ខេត្តក្រចេះ ៖ បន្ទាប់​ពី​បែកធ្លាយ​អាថ៌​កំបាំង​តាម​រយៈ​ការ​លើក​ឡើង​របស់​ក្រុមប្រឹក្សា​ឃុំ​ពី​រឿង​ចៅស្រី​វ័យក្មេង​​មាន​ផ្ទៃពោះ​៦​ខែ​ដោយ​សារ​ត្រូវ​តា​ចាប់​រំលោភ​ជា​បន្ត​បន្ទាប់​រួច​មក សមត្ថកិច្ច​នគរបាល​បាន​ចុះ​ទៅ​នាំ​ខ្លួន​បុរស​ចំណាស់​សង្ស័យ​មក​សាកសួរ​និង​ឃាត់ខ្លួន​តែ​ម្តង ។

បុរស​វ័យ​ចំណាស់​ដែល​ត្រូវ​នគរបាល​ស្រុក​ស្នួល​ចាប់​ឃាត់ខ្លួន​ពាក់ព័ន្ធ​ករណី​រំលោភ​សេពសន្ថវៈ​លើ​ចៅស្រី​វ័យ​១៦​ឆ្នាំ​រហូត​មាន​ផ្ទៃពោះ​៦​ខែ​នេះ​ឈ្មោះ ជា គា អាយុ​៧៣​ឆ្នាំ មុខរបរ​ជា​គ្រូថ្នាំ​ខ្មែរ រស់នៅ​ក្នុងភូមិ​តា​សោម ឃុំ​ស្វាយ​ជ្រះ ស្រុក​ស្នួល ត្រូវជា​ឪពុកចុង​របស់​ម្តាយ​នារី​រង​គ្រោះ និង​ជា​ជីតា​ចុង​របស់​នាង​ផង​ដែរ ។

ទោះបីជា​យ៉ាងណា ករណី​តា​រំលោភ​ចៅស្រី​រហូត​មាន​ផ្ទៃពោះ​នេះ គឺ​មិន​មានការ​ប្តឹងប្តល់​ពី​ក្រុម​គ្រួសារ​របស់​ក្មេង​ស្រី​រង​គ្រោះ​នោះ​ទេ តែ​ត្រូវ​បាន​លើក​ឡើង​ដោយ​ក្រុមប្រឹក្សា​ឃុំ​ទៅ​វិញ ។ ដោយសារ​តែ​នារី​រង​គ្រោះជា​កូនកំព្រា​ឪពុក និង​សព្វថ្ងៃ​រស់នៅ​ជាមួយ​ស្ត្រី​ជា​ម្តាយ​ដែល​មិន​មានការ​យកចិត្តទុកដាក់​លើ​នាង ហើយ​មិនតែប៉ុណ្ណោះ​ជនសង្ស័យ​វ័យ​ចំណាស់​តែងតែ​ធ្វើការ​គំរាម​តាម​ពាក្យ​សម្តី​យ៉ាងធ្ងន់ធ្ងរ​មក​លើ​នាង​ទៀត​ផង​នោះ ។

លោក​វរសេនីយ៍ទោ ចាន់ សុខ​គី​ម អធិការ​នគរបាល​ស្រុក​ស្នួល បាន​ឲ្យ​ដឹង​ថា បន្ទាប់​ពី​មានការ​លើក​ឡើង​ពី​សមាជិក​ក្រុមប្រឹក្សា​ឃុំ​ស្វាយ​ជ្រះ នៅ​ក្នុង​កិច្ចប្រជុំ​មួយ​នៅ​សាលាស្រុក​ស្នួល កាលពី​ព្រឹក​ថ្ងៃ​ទី​២២ ខែកុម្ភៈ ឆ្នាំ​២០១៧ ថា មាន​ករណី​តា​ចាប់រំលោភ​ចៅស្រី​រហូត​មាន​ផ្ទៃពោះ កម្លាំង​ជំនាញ​ព្រហ្មទណ្ឌ​ស្រុក​បាន​ចុះ​ឃាត់ខ្លួន​បុរស​ចំណាស់​សង្ស័យ​មក​សាកសួរ​ទាំង​គ្មាន​ពាក្យបណ្តឹង ។

