឡូត៖

ដោយឡែករំលឹកព័ត៌មានចាស់ អ្នកសិល្បៈល្បីៗប្រចាំប្រទេសកម្ពុជា​ ៣៨ដួង ក៏ទទួលបាន​គ្រឿង​ឥស្សរិយ​យស ពីស​ម្តេច​​​កិត្តិ​​ព្រឹទ្ធ​​​បណ្ឌិត ប៊ុន​ រ៉ា​នី ហ៊ុន សែន​ផងដែរ កាលពីពេលកន្លងទៅ។

សម្តេចកិត្តិព្រឹទ្ធបណ្ឌិត ប៊ុនរ៉ា នី ហ៊ុន សែន ប្រធានកាកបាទក្រហមកម្ពុជា កាលពីថ្ងៃទី១១ ខែមករា ឆ្នាំ២០១៧ បានអញ្ជើញចូលរួមជាអធិបតីភាព ក្នុងបិទកិច្ចប្រជុំបូកសរុបលទ្ធផលការងារ ប្រចាំឆ្នាំ២០១៦ និងទិសដៅផែនការឆ្នាំ២០១៧ របស់សាខាកាកបាទក្រហមកម្ពុជា នៅសាលារាជធានីភ្នំពេញ។ ក្នុងនោះ សិល្បករ-សិល្បការិនី ចំនួន៣៨រូប ក៏ត្រូវទទួលបានការបំពាក់គ្រឿងឥស្សរិយយស ពីសម្តេចកិត្តិព្រឹទ្ធបណ្ឌិត ប៊ុនរ៉ា នី ហ៊ុន សែន ក្នុងកម្មវិធីនោះផងដែរ។

សិល្បករ-សិល្បការិនី ៣៨រូប ក្នុងនោះ មាន១៧រូប ទទួលបានគ្រឿងឥស្សរិយយស ព្រះរាជាណាចក្រកម្ពុជា ថ្នាក់មហាសេនា និងសិល្បករ-សិល្បការិនី ២១រូប ទទួលបានគ្រឿងឥស្សរិយយសមុនីសារភ័ណ្ឌ ថ្នាក់ធិបឌិន្ទ។ ក្នុងនោះ មានតារាសម្ដែង តារាចម្រៀង តារាកំប្លែង និងវិរៈសិល្បករជើងចាស់ មួយចំនួនផងដែរ ដែលមានស្នាដៃ នៅក្នុងការជួយថែរក្សា តម្លៃវប្បធម៌ អរីយធម៌ និងប្រពៃណី របស់ខ្មែរ។

តារាសម្ដែង និងតារាចម្រៀង ដែលទទួលបានគ្រឿងឥស្សរិយយស ព្រះរាជាណាចក្រកម្ពុជា ថ្នាក់មហាសេនា រួមមាន លោកស្រី ណយ សំណាង, លោកស្រី សួន សំអឿន, លោកស្រី អ៊ុក សុផា, លោកស្រី នួន សារី, លោក ណយ វ៉ាន់ណេត, លោកស្រី ម៉េងកែវពេជ្ជតា, លោកស្រី ហ៊ឹម ស៊ីវន, លោក ព្រាប សុវត្ថិ, កញ្ញា ឱក សុគន្ធកញ្ញា, លោក ឆន សុវណ្ណរាជ, លោក ណុប បាយ៉ារិទ្ធ, លោកស្រី ពេជ្រ សោភា, លោក សុះ ម៉ាច, លោក សួង ទិតធានី, លោកស្រី ហែម សុវណ្ណ, លោក ម៉ា រីសុន និងលោក ម៉ៅ សាមឿន។

ដោយឡែកសិល្បករ-សិល្បការិនី ២១រូប ដែលទទួលបានគ្រឿងឥស្សរិយយស មុនីសារភ័ណ្ឌ ថ្នាក់ធិបឌិន្ទ រួមមាន លោក សួស សងវាចា, លោកស្រី សួន ចន្ថា, លោក ឯក ស៊ីដេ, អ្នកនាង ខាត់ សុឃីម, លោកស្រី កែវ ច័ន្ទសម្ផស្ស លោកស្រី ម៉េង កែវពេជ្របុប្ផា, កញ្ញា សុន ស្រីពេជ្រ, លោក អ៉ឹង ប៊ុនលាភ,លោក ឈឿន ឧត្តម, កញ្ញា ទៀង មុំសុធាវី, លោក ជិន វឌ្ឍនា, លោកស្រី អ៉ិន ថាច, លោក ចាន់ សុធី, លោកស្រី ឃុន សារិន, លោក ញ៉េប សាត, លោក ព្រហ្ម កុសល, លោក ឯក ចាន់ម្លី, លោក សក បូរ៉ា, លោក ឡៅ សុភឿន, លោក ជា ប៊ុនធឿន និងលោក ម៉ែន សខន៕

• សុគន្ធ និសា
• ជំរុញទឹកចិត្ត