អាលីយ៉ា មានការងារបើកឆាកដំបូង សម្រាប់ឆ្នាំ២០១៧ ក្រោយពី​នាង​ ជួប​រឿងរ៉ាវជីវិតស្នេហា ជូចត់កាលពីពេលកន្លងមក

ភ្នំពេញ៖ ស្នាដៃសិល្បៈថ្មី របស់តារាសម្តែង និងVJអាលីយ៉ា មានការងារបើកឆាកដំបូង សម្រាប់ឆ្នាំ២០១៧ ក្រោយពីនាង ជួបរឿងរ៉ាវជីវិតស្នេហា ជូចត់កាលពីពេលកន្លងមក ។ នាងបានថតរូប និងវីដេអូផ្សព្វផ្សាយ ពាណិជ្ជកម្មថ្មីនៅសណ្ឋាគា ប្រណីត Heritage Suites Hotel នៅលើទឹកដី នៃខេត្តសៀមរាប។ 

ក្រោយជួបរឿង ស្មុគស្មាញនៅក្នុងជីវិត តារាសម្តែងស្រី និងVJ អាលីយ៉ា បានឲ្យដឹងថា ទទួលបានការងារសិល្បៈថ្មីមួយ គឺជាការផ្តល់ឱកាស បើកឆាកការងារ សិល្បៈជាថ្មី។ នាងថាម្ចាស់ សណ្ឋាគា Heritage Suites Hotel បានអញ្ជើញនាង ជាតារាកិត្តិយស ដើម្បីថតរូបនិងសម្តែង ក្នុងឈុតផ្សព្វផ្សាយ សម្រាប់សណ្ឋាគារនេះ ដោយបូករួមទាំង ការផ្តល់ឱកាសឲ្យនាង ស្នាក់នៅសណ្ឋាគារនេះ ជាច្រើនថ្ងៃក្នុងឱកាស ថ្ងៃទិវានៃក្តីស្រលាញ់កន្លងទៅ។ 

សណ្ឋាគារនេះ ស្ថិតនៅជិតវត្តពោធិលង្កា សង្កាត់ស្លក្រាម ខេត្តសៀមរាប ។ នាងបានបញ្ជាក់ថា ការថតត្រូវបានធ្វើឡើង ជាមួយក្រុមអ្នកជំនាញ ផលិតមកពីប្រទេសហ្វីលីពីន ដោយតម្រូវឲ្យនាងថត នូវសកម្មភាពបង្ហាញ ពីសេវាកម្មជាច្រើន របស់សណ្ឋាគាប្រណីមួយនេះ ទាំងទិដ្ឋភាព នៃការស្នាក់នៅ និងការបម្រើសេវាកម្ម ជាច្រើនទៀត នៅក្នុងសណ្ឋាគារមួយនេះ។ 

តារាស្រីដែលធ្លាប់រងគ្រោះ ព្រោះរងអំពើហិង្សា បង្ហាញពីអារម្មណ៍ រំភើបផងដែរជុំវិញ ការផ្តល់ឱកាស របស់ម្ចាស់កម្មវិធី ក៏ដូចជាម្ចាស់សណ្ឋាគារ ដែលបានស្វែងយល់ និងលើកទឹកចិត្ត ផ្តល់តម្លៃដល់សិល្បករ ដោយផ្តល់ការស្នាក់នៅ ជាច្រើនថ្ងៃដោយឥតគិតថ្លៃ សម្រាប់នាងក្នុងថ្ងៃបុណ្យ នៃសេចក្តីស្រលាញ់ផងដែរ។

អ្វីដែលនាងកាន់តែមានកម្លាំងចិត្ត ក្នុងការបន្តការងារ សិល្បៈគឺក្រោយពីបុគ្គលិក សណ្ឋាគារខាងលើ បានស្វាគមន៍រួសរាយ រាក់ទាក់និងសុំថតរូប អនុស្សាវរីយរួមគ្នាជាដើម។ សូមជម្រាបថា ក្នុងឱកាសឆ្នាំថ្មីនេះ តារាសម្តែងស្រី និងVJ អាលីយ៉ា នឹងទទួលបាន ការងារសិល្បៈសាជាថ្មី ហើយនាងក៏បួងសួងឲ្យឆ្នាំថ្មីនាំមកនូវ អ្វីដែលថ្មីសម្រាប់រូបនាងផងដែរ។ នាងរំពឹងដែរថាសា្នដៃ សិល្បៈថ្មីរបស់នាង នឹងទទួលបានការគាំទ្រ ច្រើនពីមហាជន៕

ប្រភព៖ ដើមអម្ពិល

• អាលីយ៉ា