ចេះនោះចេះ! ទាល់តែមានអ្នកមកស្ទាបអង្អែលថ្នាក់ថ្នម បានព្រមចូលជំរុំវិញ (មានវីដេអូ)

អាហ្រ្វិកខាងត្បូង៖ តោឈ្មោលធំមួយក្បាល នៅក្នុងមជ្ឈមណ្ឌលអភិរក្សសត្វ ក្នុងទីក្រុង Harrismith ប្រទេសអាហ្រ្វិកខាងត្បូង ត្រូវគេថតបាន មិនព្រមដើរចូលក្នុងជំរុំ សុខចិត្តឈរពាំងផ្លូវមិនឲ្យគេធ្វើដំណើរឆ្លងកាត់ ប៉ុន្តែទាល់តែទៅថ្នាក់ថ្នម បំបោសអង្អែលទើបវាព្រមចូលជំរុំវិញ។

ទិដ្ឋភាពនេះមានទីតាំងស្ថិតនៅមជ្ឈមណ្ឌលអភិរក្សសត្វ Glen Garriff។ អ្នកធ្វើការនៅទីនោះបានបញ្ជាក់ឲ្យដឹងថា សត្វតោឈ្មោលដ៏ធំមួយក្បាលនោះឈ្មោះ Smokey វាតែងតែស្តាប់បង្គាប់នៅរាល់ពេលដែលអនុរក្សដែលវាចូលចិត្ត មកស្ទាបអង្អែល ថ្នាក់ថ្នម ហើយបើពុំដូច្នោះទេ វាមិនព្រមទៅណាឡើយ។

បុគ្គលិកនៅមជ្ឈមណ្ឌលអភិរក្សសត្វម្នាក់ឈ្មោះ Suzanne Scott បាននិយាយថា «ពួកយើងមិនអាចដឹងថាសត្វតោ វាកំពុងគិតអ្វីនោះទេ។ នៅពេលល្ងាច ពួកយើងតែងតែបើកទ្វាជំរុំ ដើម្បីឲ្យ Smokey អាចដើរតាមផ្លូវបានដោយសេរី ប៉ុន្តែពួកយើងក៏បានគិតពីសុវត្ថិភាពដែរ» ។

នាងបានបន្តទៀតថា «ចំពោះពេលព្រឹកវិញ អនុរក្សដែលមើលថែសត្វម្នាក់ឈ្មោះ Mike តែងតែបណ្តើរ Smokey ចូលទៅក្នុងជំរុំវិញ ដើម្បីទុកផ្លូវឲ្យមានអ្នកដំណើរ និងយានយន្តឆ្លងកាត់» ។

ក្នុងនោះដែរមានតែលោក Mike ទេ ដែលវាចូលចិត្ត។  នាងបានបន្ថែមឲ្យដឹងថា «Smokey មិនដែលស្តាប់បង្គាប់នរណាទេ ហើយតែងតែឈរបង្អាក់ផ្លូវធ្វើដំណើរ ប៉ុន្តែនៅពេលដែល Mike បានមកឱបក្រសោប ថ្នាក់ថ្នមវិញនោះ វាក៏ស្តាប់ភ្លាម» ។

គួរបញ្ជាក់ផងដែរថា មជ្ឈមណ្ឌលអភិរក្សសត្វ Glen Garriff គឺប្រៀបបានដូចជាផ្ទះមួយ ដែលមានសត្វតោ សរុបចំនួន៨០ក្បាល និងសត្វផ្សេងៗទៀត ហើយទីកន្លែងនេះផងដែរ ក៏ជាកន្លែងពិសោធន៍ស្រាវជ្រាវអំពីពូជ និងពួកប្រភេទសត្វគ្រប់ប្រភេទផងដែរ៕  

ទស្សនាវីដេអូខាងក្រោម៖

ប្រភព៖ Dailymail

ដោយឡែករំលឹកព័ត៌មានមួយផ្សេងទៀត៖នារីរត់តុក្លាហាន! ហ៊ានចាប់ទាញកន្ទុយសត្វត្រកួតយក្ស ចេញពីក្នុងហាង ព្រោះស្មានថាជាកន្ទុយសត្វឆ្កែ

អូស្ត្រាលី៖ តៀមស្រាត្រូវបានក្លាយជាកន្លែងពេញនិយមសម្រាប់អ្នកដែលចូលចិត្តស្វែងរកនូវបរិយាកាសរីករាយ ដើម្បីជួបជុំជាមួយមិត្តភក្តិ និងគ្រួសារនាពេលទំនេរ។