លោក​អធិការ​បញ្ជាក់​ថា ក្រោយ​ការ​នាំ​ខ្លួន​បុរស​សង្ស័យ​វ័យ​ចំណាស់ និង​នារី​រង​គ្រោះ​មក​សាកសួរ និង​ទទួល​បាន​ចម្លើយ​សារភាព ទើប​នគរបាល​សម្រេច​ឃាត់ខ្លួន​បុរស​សង្ស័យ​វ័យ​ចំណាស់​រូប​នេះ​ពាក់ព័ន្ធ​ករណី​រំលោភ​សេពសន្ថវៈ ។

បើ​តាម​ការ​សម្រង់​ចម្លើយ​របស់​នារី​រង​គ្រោះ​អាយុ​១៦​ឆ្នាំ បាន​រៀបរាប់​ប្រាប់​នគរបាល​ថា កាលពី​ខែកញ្ញា ឆ្នាំ​២០១៦ កន្លង​ទៅ ជនសង្ស័យ​ជា​ជីតា​រូប​នេះ​បាន​បបួល​នាង​ដើរ​មើលជម្ងឺ​ឲ្យ​គេ​តាម​ភូមិ ។ ដោយ​ក្នុង​មួយ​កន្លែង​ត្រូវ​ដេក​ផ្លូវ​២-៣​យប់​ទើប​ត្រឡប់​មក​ផ្ទះ​វិញ ។ ហើយ​ការ​ដើរ​មើលជម្ងឺ​ព្យាបាល​ឲ្យ​គេ​ជាមួយ​ជនសង្ស័យ ជា​ជីតា​រូប​នេះ​បាន​ធ្វើ​ឡើងជា​ច្រើន​កន្លែង ។ រហូត​ដល់​ថ្ងៃ​មួយទៀត គាត់​បាន​បបួល​នាង​មក​ព្យាបាល​ជម្ងឺ​ឲ្យ​គេ​នៅ​ភូមិ​ស្នួល​វត្ត​កើត ឃុំ​ស្នួល ស្រុក​ស្នួល និង​បាន​សម្រាក​នៅ​ទីនោះ​រយៈពេល​៣​យប់ ។ ទីនោះ​ជា​កន្លែង​ចុង​ក្រោយ​ដែល​បុរស​ជាប់ចោទ​វ័យ​ចំណាស់​រូប​នេះ​បាន​ល្បួង​នាង​រំលោភ​រហូត​បាន​សម្រេច​ចំនួន​៣​ដង ។

ក្រោយ​ការ​ល្បួង​ចាប់រំលោភ​បាន​សម្រេច​ជា​បន្តបន្ទាប់​រហូត​ដល់​សព្វ​ថ្ងៃនេះ​បាន​ធ្វើ​ឲ្យ​ក្មេង​ស្រី​រង​គ្រោះ​វ័យ​១៦​ឆ្នាំ មាន​ផ្ទៃពោះ​ចំនួន​៦​ខែ​ហើយ ។ តែ​យ៉ាងណា នាង​ក៏​មិន​ហ៊ាន​ប្តឹងប្តល់​ជនសង្ស័យ​ជា​ជីតា​រូប​នេះ​ដែរ ព្រោះតែ​កន្លង​មក​ជនសង្ស័យ​រូប​នេះ​បាន​គំរាម​នាង ដោយ​បង្គាប់​នាង​ឲ្យ​ដើរ​ប្តឹង​ថា ទោះជា​ប្តឹង​ដល់​ទីណា​ក៏​គាត់​មិន​ខ្លាច​ដែរ ។

