ខេត្តក្រចេះ ៖ បុរសម្នាក់បានស្លាប់ភ្លាមៗមួយរំពេច បន្ទាប់ពីត្រូវរន្ទះបាញ់ចំគាត់ ខណៈកំពុងតែឈរជ្រកភ្លៀងក្រោមផ្ទះ កើតឡើងកាលពីវេលាម៉ោង៦យប់ថ្ងៃទី២២ កុម្ភៈ ស្ថិតក្នុងឃុំស្រែចារ ស្រុកស្នួល ខេត្តក្រចេះ ។
ប្រភពឱ្យដឹងថា បុរសរងគ្រោះដែលស្លាប់ឈ្មោះនី មីន អាយុ៣៥ឆ្នាំ មានទីលំក្នុងភូមិកើតហេតុខាងលើ ត្រូវស្លាប់ឆេះរោលពេញរាងកាយ ។
បើតាមការឲ្យដឹងពីអ្នកភូមិថា ពេលនោះគឺមេឃមានភ្លៀងធ្លាក់ និងមានខ្យល់ខ្លាំង ហើយជនរងគ្រោះចូលជ្រកភ្លៀងនៅក្រោមផ្ទះ ស្រាប់តែមានរន្ទះមកបាញ់លាន់ឮរំពង បណ្តាលឱ្យជនរងគ្រោះស្លាប់ភ្លាមៗមួយរំពេច ។ ក្នុងគ្រោះថ្នាក់នេះ ដែលមានសន្ធឹកបាញ់ខ្លាំងឡើងក្រហមច្រាលពេញមេឃ ធ្វើឲ្យអ្នកភូមិនៅម្តុំនោះភ័យតក់ស្លុតគ្រប់គ្នា ។
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
បាត់អស់ប្រាក់ខែ រស់ដោយសារឡើងត្នោត
ខេត្តកំពង់ឆ្នាំង ៖ អតីតសេនាជនពិការម្នាក់និងក្រុមគ្រួសារ ដង្ហោយរកជំនួយគ្រាដែលគ្រួសារគាត់កំពុងជួបការលំបាកខ្វះខាតដល់កហើយក្នុងជីវភាពប្រចាំថ្ងៃ ។ ពិសេសទៀតនោះគាត់បានអះអាងថា គាត់បានលក់ប្រាក់ខែរបបជនពិការឱ្យគេត្រឹមតែ៣ឆ្នាំប៉ុណ្ណោះ តែពេលនេះជាង១០ឆ្នាំទៅហើយ ពេលទៅសួរគេ ស្រាប់តែគេថា ឈ្មោះគាត់ត្រូវគេលុបចោលតាំងពីយូរមកហើយធ្វើឱ្យគាត់អស់ព្រលឹងរលីង ។
ដោយសារស្ថានភាពគ្រួសារកាន់តែលំបាករូបគាត់និងក្រុមគ្រួសារ សូមអំពាវនាវដល់ សមត្ថកិច្ចពាក់ព័ន្ធទាំងអស់ ជួយស្រាវជ្រាវឈ្មោះឱ្យគាត់ផង ថាតើពិតជាត្រូវបានគេលុបឈ្មោះមែនឬយ៉ាងណា ? ម្យ៉ាងវិញទៀត សូមអំពាវនាវដល់សប្បុរសជន មេត្តាជួយដល់គ្រួសារគាត់ផង ព្រោះរស់សព្វថ្ងៃពឹងលើមុខរបរឡើងត្នោតធ្វើទឹកត្នោតជូរលក់ និងខែវស្សាដើរស៊ីឈ្នូលគេពិតជាលំបាកដល់កម្រិតហើយ ។
អតីតសេនាជនពិការរូបនេះឈ្មោះ ឌុំ សាំង អាយុ៦៣ឆ្នាំ ប្រពន្ធឈ្មោះ គឹម យឺន អាយុ៦២ឆ្នាំ មានកូន៧នាក់ បែកមានគ្រួសារ៣នាក់ នៅក្នុងបន្ទុក៤នាក់ និងចៅកំព្រា២នាក់ ។ គ្រួសារគាត់រស់នៅក្នុងភូមិទ្រនាមពេជ ឃុំគោកបន្ទាយ ស្រុករលាប្អៀរ ។ គាត់គ្មានដីស្រែចម្ការធ្វើទេ សព្វថ្ងៃប្រកបរបរស៊ីឈ្នួលធ្វើស្រែឱ្យគេ ដាក់មងដាក់សន្ទូច និងឡើងត្នោតធ្វើទឹកត្នោតជូរលក់ក្នុង១រដូវបានតែ៣ខែទេ ។ ក្នុង១ថ្ងៃលក់បានពី៥ពាន់រៀល ទៅ១ម៉ឺនរៀល ចិញ្ចឹមជីវិតរស់ទាំងត្រដរ នៅចុងរដូវវស្សាអត់ការងារធ្វើដាច់បាយម្តងម្កាលផងដែរ ។
