(ភ្នំពេញ)៖ នៅរសៀលថ្ងៃទី២៤ ខែកុម្ភៈ ឆ្នាំ២០១៧ កម្លាំងកងរាជអាវុធហត្ថរាជធានីភ្នំពេញ បានបញ្ជូនក្រុមចោរប្លន់២នាក់ ទៅតុលាការ បន្ទាប់ពីស្រាវជ្រាវ ហើយចាប់ខ្លួនបាន។ ជនសង្ស័យទាំង២នាក់ បានសារភាពថា ពួកគេទាំង២នាក់ ជិះម៉ូតូ១គ្រឿង អាវុធខ្លី១ដើម បានបាញ់ប្លន់ និងឆក់យកទ្រព្យសម្បត្តិ របស់ប្រជាពលរដ្ឋ នៅខណ្ឌដូនពេញ និងខណ្ឌ៧មករា ចំនួន៤លើកមកហើយ។
មន្រ្តីអាវុធហត្ថរាជធានីភ្នំពេញ បានប្រាប់ភ្នាក់ងារ Fresh News បានឲ្យដឹងថា កាលពីថ្ងៃទី៣០ ខែវិច្ឆិកា ឆ្នាំ២០១៦ នៅម្តុំសាលាអាលីយ៉ង់ ស្ថិតក្នុងខណ្ឌដូនពេញ ជនសង្ស័យទាំងពីរនាក់ ជិះម៉ូតូ១គ្រឿង ម៉ាកហុងដាសេ១២៥ បានដកកាំភ្លើងបាញ់ចំនួន២គ្រាប់ ទៅលើជនរងគ្រោះចំនួន៥នាក់ បណ្តាលឲ្យរបួសម្នាក់ ចំគូថចំហៀងខាងស្តាំបៀមគ្រាប់។ បន្ទាប់មក ជនសង្ស័យបានគេចខ្លួនបាត់ រីឯជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យ រហូតដល់ថ្ងៃទី២៦ ខែមករា ឆ្នាំ២០១៧ ជនរងគ្រោះជាពីរបួស ទើបមកដាក់ពាក្យបណ្តឹងនៅសមត្ថកិច្ចកងរាជអាវុធហត្ថ។
លុះដល់ថ្ងៃទី២២ ខែកុម្ភៈ ឆ្នាំ២០១៧ កម្លាំងអាវុធហត្ថខណ្ឌចំការមន សហការជាមួយកម្លាំងជំនាញ នៃការិយាល័យបទល្មើសព្រហ្មទណ្ឌអាវុធហត្ថ រាជធានីភ្នំពេញ ឃាត់ខ្លួនជនសង្ស័យទាំង០២នាក់ នៅម្តុំសួនច្បារវិមានឯករាជមុខវត្តលង្កា។
តាមការស្រាវជ្រាវរបស់សមត្ថកិច្ចអាវុធហត្ថរាជធានីភ្នំពេញ ក៏ដូចជា ចម្លើយសារភាពរបស់ជនល្មើសបានឲ្យដឹងថា ពួកគេទាំងពីរនាក់មានឈ្មោះ នូ ឧត្តម ហៅចូក អាយុ១៧ឆ្នាំ និងឈ្មោះ ម៉ែន វីរៈ ហៅ ពេជ្រ អាយុ២៤ឆ្នាំ គឺជាបក្ខពួកនឹងគ្នា ហើយរយៈកាលកន្លងមក ពួកគេទាំងពីរនាក់ធ្លាប់ធ្វើសកម្មភាព បាញ់ប្លន់យកម៉ូតូ និងឆក់សម្ភារតាមដងផ្លូវចំនួន០៤លើក រួចមកហើយ ដោយប្រើប្រាស់មធ្យាបាយម៉ូតូមួយគ្រឿង ម៉ាកហុងដាសេ១២៥ ពណ៌មាស ស្លាកលេខ ភ្នំពេញ 1GI-1470 និងអាវុធខ្លី០១ដើម ម៉ាកកា៥៤។ ពេលធ្វើកម្មភាពម្តងៗ ឈ្មោះ ម៉ែន វីរៈ ហៅ ពេជ្រ ជាអ្នកឌុប ហើយឈ្មោះ នូ ឧត្តម ហៅ ចូក ជាអ្នកកាន់អាវុធ អង្គុយពីក្រោយចាំបាញ់ប្លន់ យកម៉ូតូពីជនរងគ្រោះ។
សកម្មភាពលើកទី១ កាលពីថ្ងៃទី៣០ ខែវិច្ឆិកា ឆ្នាំ២០១៦ ប្លន់នៅម្តុំសាលាអាលីយ៉ង់ ដោយបាញ់ចំនួន០២គ្រាប់ ត្រូវគូទជនរងគ្រោះ០១គ្រាប់ និង០១គ្រាប់ទៀត មិនផ្ទុះយកបានម៉ូតូ០១គ្រឿង ម៉ាកសង់ប៊ិច។ សកម្មភាពលើកទី២ (មិនចាំថ្ងៃខែ) ប្លន់នៅចំណុចម្តុំផ្លូវភ្លោះរអូរឫស្សី ដោយបាញ់គម្រាមភ្ចុចដី០១គ្រាប់ យកបានម៉ូតូ០១គ្រឿង ម៉ាកឃ្លីកពណ៌ស ពីជនរងគ្រោះម្នាក់ជាស្រ្តី។ សកម្មភាពលើកទី៣ កាលពីថ្ងៃទី០៣ ខែកុម្ភៈ ឆ្នាំ២០១៧ ប្លន់យកម៉ូតូ០១គ្រឿងពីស្ត្រីម្នាក់ នៅចំណុចម្ដុំក្ដាន់២ (តែមិនបានសម្រេច) ដោយសារមានប្រជាពលរដ្ឋច្រើន និងសកម្មភាពលើកទី៤ ក្នុងអំឡុងខែកុម្ភៈ ឆ្នាំ២០១៧នេះដែរ ឆក់ទូរស័ព្ទបាន០១គ្រឿងពីជនរងគ្រោះម្នាក់ជាស្ត្រី នៅម្តុំផ្សារអូរឬស្សី៕