ជាទូទៅតាមហាងស្រានីមួយៗ តែងតែហាមឃាត់ដាច់ខាតចំពោះ ភ្ញៀវដែលចង់យកសត្វចិញ្ចឹមចូលទៅក្នុងបរិវេណហាង ព្រោះសត្វចិញ្ចឹមជួនកាលអាចបំផ្លាញបរិយាកាសរីករាយនៅក្នុងហាងបាន ខណៈដែលភ្ញៀវកំពុងតែជជែកកម្សាន្តសប្បាយ ហើយមិនចង់លឺសម្លេងរំខានពីសត្វទាំងនោះ។

ជាក់ស្តែងហាងស្រាមួយឈ្មោះ Mimosa ដែលមានទីតាំងនៅក្នុងតំបន់ New South Wales ប្រទេសអូស្រា្តលី ក៏បានហាមឃាត់ភ្ញៀវលើការយកសត្វចិញ្ចឹមមកក្នុងបរិវេណហាងដូចគ្នា។ ស្របពេលដែលភ្ញៀវកំពុងជជែកកម្សាន្ត និងក្រេបរសជាតិស្រាយ៉ាងសប្បាយរីករាយ ស្រាប់តែនារីរត់តុម្នាក់ បានធ្វើឲ្យភ្ញៀវក្នុងហាងស្រែកឆោរឡោ រត់ឆ្លេរឆ្លា ខណៈដែលនារីរត់តុក្លាហានរូបនោះ បានចាប់ទាញកន្ទុយសត្វត្រកួតយក្សមួយចេញពីខាងក្នុងហាង និងអូសកាត់តុភ្ញៀវដែលកំពុងអង្គុយតែម្ដងដែលបណ្ដាលឲ្យភ្ញៀវខ្លះហក់ឡើងលើកៅអីថែមទៀតផង។

នារីក្លាហានរូបនោះ ឈ្មោះ Samia Lily អាយុ២៥ឆ្នាំ បានបម្រើការក្នុងហាងស្រាដូចសព្វមួយដង។ តែចៃដន្យក្នុងថ្វៃកើតហេតុ នាងបានប្រទះឃើញកន្ទុយសត្វម្យ៉ាងនៅក្រោមតុ។ ដោយស្មានថាជាកន្ទុយឆ្កែ នាងក៏ចាប់ទាញកន្ទុយសត្វនោះ អូសចេញមកក្រៅ ស្រាប់តែនាងបានលឺសម្លេងភ្ញៀវស្រែកទ្រហឹងពេញហាង ទើបនាងក្រលេកមើលទៅឃើញថានាងកំពុងអូសកន្ទុយត្រកួតយក្សមួយក្បាល។

ជាមួយនឹងអារម្មណ៍ភ្ញាក់ផ្អើលលាយតក់ស្លុត ចង់ស្រែកក៏ស្រែកមិនចេញ រូបនាងក៏មិនដឹងថាសម្រេចចិត្តយ៉ាងណាត្រូវនោះដែរ តែដោយសារតែតួនាទីនាងជាអ្នករត់តុ នាងក៏បន្តអូសសត្វនោះចេញពីហាងដើម្បីសុវត្ថិភាពភ្ញៀវ។

ក្រោយពេលនាងចាប់សត្វនោះចេញ ម្ចាស់ហាងក៏បានបង្ហោះឃ្លីបសកម្មភាពរបស់នាងនៅលើហ្វេសប៊ុក ដែលម្នាក់ៗបានសរសើរពីភាពក្លាហានរបស់នាង ខណៈដែលវីដេអូនេះមានអ្នកទស្សនាជាង ៤០០ ០០០ដង។

គួរបញ្ជាក់ផងដែរថា នារីរត់តុរូបនេះមានសញ្ជាតិដើមបារាំង ហើយបានផ្លាស់មកធ្វើការនៅប្រទេសអូស្ត្រាលី។ បន្ទាប់ពីឆ្លងកាត់រឿងនេះ ម្នាក់ៗបានកោតសរសើរពីភាពក្លាហានរបស់នាង រហូតមានអ្នកខ្លះបានបញ្ចេញយោបល់ថា ប្រទេសអូស្រ្តាលីគួរតែផ្ដល់សញ្ជាតិដល់នារីក្លាហាននេះជាការលើកទឹកចិត្តថែមទៀតផង៕ 

• វីដេអូ