លោក ចាន់ សុខ​គី​ម អធិការ​នគរបាល​ស្រុក​ស្នួល បាន​ឲ្យ​ដឹង​ទៀត​ថា ក្រោយ​ពី​ទទួល​បាន​ចម្លើយ​សារភាព​គ្រប់គ្រាន់​ជនជាប់ចោទ​ជា​ជីតា​រូប​នេះ​ត្រូវ​បាន​កម្លាំង​នគរបាល​ជំនាញ​ព្រហ្មទណ្ឌ​ស្រុក​ឃាត់ខ្លួន និង​កំពុង​កសាង​សំណុំរឿង​ចាត់ការ​បន្ត ៕

ប្រភព៖ កោះសន្តិភាព

ដោយឡែកពត៌មានគួរឲ្យចាប់អារម្មណ៍មួយទៀត៖

អាណិតណាស់! ប្តីជាកម្មករសំណង់ ដេកស្លាប់ក្នុងការដ្ឋានសំណង់ ដោយសារជម្ងឺគាំងបេះដូង ទុកឲ្យប្រពន្ធកំពុងមានផ្ទៃពោះជិតគ្រប់ខែទៅហើយ នៅកំព្រា

(ភ្នំពេញ)៖ បុរសម្នាក់ដែលកម្មករសំណង់ ត្រូវបានគេប្រទះឃើញដេកស្លាប់ នៅលើជាន់ឡៅតឿ ក្នុងការដ្ឋានសំណង់មួយកន្លែង​ នៅព្រឹកថ្ងៃទី២២ ខែកុម្ភៈ ឆ្នាំ២០១៧ ស្ថិតនៅក្នុងបុរីសែនមនោរម្យ ក្នុងភូមិកន្ទោកខាងជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចបានឱ្យដឹងថា ជនរងគ្រោះ ឈ្មោះ នុត ស៊ីថា (ហៅស) អាយុ៣៥ឆ្នាំ មុខរបរជាងសំណង់ មានស្រុកកំណើតនៅ ក្នុងភូមិតាជ័យ ឃុំបឹងព្រះ ស្រុកបាភ្នំ ខេត្តព្រៃវែង និងស្នាក់នៅកន្លែងកើតហេតុខាងលើ ហើយប្រពន្ធ ឈ្មោះ ភាជ ស្រីណុច អាយុជាង២០ឆ្នាំ កំពុងមានផ្ទៃពោះដំបូង និងជិតគ្រប់ខែទៀតផង។

ដោយឡែក ការស្លាប់របស់ជនរងគ្រោះ សង្ស័យបណ្ដាលមកពីជម្ងឺគាំងបេះដូង ហើយក្រោយពេលនគរបាល ចុះមកធ្វើកោសល្យវិច័យរួច សពត្រូវបានក្រុមគ្រួសារនាំយកទៅធ្វើបុណ្យនៅស្រុកកំណើត។

សមត្ថកិច្ចបានឲ្យដឹងថា កាលពីវេលាយប់ថ្ងៃទី២១ ខែកុម្ភៈ ឆ្នាំ២០១៧ ក្រោយពេលធ្វើការងារចប់ បុរសរងគ្រោះបានផឹកស្រាបៀរជុំគ្នាជាមួយមិត្តភក្ដិ រួមការងារប៉ុន្តែ ខណៈនោះជនរងគ្រោះបានផឹកអស់ តែ២កំប៉ុងប៉ុណ្ណោះ ក៏បានឡើងទៅដេកនៅលើជាន់ឡៅតឿ នៅក្នុងការដ្ឋានសំណង់ខាងលើ។

ខណៈនោះមិនមាននរណាបានដឹងថា មានរឿងអ្វីកើតឡើងនោះឡើយ លុះដល់ព្រឹកថ្ងៃទី២២ ខែកុម្ភៈ ដោយមិនឃើញគាត់ ក្រោកធ្វើការបុរសម្នាក់ដែលជាមេការសំណង់ បានឡើងទៅមើល និងដាស់ឲ្យក្រោក ដើម្បីធ្វើការស្រាប់តែ ប្រទះឃើញបុរសនោះស្លាប់បាត់ទៅហើយ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]