ប្រភព៖ fresh news
ដោយឡែកពត៌មានគួរឲ្យចាប់អារម្មណ៍មួយទៀត៖
ដេញកាប់-ចាក់គ្នាផ្អើលសួនច្បារមុខណាហ្គាវើល ចាប់ខ្លួនបាន២នាក់
រាជធានីភ្នំពេញ ៖ ក្មេងស្ទាវ២នាក់ក្នុងចំណោមក្មេងស្ទាវ២ក្រុមត្រូវបាននគរបាលប៉ុស្តិ៍ទន្លេបាសាក់ធ្វើការឃាត់ខ្លួន ខណៈជិះម៉ូតូជាច្រើនគ្រឿងដេញកាប់ចាក់គ្នានៅចំណុចលើសួនច្បារមុខ ណាហ្គា វើល ស្ថិតក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង៣ និង១៥នាទីទៀបភ្លឺ ថ្ងៃទី២៤ ខែកុម្ភៈ ឆ្នាំ២០១៧ ។
ប្រភពព័ត៌មានបានឱ្យដឹងថា ក្រុមក្មេងស្ទាវទាំង២នាក់ដែលឃាត់ខ្លួន ១-ឈ្មោះ ហូរ សី អាយុ១៩ឆ្នាំ មុខរបរមិនពិតប្រាកដ ស្នាក់នៅផ្ទះជួល ផ្លូវបេតុង សង្កាត់ទឹកល្អក់ទី៣ ខណ្ឌទួលគោក និង ២-ឈ្មោះ ប៊ី សុវណ្ណារាជ អាយុ ១៦ឆ្នាំ ស្នាក់នៅផ្ទះជួល ក្នុងសង្កាត់មិត្តភាព ខណ្ឌ៧មករា(ជាក្រុមតែមួយ) ។
ប្រភពបន្តថា មុនពេលកើតហេតុ ក្រុមក្មេងស្ទាវ២ក្រុម ដោយ១ក្រុមមានគ្នាមិនតិចជាង១០នាក់ ជិះម៉ូតូជាច្រើនគ្រឿង ប្រដាប់ដោយដាវសាមូរ៉ៃ និងកាំបិតគ្រប់ៗដៃ មិនដឹងជាមកពីទីណាឡើយ បានធ្វើសកម្មភាពដេញកាប់ចាក់គ្នានៅតាមដងផ្លូវសាធារណៈដូចហ្វូងគោ ។
ប្រភពដដែលបានបន្តទៀតថា លុះមកដល់ចំណុចសួនច្បារមុខ ណាហ្គាវើល ពួកគេក៏បានឈប់ម៉ូតូចុះដេញកាប់-ចាក់គ្នារត់ប្រសេចប្រសាចពេញផ្លូវ បង្កឲ្យមានការភ្ញាក់ផ្អើលដល់កម្លាំងសមត្ថកិច្ចចុះមកធ្វើការបង្ក្រាប ដោយឃាត់ខ្លួនបាន២នាក់ ដកហូតដាវសាមូរ៉ៃ១ដើម និងម៉ូតូម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ ១BK-៨១២១ មួយគ្រឿងផងដែរ ។
ឆាកប្រយុទ្ធគ្នារបស់ក្រុមក្មេងស្ទាវទាំងពីរក្រុមខាងលើនេះដែរ បានធ្វើឲ្យមានការខូចខាតម៉ូតូ៣គ្រឿង ហើយនាំគ្នាជិះរត់គេចខ្លួនបាត់អស់ និងមិនបានបណ្តាលឲ្យអ្នកណាម្នាក់រងគ្រោះថ្នាក់ឡើយ ។
ក្រោយពីធ្វើការឃាត់ខ្លួនក្រុមក្មេងស្ទាវទាំង២នាក់ និងដកហូតបានដាវសាម៉ៃ១ដើម និងម៉ូតូ១គ្រឿង ដែលជាវត្ថុតាងរួចហើយ ក៏បាននាំមកធ្វើការសាកសួរ និងកំណត់ហេតុនៅនគរបាលប៉ុស្តិ៍ទន្លេបាសាក់ ដើម្បីបញ្ជូនទៅកាន់អធិការដ្ឋាននគរបាលខណ្ឌចំការមន ចាត់ការទៅតាមផ្លូវច្បាប់ជាបន្តទៅទៀត ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]