រាជធានីភ្នំពេញ ៖ លោកករុណា ពេជ្រ ជិតលាអាជីពចម្រៀងទាំងស្រុងហើយនាពេលខាងមុខក្រោយពីចាប់អាជីពនេះរាប់ឆ្នាំមក ។ លោកករុណា ពេជ្រ សម្រេចចិត្តប្រកាសបែបនេះ ខណៈលោកទទួលបានតំណែងជាអ្នកចាត់ការទូទៅប្រចាំផលិតកម្មថោន ។
លោកករុណា ពេជ្រ នាពេល ថ្មីៗកន្លងមករៀបរាប់ឱ្យដឹងថាចាប់តាំងពីលោកអៀ វឌ្ឍនា លាចាកលោកទៅ ការងារទាំងប៉ុន្មានរបស់ផលិតកម្មថោន លោកត្រូវចំណាយពេលពីរខែគត់សម្រាប់ធ្វើឱ្យហើយអស់ ។ ក្រៅពីបន្តការងារចាស់របស់លោកអៀ វឌ្ឍនា មានការងារ ថ្មីៗមួយចំនួនទៀតដែលលោកករុណា ពេជ្រ រ៉ាប់រង។
«អ៊ីចឹងហើយទើបខ្ញុំត្រូវរៀនសូត្របណ្តើរធ្វើបណ្តើរ អនុវត្ត ភ្លាមៗ ក្នុងតួនាទីនេះដោយមានរៀមច្បងនានា ជួយជាយោបល់ ជាគំនិតឱ្យខ្ញុំធ្វើផងដែរ ដោយខ្ញុំត្រូវតែរ៉ាប់រងប្រការទាំងអស់នេះខ្លាំងបំផុត ។ ម្ល៉ោះហើយពេលដែលខ្ញុំចាប់យកមុខរបរថ្មីនេះ ការងារសិល្បៈរបស់ខ្ញុំអាចនឹងបន្ថយច្រើនបំផុត ព្រោះបើនិយាយពីសិល្បៈខ្ញុំមានការហត់នឿយពេក ហើយប្រឡូកក៏ច្រើនឆ្នាំ ។ ណាមួយបានការងារថ្មីនេះក៏មិននៅឆ្ងាយពីសិល្បៈ ទើបខ្ញុំចង់ពង្រឹងសមត្ថភាពឱ្យល្អ ។
ស្របពេលដែលការឱ្យតម្លៃតួនាទីនេះចំពោះខ្ញុំគឺខ្ញុំនៅមិនទាន់ហ៊ានទទួលទាំងស្រុងនៅឡើយ ចង់ឱ្យគេមើលឃើញពីសមត្ថភាពយើងធ្វើសិន មុននឹងមានការទទួលស្គាល់» ។
ខណៈទទួលតំណែងថ្មីនេះបទចម្រៀងដែលលោកករុណា ពេជ្រ ត្រូវច្រៀងសម្រាប់បុណ្យចូលឆ្នាំថ្មីគឺលោកស្ទើរតែមិនបានច្រៀងដូចឆ្នាំ មុនៗទេ មានតែមួយទៅពីរបទប៉ុណ្ណោះ ដើម្បីបម្រើអារម្មណ៍ប្រិយមិត្តអ្នកស្តាប់ ។
«ខ្ញុំនៅមិនទាន់ដឹងថាអាចវិលចូលសិល្បៈអំឡុងពេលណានោះទេ បើឥឡូវឆ្លៀតមិនបាន ។ ការឃ្លាតពីច្រៀងមួយរយៈនេះមិនមែនមកពីបានថ្មីចោលចាស់នោះទេ នេះមកពីការងារដែលមានត្រូវបន្តការមើលខុសត្រូវខ្ពស់មិនអាចចែកពេលវេលាបាន ។ បើងាកទៅច្រៀងពេលខ្លះតាមខេត្តជិតឆ្ងាយខកពេលមិនអាចធ្វើការបានដូច្នេះមានតែចាប់មួយឱ្យច្បាស់សិន ។ ក្នុងចិត្តរបស់ខ្ញុំនៅតែនឹករលឹកសិល្បៈ នឹកគុណចំពោះបងប្អូនទាំងអស់ដែលគាំទ្រការច្រៀង ការសម្តែងរបស់ខ្ញុំតាំងពីដើមរហូតមក បើមានពេលវេលាល្អខ្ញុំអាចមកច្រៀងលើឆាកតន្ត្រីនានាឡើងវិញជាក់ជាមិនខាន ។ យ៉ាងណាក្តីក៏ខ្ញុំនៅមិនឆ្ងាយសិល្បៈព្រោះការងារថ្មីក៏សិល្បៈ ។ បន្ថែមពីលើនេះខ្ញុំក៏ទទួលរៀបចំកម្មវិធីជប់លៀងតាមពិធី ផ្សេងៗទាំងមង្គលការ ខួបកំណើត មានភ្លេងមានតារាចម្រៀង ល្បីៗចូលរួម មានទាំងរចនាផ្កាស្រស់បម្រើជូនម្ចាស់ដើមការមិនឱ្យខកចិត្ត ដែលពេលនេះរឹតតែមមាញឹកជាមួយការងារខាងក្រៅផងដែរ» ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា៖ ករុណា ពេជ្រ មានឱកាសចេញទៅសម្ដែង នៅទឹកដីសម្បូរដុល្លារ ខណៈអ្នកសិល្ប៤នាក់ទៀត ជួបរឿងស៊យធំ