អតីតសេនាជនពិការរូបនេះបានរំឭកថា នៅក្នុងឆ្នាំ១៩៨០ គាត់ត្រូវបានអាជ្ញាធរមូលដ្ឋាន ចាត់តាំងឱ្យធ្វើជាសេនាជនឃុំគោកបន្ទាយ ហើយនៅថ្ងៃទី១០ ខែមេសា ឆ្នាំ១៩៨៥ គាត់បានរងរបួសត្រូវគ្រាប់បេ៤០របស់ទាហានខ្មែរក្រហម នៅសមរភូមិផ្លូវដែកក្នុងស្រុកទឹកផុស ក្នុងពេលប្រយុទ្ធការពារប្រជាពលរដ្ឋទៅកាប់ព្រៃតាមផ្លូវដែក ។ ស្ថានភាពរបួសគឺបាក់ជើងឆ្វេង តឆ្អឹងដែក ដាច់កដៃឆ្វេង ខ្វាក់ភ្នែកខាងឆ្វេង បាក់ឆ្អឹងដងកាំបិតឆ្វេងតដែក និងរបួសដោយអំបែងគ្រាប់បេ៤០សុសពេញខ្លួន ។ បច្ចុប្បន្ន ភ្នែកស្តាំបានឆ្លងរបួសពីភ្នែកខាងឆ្វេង មើលឃើញតែ៤០ភាគរយប៉ុណ្ណោះ និងមានជំងឺសរសៃប្រសាទមិនសូវចងចាំ ភ្លេចមុខភ្លេចក្រោយ ។
ក្រោយពីគាត់រងរបួសនិងពិការនៅក្នុងសមរភូមិ ត្រូវបានរដ្ឋបញ្ចូលគាត់ជាសេនាជនពិការ និងបើកប្រាក់របបជនពិការបាន១ខែជាង៨ម៉ឺនរៀល ។
នៅអំឡុងឆ្នាំ២០០២ ផ្ទះគាត់បានរលំខូចខាតហើយគាត់ធ្លាក់ខ្លួនឈឺ ក៏បានលក់ប្រាក់ខែជនពិការទៅឱ្យគ្រូបង្រៀនម្នាក់រយៈពេល៣ឆ្នាំបានប្រាក់១លានរៀល ដោះស្រាយមើលជំងឺ និងជួសជុលផ្ទះ ។ ៣ឆ្នាំក្រោយមក ពេលទៅទារឯកសារពីគ្រូបង្រៀននោះវិញ គេប្រាប់ថា ឈ្មោះគាត់ត្រូវបានរដ្ឋកាត់ចោលលែងបើកប្រាក់ជនពិការបានហើយ ។ រឿងនេះគាត់បានឡើងទៅសួរមន្ទីរសង្គមកិច្ចខេត្តចំនួន២ដង តែមិនបានលទ្ធផល គាត់ស្នើសុំស្ថាប័នពាក់ព័ន្ធជួយស្រាវជ្រាវប្រាក់របបជនពិការឱ្យគាត់ផង។ គាត់ថា បើមានទេវតានៅឋានណាក៏គាត់ទៅសុំឱ្យជួយដែរ ព្រោះពេលនេះក្រដល់កហើយ ។
លោក អ៊ូ សំអុីន មេភូមិទ្រនាមពេជ បានឱ្យដឹងថា លោក ឌុំ សាំង ពិតជាសេនាជនពិការនៅសមរភូមិផ្លូវដែកពិតមែន ហើយសព្វថ្ងៃគាត់ពិតជាមានជីវភាពខ្វះខាតនិងក្រីក្រខ្លាំងណាស់។ ទាក់ទងនឹងប្រាក់ខែជនពិការនេះ លោក ចក់ កែវចំរើន មន្ត្រីមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានឱ្យដឹងថា ក្នុងអំឡុងឆ្នាំ២០០៥ មានសេនាជនមួយចំនួនធំ ត្រូវបានលុបឈ្មោះចេញ ក្នុងនោះខេត្តកំពង់ឆ្នាំង សេនាជនដែលត្រូវលុបឈ្មោះចេញជាង១០០
នាក់ ហើយប្រហែលជាគាត់ (ឌុំ សាំង) ត្រូវគេលុបឈ្មោះចេញដែរហើយមើលទៅ ព្រោះឈ្មោះគាត់មិនឃើញមាននៅក្នុងបញ្ជីបើកប្រាក់ខែទេ ។
គាត់ជាអតីតយុទ្ធជនការពារផ្លូវដែកមួយរូប ធ្លាក់ខ្លួនពិការ ។ វេទនាអីចឹងៗមើលគ្នាអត់ឃើញទេ ។ បាត់អស់ប្រាក់ខែប្រាក់ឧបត្ថម្ភផ្សេងៗ ដែលសព្វថ្ងៃសម្ងំរស់ដោយឡើងដើមត្នោត អត់មានបុរសណាមើលឃើញឡើយ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
