អារ៉ាប់រួម៖ ទីក្រុងឌូបៃ គ្រោងនឹងដំណើរការសេវាកម្ម តាក់ស៊ីលើមេឃ ដំបូងគេបំផុតនៅក្នុងឆ្នាំ២០១៧ ដោយប្រើប្រាស់ដ្រូន ដំណើរការស្វ័យប្រវត្តិ ដែលផលិតដោយក្រុមហ៊ុនចិន ឈ្មោះ EHang Inc ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន VOA របស់អាមេរិក។

ប្រភពព័ត៌មានបានឲ្យដឹងថា តាក់ស៊ីដ្រូន EHang 184 នេះ ដំណើរការដោយថាមពលថ្ម នឹងត្រូវបានរចនាឡើយដោយមានរាងដូចជាស៊ុតមួយគ្រាប់។ វាអាចផ្ទុកអ្នកដំណើរចំនួនម្នាក់ និងធ្វើដំណើរលើរយៈចម្ងាយជិត ឬមធ្យម ហើយអាជ្ញាធរក្នុងទីក្រុងឌូបៃ បាននិយាយថា ពួកគេគ្រោងនឹងប្រើដ្រូន ដែលផលិតដោយក្រុមហ៊ុនចិនមួយនេះ ក្នុងការដំណើរការសេវាកម្មតាក់ស៊ីលើមេឃ ឲ្យបានឆាប់បំផុតនៅក្នុងខែកក្កដា។

ប្រភពបន្តថា ដ្រូន EHang 184 ដែលផលិតដោយក្រុមហ៊ុនចិនមួយនេះ មានស្លាប កង្ហារចំនួន ០៤ ហើយវាត្រូវបានរចនាឡើង ដើម្បីដាក់អ្នកដំណើរចំនួនម្នាក់ និងអាចផ្ទុកទំងន់បាន ១០០គីឡូក្រាម ព្រមទាំងមានកន្លែងដាក់អីវ៉ាន់តូចមួយ នៅខាងក្រោយ។ 

ប្រធាននាយកដ្ឋានផ្លូវថ្នល់ និងដឹកជញ្ជូនរបស់ទីក្រុងឌូបៃ បានឲ្យដឹងថា តាក់ស៊ីលើមេឃ ស្វ័យប្រវត្តិមួយនេះ ត្រូវបានធ្វើការសាកល្បងរួចទៅហើយនៅក្នុងទីក្រុង នៃប្រទេសអារ៉ាប់រួមមួយនេះ។ ហើយសេវាកម្មរបស់វា ត្រូវបានគេរំពឹងថា នឹងចាប់ផ្តើមដំណើរការនៅក្នុងខែកក្កដាឆ្នាំ២០១៧។

តាក់ស៊ីដ្រូន ដែលមានរាងដូចជាស៊ុតមួយនេះ អាចធ្វើដំណើរបានក្នុងល្បឿនអតិបរមា ១៦០គីឡូម៉ែត្រក្នុងមួយម៉ោង ហើយវាអាចហោះបានរយៈពេល ៣០នាទី រាល់ការសាកថ្មពេញម្តងៗ និងអាចហោះហើរក្នុងរយៈចម្ងាយឆ្ងាយបំផុត ៥០គីឡូម៉ែត្រ។

តាមរយៈវីដេអូបង្ហាញពីតាក់ស៊ីដ្រូននេះ បានឲ្យយើងឃើញថា ដំណើរការទាំងអស់ត្រូវបានធ្វើឡើងដោយស្វ័យប្រវត្តិ។ រីឯការហៅតាក់ស៊ីមួយនេះ អាចធ្វើឡើងតាមរយៈកម្មវិធីទូរស័ព្ទមួយ ដើម្បីឲ្យវាហោះមកទទួលអ្នកដំណើរ នៅទីតាំងដែលបានកំណត់ ហើយអ្នកដំណើរអាចកំណត់ពីគោលដៅដែលត្រូវទៅ ដោយចុចនៅលើផែនទី ដែលរចនាឡើងនៅក្នុងតាក់ស៊ីស្រាប់។

មន្រ្តីបច្ចេកទេសរបស់ក្រុមហ៊ុនចិន EHang បានឲ្យដឹងថា ដើម្បីបង្កើនសុវត្តិភាពរបស់អ្នកដំណើរ រាល់ការធ្វើដំណើរ និងដំណើរការនៃម៉ាស៊ីនរបស់តាក់ស៊ីដ្រូនទាំងអស់ ត្រូវបានតាមដានយ៉ាងល្អិតល្អន់ដោយបុគ្គលិក នៅក្នុងមជ្ឈមណ្ឌបញ្ជា និងគ្រប់គ្រង ហើយអ្នកដំណើរនៅក្នុងតាក់ស៊ី ក៏អាចធ្វើការទំនាក់ទំនងជាមួយមជ្ឈមណ្ឌបញ្ជា និងគ្រប់គ្រង ប្រសិនបើមានការចាំបាច់៕