(ភ្នំពេញ)៖ ការចេញទៅសម្ដែង នៅក្រៅប្រទេសក្នុងរដូវវស្សានេះ ជារឿងពេញនិយមបំផុត សម្រាប់សិល្បករខ្មែរ ព្រោះក្នុងរដូវនេះ ក្នុងប្រទេសកម្ពុជា មិនសូវមានកម្មវិធីចេញសម្ដែងច្រើនឡើយ ពោលអ្នកសិល្បៈតែងតែនិយាយថា គឺជារដូវដេកស៊ីលុយចាស់។ ដូចនេះ ទើបតារាម្នាក់ៗ រូតរះចង់ចេញក្រៅ ដើម្បីកើបលុយក្នុងរដូវភ្លៀកធ្លាក់នេះ។ ថ្មីៗនេះ អ្នកសិល្បៈរបស់កម្ពុជា ចំនួន៥នាក់ទៀត ត្រូវចេញទៅសម្ដែងនៅទឹកដីមហាសេដ្ឋកិច្ច សម្បូរដុល្លារ គឺអាមេរិក ប៉ុន្តែអ្វីដែលគួរឲ្យសោកស្ដាយនោះ ក្នុងចំណោមពួកគេទាំង៥នាក់ គឺឆ្លងកាត់ការសម្ភាសន៍ជាប់តែម្នាក់ប៉ុណ្ណោះ ចំណែក៤នាក់ទៀត បែរជាត្រូវធ្លាក់ខកខានចេញទៅកើបប្រាក់ទាំងអស់។
តារាសិល្បៈខ្មែរចំនួន៥ដួង មានដូចជា លោក ករុណា ពេជ្រ, លោក អាន គុណកូឡា ,លោក ម៉ៅ ហាជី ,កញ្ញា សុវត្ថិឌី ធារីកា និងនិងតារាចម្រៀង អ្នកនាង សុន សន្យា ហើយក្នុងចំណោមតារាចម្រៀងទាំង៥ ដួងនេះ គឺមានតែ លោក ករុណា ពេជ្រ ម្នាក់គត់ ដែលអាចសម្ភាសន៍ជាប់ នៅស្ថានទូតអាមេរិក កាលពីពេលថ្មីៗនេះ ហើយក្រៅពីនោះ តារាចម្រៀងបួនរូបទៀតធ្លាក់លឺសូរតែក្ដុក តែម្ដង។
ប្រភពជិតដិត នឹងតារាចម្រៀងទាំងនោះ បាននិយាយថា ជារឿងស៊យបំផុតស្ទើរតែមិនគួរឲ្យជឿ ដែលពួកគេទាំងបួននាក់ធ្លាក់ ហើយជាប់តែម្នាក់ ព្រោះឯកសារបានត្រៀមរួចរាល់ហើយ មិនមានអ្វីចោទជាបញ្ហាអ្វីឡើយ។ តែប្រភពផ្សេងពីនោះ បានបង្ហើបថា ស្ថានទូតអាមេរិក បានរឹតបន្តឹងយ៉ាងខ្លាំង សម្រាប់សិល្បករខ្មែរ ព្រោះកន្លងមកតារាមួយចំនួន បានចាកចេញហើយ មិនចង់ត្រឡប់មកវិញ តារាខ្លះរត់គេចកំឡុងពេលសម្ដែង និងបង្ករបញ្ហាច្រើន។
ប្រភពដដែលបានបន្តថា មូលហេតុដែលលោក ករុណា ពេជ្រ ជាប់តែម្នាក់ឯង ព្រោះលោកមានភាពគួរឲ្យទុកចិត្តជាងគេ ថាលោកនឹងត្រឡប់មកវិញ ក្រោយចប់ការសម្ដែង ព្រោះមានវីឡាដ៏ស្កឹមស្កៃ ជិត៦០ម៉ឺនដុល្លារ នឹងការងារក្នុងស្រុកជាច្រើន ដែលប្រាកដណាស់ថា មិនចោលឆ្អឹងនៅអាមេរិកឡើយ។ យ៉ាងណាក្ដី ផ្ទុយពីនោះ គេសង្កេតឃើញ តារាចម្រៀងថ្មី លោក អៀម វណ្ណី បែរជាសម្ភាសន៍ជាប់នឹងត្រឡប់មកវិញរួចរាល់ ខណៈដែលលោកមិនមានអ្វីជាដុំកំភួនឡើយ នេះប្រហែលមកពីតារាបួននាក់ មិនបានរៀបចំឲ្យបានល្អ ទើបធ្លាក់ព្រាតដូចនេះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]