ដោយឡែកព័ត៌មានគួរឲ្យចាប់អារម្មណ៍មួយទៀត៖ ណាសា ប្រកាសរកឃើញភពថ្មី ចំនួន៧ ស្រដៀងភពផែនដី

សារព័ត៌មានដេលីម៉ែល បានចុះផ្សាយព្រឹកថ្ងៃទី២៣ ខែកុម្ភៈ ឆ្នាំ២០១៧នេះថា អង្គការណាសា ធ្វើការប្រកាសជាផ្លូវការ កាលពីយប់មិញថា ពួកគេបានរកឃើញភពជាច្រើននៅក្នុងប្រព័ន្ធព្រះអាទិត្យថ្មីមួយ ដែលមានសភាពដូចជាភពផែនដី និងអាចមានលទ្ធភាពឲ្យជីវិតរស់នៅបានថែមទៀតផង។

ប្រភពព័ត៌មានបានឲ្យដឹងថា ប្រព័ន្ធព្រះអាទិត្យថ្មីនេះ មានភពចំនួន ៧ ដែលមានទំហំប្រហាក់ប្រហែលនឹងភពផែនដី ធ្វើដំណើរជុំវិញតារាពណ៌ក្រហមមួយ ដែលមានឈ្មោះថា TRAPPIST-1។ វាមានចម្ងាយ ៣៩ឆ្នាំពន្លឺ ពីផែនដី ហើយនៅក្នុងភពទាំង ៧នោះ គេជឿថាយ៉ាងហោចណាស់មានភពចំនួន ៣ដែលមានលក្ខណៈដូចភពផែនដី និងអាចឲ្យជីវិតរស់នៅបាន។

ការរកឃើញថ្មីនេះ ត្រូវបានធ្វើឡើងដោយក្រុមអន្តរជាតិ ដោយប្រើប្រាស់កែវពង្រីកកម្រិតខ្ពស់ និងទំនើប ដែលបានបង្ហោះទៅក្នុងលំហអាកាស និងស្ថិតនៅទីដ៏សែនឆ្ងាយជុំវិញពិភពលោក។

ភពថ្មីដែលគួរឲ្យចាប់អារម្មណ៍ទាំងអស់នោះ គឺស្ថិតនៅកៀកៗនឹងគ្នា ប៉ុន្តែការនៅកៀកគ្នាបែបនេះ វាអនុញ្ញាតឲ្យអ្នកវិទ្យាសាស្ត្រអាចប្រើប្រាស់កែវពង្រីកដ៏ទំនើប Ultra-Sophisticated Telescopes និងម៉ាស៊ីនស្គែន ដើម្បីតាមដានភពទាំងអស់នោះ និងធ្វើការបញ្ជាក់ឲ្យកាន់តែច្បាស់ថានៅក្នុងភពទាំងនោះមានទឹក ហើយបរិយាកាសអាចទ្រទ្រង់ជីវិតលូតលាស់បាន។

ក្រុមតារាវិទូ បានឲ្យដឹងថា ភពទាំង ៧នោះ ត្រូវបានគេជឿជាក់ថា យ៉ាងហោចណាស់វាមានអាយុកាល ១ពាន់លានឆ្នាំ ហើយមានបឹង និងមហាសមុទ្រជាច្រើនទៀតផង។ ប៉ុន្តែមានភពចំនួន៣ នៅកៀកនឹងតារា TRAPPIST-1 ដែលអាចមានសភាពក្តៅខ្លាំង និងមិនមានទឹក ខណៈភព១ ផ្សេងទៀតហាក់នៅឆ្ងាយ និងមានសភាពត្រជាក់ខ្លាំង។

ទោះជាយ៉ាងណា នៅមានភពចំនួន ៣ ទៀតដែលស្ថិតនៅកណ្តាល គឺភព (E1 F1 និង G1) ជាភពដែលអ្នកវិទ្យាសាស្រ្តកំពុងចាប់អារម្មណ៍ខ្លាំង ព្រោះវាមិនក្ដៅ និងមិនត្រជាក់ពេកសម្រាប់ជីវិតលូតលាស់។ សីតុណ្ហភាពនៅលើផ្ទៃភព មានកម្រិតចាប់ពី សូន្យ ដល់ ១០០អង្សា ដូច្នេះទឹកនៅក្នុងភពនោះ នឹងមិនពុះ ហើយក្លាយជាចំហាយនោះទេ។

ចំពោះលក្ខណៈពិសេសផ្សេងៗរបស់ភពទាំង ៧ ដែលស្ថិតនៅក្នុងប្រព័ន្ធព្រះអាទិត្យថ្មីនេះ រួមទាំងព័ត៌មានជាក់លាក់ផ្សេងទៀត អង្គការ ណាសា គ្រោងនឹងបង្ហាញនៅឆ្នាំក្រោយនេះ ដូច្នេះយើងរង់ចាំតាមដានទាំងអស់គ្នាថា ភពទាំងនោះ ពិតជាអាចឲ្យយើងរស់នៅបានដែរ ឬក៏អត់៕ 

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